Але прадукцыйнасць працы павінна прырастаць за кошт мадэрнізацыі, а не дадатковых «напружванняў» работніка
Пастанова Савета Міністраў ад 31 ліпеня 2014 года № 744 «Аб аплаце працы работнікаў» знайшла ў народзе і абаронцаў, і праціўнікаў. Нагадаем: гэты дакумент прадугледжвае, што ў дзяржаўных арганізацыях рост намінальнай налічанай сярэднямесячнай заработнай платы работнікаў дапускаецца толькі пры ўмове апераджальнага росту прадукцыйнасці працы. Акрамя таго, пастанова абмяжоўвае зарплату кіраўніка прадпрыемства. Адны цяпер загаварылі аб сацыяльнай справядлівасці, другія — аб непатрэбнасці падобных захадаў, трэцім не спадабалася, што іх зноў да нечага абавязваюць.
Канфіскаваць лішкі?
З такой прапановай раз-пораз выступаюць на інтэрнэт-форумах пры абмеркаванні згаданай пастановы. Напрыклад, вось у такой фармулёўцы: «Думаю, што трэба ўвогуле ўвесці закон, па якім узровень даходаў фізічнай асобы не можа перавышаць, скажам, 2000 долараў у месяц, а лішкі канфіскаваць... Такі закон абараняў бы нарэшце інтарэсы 95% насельніцтва, якія атрымліваюць менш за 2000 «зялёных». Іншыя выказваюцца не так радыкальна: «Добраму работніку павінны плаціць добрую зарплату, а кіраўніку — згодна з тым, як ён арганізуе працу і матывуе рабочага». Спрабуюць апраўдацца і кіраўнікі: «Вы шмат не ўлічваеце. Вось вы атрымалі 100 рублёў выручкі і заплацілі 20% ПДВ. Мінус выдаткі на арэнду і іншае. Заплацілі падатак на прыбытак. Каб налічыць вам з гэтых 100 рублёў 30, арганізацыя павінна ўнесці ў Фонд сацабароны 34% ад вашай зарплаты, а значыць, ужо больш за 40 рублёў. Мінус іншыя вылікі. У выніку павінен застацца чысты прыбытак, ці дывідэнды заснавальнікаў, з якіх таксама трэба плаціць падатак...»
Карацей, так ці інакш дакумент закрануў усіх. У большай ступені, зразумела, дзяржаўныя арганізацыі і арганізацыі, у статутным фондзе якіх доля ўласнасці дзяржавы складае больш за 50%, бо для іх гэтыя нормы абавязковыя. Пры невыкананні гэтай умовы фонд заработнай платы за справаздачны месяц памяншаецца да памеру, які забяспечвае суадносіны росту прадукцыйнасці працы і заработнай платы не менш за 1,0. А вось уласнікам маёмасці арганізацый недзяржаўнай формы ўласнасці, у тым ліку арганізацый, у статутным фондзе якіх доля ўласнасці дзяржавы складае менш за 50%, толькі рэкамендавана не дапускаць апярэджання росту намінальнай налічанай сярэднямесячнай заработнай платы работнікаў над ростам прадукцыйнасці.
Чакаецца, што нормы пастановы павінны нацэліць арганізацыі не толькі на вытворчасць прадукцыі, тавараў, работ, паслуг, але і на іх рэалізацыю, што будзе садзейнічаць зніжэнню складскіх запасаў і росту даходаў арганізацый. У сувязі з гэтым у якасці паказчыка пры вызначэнні прадукцыйнасці працы ў арганізацыях вызначана выручка ад рэалізацыі прадукцыі, тавараў, работ, паслуг на аднаго сярэдняспісачнага работніка.
Дарэчы, пастановай устаноўлены адзіны для арганізацый усіх формаў уласнасці парадак выплаты бонусаў. У мэтах скарачэння разрыву ў аплаце працы кіраўнікоў і работнікаў камерцыйных арганізацый зацверджана, што пры разліку каэфіцыента іх суадносін будуць улічвацца гадавыя бонусы. Яны выплачваюцца кіраўнікам такіх арганізацый, у суме якая перавышае 12 акладаў. Пры гэтым памер гадавога бонуса для кіраўнікоў дзяржаўных арганізацый абмяжоўваецца 12 акладамі. Да арганізацый усіх формаў уласнасці таксама даведзена, што разрыў у заработнай плаце кіраўніка і работнікаў не павінен перавышаць 8. Іншымі словамі, вылічваецца сярэдні заробак па прадпрыемстве, на які дзеліцца заробак кіраўніка. Пасля глядзяць на атрыманы каэфіцыент: калі ён будзе перавышаць 8, то альбо павялічваюць заробак работнікам, альбо памяншаюць кіраўніку. Гэтая норма накіравана на забеспячэнне сацыяльнай справядлівасці і адказнасці бізнесу.
Нацыянальнаму банку рэкамендавана прытрымлівацца аналагічных падыходаў у дачыненні да заработнай платы кіраўнікоў і работнікаў банкаў. Міністэрству працы і сацыяльнай абароны і Міністэрству эканомікі даручана даваць тлумачэнні па пытаннях прымянення пастановы.
На некаторых прадпрыемствах зарплата можа панізіцца?
Міхаіл Кавалёў, дэкан эканамічнага факультэта БДУ, доктар фізіка-матэматычных навук, прафесар, заслужаны дзеяч навукі Рэспублікі Беларусь, сцвярджае, што дабрабыт краіны і кожнага чалавека залежыць ад усяго таго, што мы стварылі за год — валавога ўнутранага прадукту: «У Беларусі ён, па апошніх звестках МВФ, складае прыкладна 16 тысяч долараў па парытэтных цэнах. Для параўнання: у вядучай краіне Еўрасаюза Германіі — каля 35 тысяч долараў. Атрымліваецца, што наш жыццёвы ўзровень складае ад нямецкага 40%, хаця яшчэ 20 гадоў таму было толькі 19%. Гэта адбываецца толькі за кошт росту прадукцыйнасці працы. Сёння наш ВУП — сума дабаўленых вартасцяў усіх вялікіх і малых прадпрыемстваў краіны — знаходзіцца прыкладна на ўзроўні 160 млрд долараў, а працуе ў краіне 4,5 мільёна чалавек. Значыць у сярэднім прадукцыйнасць працы — прыкладна 35,5 тысячы долараў. Атрымліваецца, што за год наш работнік стварае тавараў і паслуг на гэтую суму. У тых жа немцаў — амаль 80 тысяч. Мы жывем горш больш чым у два разы, бо працуем горш у тыя ж два разы. Таму для павышэння нашага дабрабыту нам неабходны рост прадукцыйнасці.
Кожны грамадзянін скажа: «Я быццам і так напружваюся на працы». Зразумела, што гэта залежыць не толькі ад кожнага з нас, але і ад тэхнічнага ўзбраення, тэхналогій. Калі мы на традыцыйных вытворчасцях скароцім лайдакоў, а самі пачнём працаваць лепш, то ўсё пойдзе нармальна. Скажам, з 1 верасня павысілі зарплату настаўнікам і ўрачам. Але можна было б яе павысіць яшчэ больш, калі б на кожнага, хто лечыць ці выкладае, было менш розных арганізатараў, кантралёраў, рэвізораў, метадыстаў і гэтак далей. Нам трэба дамагчыся таго, што ў апараце кіравання будуць еўрапейскія стандарты — суадносіны паміж тымі, хто вучыць і лечыць, і тымі, хто ім гэта дапамагае рабіць.
Беспрацоўя ў краіне няма, таму нічога страшнага, калі вызваляць частку рабочай сілы. Але не выключаю, што на некаторых прадпрыемствах зарплата можа панізіцца. Калі яны ствараюць прадукцыю, якую не ўмеюць прадаць, то, зразумела, што ні аб якім павышэнні заробку не можа быць размовы. Але гэта выхавае пэўны патрыятызм. Калі рабочы завода «Атлант» купляе халадзільнік «Іndesіt», то гэтым самым ён скарачае сабе зарплату. Тады ён будзе дакручваць усе гайкі так, каб самому захацелася купіць халадзільнік, зроблены сваімі рукамі».
Супраць фізічных нагрузак і зніжэння заробку
Федэрацыя прафсаюзаў Беларусі мае сваё меркаванне адносна пастановы Саўміна. Як паведамілі нашаму карэспандэнту ў прэс-службе, «федэрацыя заўсёды выступала і выступае за тое, каб павышалася прадукцыйнасць працы, бо гэта адзін з найважнейшых фактараў, якія ўплываюць на рост прыбытку і павелічэнне даходаў прадпрыемстваў». Аднак рост прадукцыйнасці працы там звязваюць з укараненнем на айчынных прадпрыемствах новай тэхнікі, комплекснай аўтаматызацыі, удасканаленнем машын і абсталявання, а не з павелічэннем фізічных нагрузак на працоўных. «Федэрацыя прафсаюзаў выступае за павышэнне прадукцыйнасці працы, заснаванае на ўжыванні больш эфектыўных і дасканалых формаў працы, але катэгарычна супраць памяншэння заробкаў, нават калі яно закране толькі нязначныя катэгорыі работнікаў».
Уладзіслаў КУЛЕЦКІ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?