Старшыня Савета Рэспублікі Нацыянальнага сходу Міхаіл МЯСНІКОВІЧ падчас чарговага пасяджэння першай сесіі шостага склікання заклікаў парламентарыяў уносіць прапановы па паляпшэнні заканадаўства, зыходзячы з праблем, якія блізкія людзям.
Асобна парламентарый звярнуў увагу на гарманізацыю і ўніфікацыю заканадаўства членаў Еўразійскага эканамічнага саюза і Саюзнай дзяржавы Беларусі і Расіі. На яго думку, дапамагчы вырашыць праблему разрэгуляванасці ўнутранага рынку саюза могуць менавіта парламентарыі.
Акрамя таго, падчас сесіі быў ратыфікаваны шэраг разнапланавых пагадненняў з іншымі краінамі. Па словах Сяргея РАХМАНАВА, старшыні Пастаяннай камісіі Савета Рэспублікі па міжнародных справах і нацыянальнай бяспецы, гэтыя законапраекты ахопліваюць два блокі: «Першы тычыцца спрашчэння візавага рэжыму ў абменах Беларусі з Гватэмалай і Босніяй і Герцагавінай. Гэта важныя дакументы, якія дазволяць нам прасоўваць, у першую чаргу, свае эканамічныя інтарэсы, інтэнсіфікаваць дзелавыя абмены і кантакты ў краінах Лацінскай Амерыкі і Цэнтральнай Еўропы. Другі блок пагадненняў звязаны з энергетыкай. Адно з іх — паміж Беларуссю і Арменіяй — і тычыцца атамнай энергетыкі».
Усяго ў Савеце Рэспублікі ў сераду было разгледжана 13 пытанняў. Сярод іншага, сенатары далі згоду на абранне чатырох суддзяў Вярхоўнага суда і аднаго — Віктара Рабцава — у Кастытуцыйны суд.
Вераніка ПУСТАВІТ
Сумесныя праекты ядзерных тэхналогій.
