Можна прывесці доўгі спіс сітуацый, здольных выклікаць стрэс, але наўрад ці ў гэтым ёсць такая вострая патрэба. Відавочна адно: амаль любая жыццёвая калізія, у якой чалавек адчувае напружанне, можа аказацца прычынай стрэсу.
«Як мы ведаем, стрэс вельмі шкодны для нашага здароўя, — кажа псіхолаг Мінскага гарадскога клінічнага псіхіятрычнага дыспансера Вольга АКАТАВА. — Таму проста неабходна вучыцца выходзіць з гэтага стану з мінімальнымі стратамі. Самае першае, што мы павінны засвоіць — нельга прымаць ніякіх рашэнняў і штосьці рабіць у стане перажывання моцнага стрэсу. А далей трэба мець на ўвазе няхітрыя спробы мінімізацыі шкодных наступстваў».
- Як бы банальна гэта ні прагучала, але спачатку палічыце да 10. Або павольна ўдыхніце і выдыхніце некалькі разоў.
Можна ўзяць на ўзбраенне яшчэ некалькі прыёмаў:
- Намачыце некалькі разоў халоднай вадой лоб, скроні і артэрыі на руках.
- Апішыце ў думках наваколле. Засяродзьце ўвагу на кожнай дробязі.
- Паглядзіце на неба. Сканцэнтруйцеся на тым, што бачыце.
- Павольна выпіце шклянку вады.
- Уявіце сябе ў садзе, на пляжы, у гарах.
- Прымяніце формулу заспакаення: «Сёння я не звяртаю ўвагі на дробязі».
- Калі вам хочацца смяяцца, плакаць, размаўляць — рабіце гэта. Можаце пабіць падушку.
- Наогул фізічная нагрузка выдатна дапамагае (20-30 прысяданняў, бег на месцы, хада па лесвіцы).
- Слухайце музыку, якая вас заспакойвае.
- Можаце заняцца чым-небудзь карысным — зрабіце прыборку, перастаноўку.
- Прыміце кантрасны душ.
- Займіце сябе чым-небудзь цікавым.
- Не пазбягайце размоў з прыемнымі людзьмі.
- Імкніцеся знаходзіць станоўчае нават у няўдачы («затое...»).
- Нарэшце, падумайце, ці можаце вы што-небудзь змяніць у сітуацыі, якая склалася. Калі не можаце... прыміце ўсё як ёсць.
- Думайце пра сябе і сваё здароўе.
- Сонца ёсць нават тады, калі неба зацягнутае хмарамі.
protas@zviazda.by
