Як жыццё, землякі-парачане?
Як ты дуж, край буйных журавін?
Ты — вясны маёй светлае ранне.
І адзін ты на свеце, адзін.
Малая радзіма... Якое месца займае яна ў нашым жыцці? Безумоўна, гэта нашы карані, нашы бацькі, нашы найлепшыя гады дзяцінства, юнацтва, сяброўства, першага кахання. А яшчэ — непаўторнасць родных краявідаў, пра якія хочацца складаць вершы... Пра чалавека, які валодае дарам вобразнага бачання свету, я хачу сёння расказаць. Гэта мая зямлячка Марыя Дзюбак, аўтарка зборніка паэзіі «Светлыя ростані». Яе малая радзіма — невялічкая, атуленая з усіх бакоў лясамі ды балотамі вёсачка пад даволі распаўcюджанай у нас на Беларусі назваю Парэчча. Вёска гэта знаходзіцца ў Докшыцкім раёне, на беразе ціхаплыннай Сэрвачы — прытока маляўнічай Віліі.
Пабываўшы тут, пераконваешся: парэцкая зямля не можа не нараджаць паэтаў. Парачане — гасцінныя людзі, якія з ахвотаю апавядаюць пра сваю вёску, яе трагічную ваенную гісторыю, пра будаўніцтва грэблі (сапраўды, як у мележаўскім рамане «Людзі на балоце»). Але з асаблівым гонарам і душэўнасцю яны расказваюць пра зямлячку Марыю Дзюбак. Мне паказалі тое месца, дзе раней стаяла хата, у якой нарадзілася будучая паэтка. Цяпер на хатнішчы драўляны крыж, ля якога людзі, пераважна жанчыны, збіраюцца на малітву. А яшчэ на былой сядзібе ёсць буслянка. А навокал, па ўсёй вёсцы, — мора зеляніны, кветак, бо парачане, нягледзячы на немалады ўзрост, любяць парадак і прыгажосць. У гэтым ім дапамагаюць дзеці, якія летам прыязджаюць з гарадоў і з задавальненнем тут адпачываюць, дыхаюць свежым паветрам, збіраюць ягады і грыбы.
Мне, вядома, было цікава паслухаць саму паэтку. Зараз Марыя Браніславаўна жыве ў аграгарадку Сітцы, што знаходзіцца за сем кіламетраў ад яе роднага Парэчча. Кожную нядзелю яна прыязджае на імшу ў родны параф'янаўскі касцёл. Простая, ветлівая, гаваркая жанчына, былая настаўніца роднай мовы і літаратуры, яна з задавальненнем адгукнулася на маю просьбу сустрэцца і пагутарыць. Яна распавяла пра сваю «Маёвую малітву» (адзіную паэму, змешчаную ў зборніку «Светлыя ростані»):
— Мы ўсе чакаем і любім май, таму што ён, бадай, самы прыгожы месяц у годзе. Асабліва ў маім Парэччы. Водар чаромхі, гудзенне хрушчоў... Цвіценне садоў, калі яблыні нагадваюць «белыя аблокі, што прыселі лёгка на зямлю»... А вось мне прыгадаўся іншы май, май 1944 года, калі ўсё было ў Парэччы ў чорных фарбах, бо вёска была спалена фашыстамі якраз першага мая. А днём раней, 30 красавіка, было расстраляна восем парачан і сярод іх — мой дзед Аўгусцін. Увесь май сорак чацвёртага жыхары Парэчча правялі за калючым дротам, у лагеры, што размяшчаўся ў Сітцы. Ім кожны дзень пагражала смерць. Таму балючымі для мяне з'яўляюцца і гэтыя падзеі, і гэтыя радкі, складзеныя з успамінаў мамы і маіх сваякоў. Людзі ў лагеры звярталіся да Маці Божай той маёвай малітвай, якую і мы кожны май чытаем у касцёле або дома...
Зборнік паэткі змяшчае таксама падборку «Парэцкі край у паданнях, вершаваных апавяданнях». У ім апісваюцца падзеі, зусім аддаленыя ад нашага часу. Творы нагадваюць больш эпас, чым лірыку. У іх распавядаецца пра тое, як жылі даўней, пры панах, падчас Першай сусветнай вайны. Працуючы над падборкай, Марыя Дзюбак гутарыла са старажыламі, выхадцамі з Парэчча, якія цяпер жывуць у іншых месцах. Ад іх яна пачула незвычайныя гісторыі пра тое, адкуль бралі такую моцную цэглу для будаўніцтва нашага касцёла, пра трагічнае каханне паненкі Мар'яны з маёнтка Кліманцова, пра старыя ваенныя могілкі ў Валатоўках і многае іншае. Гэта ўсё і склалася ў цыкл вершаў, дзе на першым месцы не лірыка, а аповед пра падзеі.
Паэтка адзначае, што часта любіць наведвацца ў родную вёсачку. Адлегласць у сем кіламетраў яна звычайна пераадольвае на веласіпедзе. Як задумае пабачыцца са сваякамі або пазбіраць журавіны на знаёмым з дзяцінства балоце — садзіцца на свайго жалезнага каня, і не пройдзе паўгадзіны, а яна — ужо ў Парэччы. І пра гэта ў адным з яе вершаў:
Тут баравым лячуся я паветрам,
Сунічным, незабудкавым, мядовым,
У сілу зёлак вечных тут паверу,
У сілу слова, матчынага слова.
Марыя Дзюбак гатова бясконца гаварыць пра сваю шчырую любоў да малой радзімы:
— У Парэччы самыя блакітныя пралескі, самыя пахучыя рамонкі, самая гаваркая рачулка Сэрвач, самы загадкавы Сіні бор і самыя духмяныя суніцы. І ўсё тут самае-самае. Дык як жа яно можа не натхняць на творчасць?..
Юлія Януковіч,
вучаніца 10 класа
Параф'янаўскай сярэдняй школы
Докшыцкага раёна.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.