135-годдзе Купалы адзначылі ў Маскве выстаўкай і канцэртам

Урачысты вечар, прысвечаны 135-годдзю выдатнага беларускага паэта Янкі Купалы, адбыўся ў Маскве ў Дзелавым і культурным комплексе пасольства Беларусі ў Расіі, паведамілі ў прэс-службе дыпмісіі. 

Адкрываючы мерапрыемства, Надзвычайны і Паўнамоцны Пасол Беларусі ў Расіі Ігар Петрышэнка адзначыў, што ў гісторыі кожнага народа ёсць імёны, якімі ганарацца. "Ёсць сярод іх такія, што сталі здабыткам чалавецтва, паколькі слава іх перасягнула межы дзяржаў і часу. Імя Янкі Купалы паўнапраўна можна аднесці да гэтай кагорты", - сказаў дыпламат.

Паводле слоў кіраўніка дыпмісіі, гістарычная заслуга Янкі Купалы і заключаецца ў тым, што ён стварыў сапраўдныя шэдэўры нацыянальнага мастацтва і тым самым узняў беларускую літаратуру да ўзроўню перадавых літаратур свету, зрабіў яе агульнанароднай з'явай. "Купала зазірнуў у душу беларусаў, паказаў іх характар, выказаў спадзяванні і надзеі, спрадвечнае жаданне "людзьмі звацца", - падкрэсліў пасол. 

З нагоды юбілейнага года паэта Дзяржаўны літаратурны музей Янкі Купалы прэзентаваў унікальны выставачны праект "Завуся я толькі Янка Купала", дзе прапанаваў новы погляд на вобраз народнага паэта Беларусі. У аснове экспазіцыі - музейныя прадметы з фондавых калекцый музея, у тым ліку мемарыяльныя рэчы Янкі Купалы, а таксама малавядомыя фотаздымкі. 

Праграму вечара прадоўжыў сольны канцэрт легендарнага ансамбля "Песняры", у які ўвайшлі кампазіцыі з альбома "Шчаслівасць" на вершы Янкі Купалы, а таксама ўсімі любімыя і вядомыя хіты калектыву. Дырэктар Дзяржаўнага літаратурнага музея Янкі Купалы Алена Ляшковіч адзначыла, што творы паэта заўсёды натхнялі беларускіх мастакоў і музыкантаў. У гісторыі беларускай культуры ёсць спецыяльны тэрмін "мастацкая і музычная купаліяна". Больш за 200 музычных твораў створана на вершы Янкі Купалы: опера, араторыя, рок-опера, мюзіклы і вялікая колькасць песень. "У рэпертуары ансамбля "Песняры" на працягу ўсёй яго гісторыі творы на вершы Янкі Купалы займалі вялікае месца. Купалу вельмі любіў Уладзімір Мулявін", - расказала Алена Ляшковіч.

Гасцямі вечара ў беларускай дыпмісіі сталі прадстаўнікі МЗС Расіі, Еўразійскай эканамічнай камісіі, Пастаяннага камітэта Саюзнай дзяржавы, урада Масквы, дыпламатычнага корпусу, творчай інтэлігенцыі, беларускай дыяспары.

БЕЛТА