Эпідэміялагічная абстаноўка ў шэрагу краін па некаторых інфекцыйных захворваннях, у тым ліку такіх, што маюць міжнароднае значэнне, з'яўляецца напружанай. Прагноз экспертаў СААЗ на бліжэйшы час неспрыяльны.
Урач-эпідэміёлаг аддзела арганізацыі дзейнасці па пытаннях Мытнага саюза Рэспубліканскага цэнтра гігіены, эпідэміялогіі і грамадскага здароўя Раіса ЖУК нагадвае пра неабходнасць вытрымліваць простыя і даступныя кожнаму меры прафілактыкі, а таксама тлумачыць, што рабіць, калі вы захварэлі на інфекцыю ў пасажырскім цягніку.
Паведаміце аб прыкметах прастуды або грыпу правадніку вагона. Усё ж такі ў яго ёсць медыцынская аптэчка, і ён можа аблегчыць клінічнае цячэнне інфекцыі.
Праваднікі вагонаў знаёмыя з асноўнымі сігнальнымі прыкметамі інфекцыйных захворванняў і здольны правесці першыя супрацьэпідэмічныя мерапрыемствы, у тым ліку ізаляваць хворага ў купэ да прыбыцця ў бліжэйшы пункт прызначэння.
Начальнік цягніка пры неабходнасці перадае паведамленне дзяжурнаму чыгуначнай станцыі (начальніку вакзала), які, калі трэба, выклікае хуткую медыцынскую дапамогу.
Пры з'яўленні сімптомаў з паветрана-кропельным механізмам перадачы інфекцыі (вострая рэспіраторная інфекцыя, грып, адзёр, шкарлятына і інш.), трэба папрасіць у правадніка маску для меншага распаўсюджвання інфекцыі па вагоне. Неабходна пры гэтым як мага менш перасоўвацца па вагоне, каб не дапусціць заражэння іншых.
У любым выпадку, знаходзячыся ў дарозе, часцей мыйце рукі з мылам. Няма магчымасці вымыць рукі? Карыстайцеся вільготнымі сурвэткамі на спірце. Большасць вірусаў і бактэрый перадаюцца прамым кантактам. Мікраарганізмы могуць жыць некалькі гадзін, а тое і тыдняў, а таму даволі лёгка заразіцца, калі дакранацца да тых жа прадметаў, што і інфіцыраваны. Чым часцей наогул вы дакранаецеся да вачэй, носа ці рота, тым большая верагоднасць атрымання інфекцыі.
Памятайце пра гігіену кашлю. Калі вы чхаеце або кашляеце, вірусы і бактэрыі распаўсюджваюцца на 1,5-2 метры, а таму заўсёды трэба прыкрывацца сурвэткай.
Пажадана часцей праводзіць вільготную прыборку і праветрыванне вагона або купэ.
Хворы павінен больш піць, што дапамагае выдаліць з арганізма таксіны.
Круглы год, дзе б вы ні былі, ужывайце больш рознакаляровай садавіны і гародніны.
Не курыце. Курцы часцей пакутуюць на грып і ВРІ. Пасіўнае курэнне таксама зніжае імунітэт. Тытунёвы дым высушвае насавыя праходы і паралізуе эпітэлій, які адказвае за вывядзенне з насавых пратокаў, бронхаў і лёгкіх вірусаў прастуды і грыпу. Мяркуецца, што адна цыгарэта паралізуе эпітэлій на 30-40 хвілін. Прыгнятае імунітэт і алкаголь.
Калі ў вас з'явіліся асноўныя сімптомы кішэчнага захворвання (млосць, ваніты, часты вадкі стул, павышаная тэмпература), таксама паведаміце правадніку цягніка. Папярэдзіць заражэнне кішэчнымі інфекцыямі (дызентэрыяй, сальманелёзам, вірусным гепатытам А і г.д.) дапамогуць наступныя правілы...
Ужывайце толькі гатаваную або бутыляваную ваду.
Не кладзіце лёд для ахалоджвання напояў. У месцах грамадскага харчавання лёд могуць рабіць неабавязкова з чыстай пітной вады.
Не купляйце тое, што захоўвалася неналежным чынам.
Не бярыце ў дарогу тое, што вельмі хутка псуецца — запраўленыя салаты, кандытарскія вырабы з крэмам, вырабы з пасечанага мяса (катлеты, рулеты, паштэты) і інш. Падобная ежа можа захоўвацца толькі ў халадзільніку.
Ягады, гародніну, садавіну, якія вы вырашылі ўзяць з сабой, добра памыйце дома пад праточнай вадой, а лепей яшчэ апаласніце цёплай гатаванай. І з'ешце гэта ў першую чаргу.
Святлана БАРЫСЕНКА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.