Напярэдадні 170-й гадавіны з дня нараджэння Рэпіна карэспандэнт «Звязды»
пазнаёміўся з жанчынай, продкі якой валодалі зямлёй пад Віцебскам, дзе мастак пабудаваў сядзібу
Днямі ў музеі-сядзібе вядомага на ўвесь свет мастака пабывалі незвычайныя турысты. Жыхары паўночнай сталіцы Расіі ўжо гадоў восем папаўняюць мясцовую калекцыю сваімі падарункамі. І падчас чарговага візіту яны прывезлі рарытэты.
— Па спецыяльнасці я — мастацтвазнаўца, сябрую з Рэпінскім музеем у Пенатах (Ленінградская вобласць). Вядома ж, ведала пра Здраўнёва. Памятаю, ў першы раз узімку тут пабывала. Я і мае спадарожнікі, калі зайшлі ў памяшканне музея, адразу заўважылі, як мала там экспанатаў. Ужо ў цягніку, калі вярталіся ў Санкт-Пецярбург, мая спадарожніца сказала, што ў яе ёсць блюда антыкварнае, якое яна можа падарыць музею. Іншыя таксама выказалі жаданне дапамагчы. Такім чынам, ужо прыкладна 400 прадметаў з таго часу перадалі ў дар. Вядома, Рэпін імі не карыстаўся, але ж яны — з той эпохі. Мы хочам, каб гэты музей стаў лепшым у вашай краіне, — расказвае Наталля Віктараўна Баклан, ганаровы прэзідэнт клуба сяброў музея-сядзібы «Здраўнёва».
Паводле яе слоў, сярод сяброў музея — пенсіянеры, медыцынскія работнікі, педагогі, прадпрымальнікі, настаўнікі, музыканты і іншыя зусім не багатыя людзі. Іх, акрамя любові да Рэпіна, яднае тое, што разам вось ужо больш за 20 гадоў вандруюць па Расіі, Украіне, Беларусі.
— Думаю, абавязкова цяпер трэба падарыць горку для фарфоравага посуду. Тут ужо шмат яго. І я посуд антыкварны дарыла, ручнікі бабуліны. Каб купіць горку, вырабленую з каштоўнай пароды дрэва, трэба 100-120 тысяч расійскіх рублёў. У камісійнай краме бачыла такую. Мне не шкада рабіць падарункі. Што лепш: пыліцца ў мяне дома будзе або людзям застанецца, якія прыйдуць у музей? — працягвае жанчына.
Цікава, што яна падарыла і ложак, на якім спала прабабуля яе мужа, крэсла, вырабленае ў канцы XІX — пачатку XX стагоддзя. Яно належала сям'і чалавека, які мог стаць яе айчымам. Мужчына загінуў на фронце, яго бацькі памерлі падчас блакады Ленінграда. Калі мама Наталлі Віктараўны, не ведаючы нічога пра лёс каханага, прыйшла ў яго дом, суседка ўсё расказала. І прапанавала ўзяць рэчы на памяць.
Валерый Шышанаў, намеснік дырэктара Віцебскага абласнога краязнаўчага музея па навуковай працы (у склад яго ўваходзіць сядзіба «Здраўнёва». — Аўт.), уручыў ганаровым гасцям (хаця, напэўна, правільна іх называць сябрамі) падзякі ад Галоўнага ўпраўлення ідэалагічнай работы, культуры і па справах моладзі Віцебскага аблвыканкама — за шматгадовае супрацоўніцтва, папаўненне экспазіцыі.
Сярод іншых падзяку атрымала і Алена Гдальеўна Папова-Яцкевіч, член Рускага генеалагічнага таварыства Санкт-Пецярбурга. Яна — з роду Яцкевічаў, якія калісьці валодалі сядзібай Койтава. Частка гэтай сядзібы была прададзена Рэпіну.
— «Здраўнёва» знаходзіцца на тэрыторыі былой сядзібы, якая была падзелена паміж васьмю дзецьмі Аксенція Іосіфавіча Яцкевіча. Ён працаваў губернскім сакратаром (не самы высокі чын на той час. — Аўт.), служыў у гарадской управе. Частка яго сядзібы, якая называлася Сафіеўка (у гонар уладальніцы), была набыта Рэпіным. Ён тут многае перарабіў, таму што любіў усё мяняць на свой густ. Соф'я, былая ўладальніца Здраўнёва, належыць да бакавой лініі нашага роду, які пачынаецца з XV стагоддзя, — расказвае Алена Папова-Яцкевіч.
Яе далёкі продак быў сакратаром вялікага князя Літоўскага Казіміра, потым яго сына — Аляксандра. Ездзіў з імі, складаў вопіс, збіраў даніну. Пра яго ўзгадваецца ў летапісах.
— Род Яцкевічаў герба «Gozdawa» бярэ пачатак ў ХV стагоддзі. Яго нашчадкі да дваццатага калена жывуць цяпер у Расіі. Магчыма, Яцкевічы, якія з'яўляюцца грамадзянамі Беларусі, Германіі, ЗША і Украіны, іх сваякі. Ёсць Яцкевічы ў Венгрыі і Польшчы.
Прадстаўнік роду, Тамаш Іванавіч Яцкевіч, быў рэлігійным пісьменнікам. Ён склаў слоўнік — з біяграфіямі ўсіх персанажаў, згаданых у Бібліі. На той час быў выпускніком Пецярбургскай духоўнай акадэміі. Слоўнік быў выдадзены ў 1840 годзе.
— А яшчэ мяне вельмі цікавіць Віктар Іванавіч Яцкевіч, дырэктар канцылярыі обер-пракурора найсвяцейшага сінода. Ён вельмі падтрымліваў беларускія ўлады — рэлігійныя і свецкія. У 1910 годзе дзякуючы і яго намаганням мошчы Еўфрасінні Полацкай былі перавезены ў Полацк. Гэта адбылося пасля таго, як імператар Мікалай ІІ распарадзіўся, каб астанкі святой былі перанесены ў Спаса-Еўфрасіннеўскі манастыр у 1910 годзе. Тады быў зняты фільм — аб тым, як перавозілі мошчы. Ён знаходзіцца ў Падмаскоўі — у архіве кіна-фотадакументаў, — расказала госця з Санкт-Пецярбурга.
Паводле яе слоў, былая ўладальніца сядзібы, якую набыў Рэпін, Віктару Іванавічу Яцкевічу прыходзілася цёткай.
Аляксандр ПУКШАНСКІ.
Віцебскі раён — Віцебск.
Даведка «Звязды».
Ілья Яфімавіч Рэпін нарадзіўся 5 жніўня (24 ліпеня — па старым стылі) 1844 года.
У 1892—1900 гг. прыязджаў час ад часу і працаваў ва ўласным маёнтку Здраўнёва на беразе Заходняй Дзвіны. Тут у 1892 годзе былі створаны палотны «Беларус», «Восеньскі букет», «Паляўнічы з ружжом», эцюд «На Заходняй Дзвіне. Усход сонца». У наступныя гады: «Святочнае гулянне ў Здраўнёве», «Касец-літвін», «Дуэль», «Месячная ноч. Здраўнёва», «Партрэт сына Юрыя на тэрасе здраўнёўскага дома», партрэты дачок. Напісаў мастак таксама і абразы «Хрыстос» і «Маці Божая» для царквы ў суседняй вёсцы Слабада. Апошнія знаходзяцца ў фондах Віцебскага абласнога краязнаўчага музея.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.