Умацаванне ўзброеных сіл — не мілітарызм, а гарантыя бяспекі цывільнага насельніцтва
Апошнім часам у беларускай інфармацыйнай прасторы шмат размоў пра нацыянальную бяспеку і абарону, што цалкам зразумела, калі ўлічваць вельмі няпростую ваенна-палітычную сітуацыю ў свеце, у тым ліку зусім блізка ад нашай мяжы — у суседняй Украіне.
Наведваючы 103‑ю асобную гвардзейскую мабільную брыгаду сіл спецыяльных аперацый, Прэзідэнт чарговы раз звярнуў увагу на неабходнасць мадэрнізацыі тэхнікі і пераўзбраення беларускай арміі найноўшымі мабільнымі сродкамі. Адметным з'яўляецца той факт, што Беларусь не плануе набываць зброю за мяжой — такія задачы пастаўлены перад айчынным ваенна-прамысловым комплексам, дзе існуюць планы па арганізацыі вытворчасці баявых машын, верталётаў і нават самалётаў.
Супольны інтарэс
У гэтым кантэксце яшчэ адной падзеяй тыдня стала маштабная выстава ўзбраенняў MІLEX‑2014, што праходзіць у «Мінск-Арэне» з 9 па 12 ліпеня. Наведвальнікам прадстаўлены некалькі тысяч узораў вайсковай тэхнікі з больш чым 140 краін. На працягу мерапрыемства паміж арганізацыямі беларускага ВПК і партнёрамі былі падпісаны новыя кантракты, прадоўжаны тэрміны дзеяння раней заключаных дагавораў.
Зразумела, што выключна пад патрэбы айчыннай арміі немэтазгодна ствараць новыя лініі вытворчасці. Вельмі актуальным застаецца пытанне пашырэння экспарту ўзбраенняў, стварэння супольных ваенна-прамысловых ланцугоў, дзе ў якасці найбольш значнага партнёра для айчыннага ВПК разглядаецца Расія.
Паўнавартасны ўдзел у дзяржаўным абаронным заказе Расійскай Федэрацыі можа істотным чынам паўплываць на перспектывы развіцця вайсковай прамысловасці ў Беларусі. Яшчэ ў 2013 годзе гэтую праблему абмяркоўвалі на ўзроўні дзяржаўнага кіраўніцтва, у тым ліку на перамовах з віцэ-прэм'ерам Дзмітрыем Рагозіным, што адказвае за абаронна-прамысловую сферу ў расійскім урадзе. Між іншым, задача па ўключэнні беларускага прамысловага патэнцыялу ў абарончыя заказы Расійскай Федэрацыі з'яўляецца важнай не толькі для Беларусі, але і для Расіі, бо, апроч эканамічных меркаванняў, мае значэнне і для ўмацавання яе нацыянальнай бяспекі.
Як ні дзіўна, і цяпер, нягледзячы на існаванне праекта Саюзнай дзяржавы, айчынныя вытворцы ўзбраенняў па незразумелых прычынах выступаюць на расійскім рынку ў якасці замежных рэзідэнтаў. Асабліва цяжкія часы для беларускай «абаронкі» насталі ў перыяд, калі Міністэрствам абароны РФ кіраваў Анатоль Сердзюкоў: у той час нашы вытворцы выціскаліся з расійскага рынку на карысць больш дарагіх замежных аналагаў.
Пагрозы тэхналагічнага эмбарга ў адрас Расіі з боку заходніх краін, спыненне супрацоўніцтва паміж ВПК РФ і Украіны вымушаюць расійскае кіраўніцтва іншым чынам паглядзець як на неабходнасць развіцця ўласных тэхналогій, так і на вытворчыя магчымасці бліжэйшых саюзнікаў. У гэтым шэрагу на першай пазіцыі, безумоўна, Беларусь, дзе захаваўся і развіваецца салідны комплекс вайскова-прамысловых актываў.
Упушчаны час ужо, на жаль, не вярнуць, але пашырэнне магчымасцяў беларускай вайсковай прамысловасці — абсалютна неабходны элемент бяспекі Саюзнай дзяржавы і ўсіх краін АДКБ, калі без залежнасці ад знешнепалітычнай кан'юнктуры ўзброеныя сілы саюзнікаў будуць атрымліваць якасную тэхніку і ўзбраенні. Да таго ж і грошы застануцца ў межах еўразійскай прасторы, дзе будуць працаваць на развіццё айчыннай навукі і адукацыі, а не асядаць на афшорных рахунках нячыстых на руку чыноўнікаў ды сумнеўных бізнесменаў.
Трансфармацыя ролі АДКБ
Іншым важным пытаннем, апроч ваенна-прамысловай кааперацыі, застаецца баявое ўзаемадзеянне саюзнікаў. «Не дай Бог, не падстрахуюць са спіны браты, прыйдзецца ваяваць самім», — адзначыў Прэзідэнт падчас візіту ў 103‑ю гвардзейскую брыгаду. Якая ж сітуацыя «ў братоў» і як ідуць справы ў вайсковым супрацоўніцтве Беларусі з іншымі краінамі?
На жаль, АДКБ па-ранейшаму застаецца «цёмным конікам» і, як сказаў генеральны сакратар арганізацыі Мікалай Бардзюжа, «не падсвечана ў інфармацыйнай прасторы і нават у Расіі прэса больш піша пра НАТА чым пра АДКБ». Дарма журналісты не выказваюць цікавасці да гэтай арганізацыі, бо ўжо цяпер узаемадзеянне сілавікоў мае канкрэтныя вынікі, карысныя для кожнай з краін-удзельніц. Напрыклад, толькі ў межах праекта «Проксі» — супрацьдзеянне крыміналу ў інфармацыйнай прасторы — з 2009 года выяўлена і закрыта больш за 16 000 экстрэмісцкіх сайтаў, праваахоўнымі органамі заведзена каля 3600 крымінальных спраў. Што тычыцца будучыні структуры, то, на думку беларускага Прэзідэнта, «Еўразійскі эканамічны саюз чакае ваенная і палітычная інтэграцыя» са зменай ролі АДКБ да статусу «вайсковай арганізацыі» новага ўтварэння.
Пакуль у блок уваходзяць 6 краін: Расія, Беларусь, Казахстан, Арменія, Таджыкістан, Кыргызская Рэспубліка. У межах АДКБ створаны тры вайсковыя групоўкі (расійска-армянская, расійска-казахстанская і расійская-беларуская), існуюць калектыўныя сілы аператыўнага рэагавання, куды ўключаны элітныя часткі Узброеных Сіл краін-удзельніц, спецыяльныя падраздзяленні МУС, антытэрарыстычныя групы, структуры наркакантролю і міністэрстваў па надзвычайных сітуацыях.
Але падобна на тое, што перспектывай АДКБ сапраўды будзе роля абарончага парасона для ЕАЭС. 8 мая 2014 года ў Маскве адбылася закрытая сустрэча кіраўнікоў дзяржаваў АДКБ, былі праведзены паказальныя трэніроўкі, у тым ліку імітацыя ядзернага ўдару. Саюзнікам былі прадэманстраваныя магчымасці па забеспячэнні бяспекі на прасторах Арганізацыі. Такі ядзерны шчыт з'яўляецца найважнейшай гарантыяй суверэнітэту для саюзнікаў Расіі. Але бяспека саюзнікаў — жыццёва важны інтарэс самой Расійскай Федэрацыі, інвестыцыі ў абарончыя магчымасці партнёраў гарантуюць будучыню яе самой. Як слушна заўважыў генсек АДКБ Мікалай Бардзюжа, «бліжэй за пяць краін АДКБ у Расіі нікога няма». Калі казаць аб Беларусі, то знакаміты «беларускі балкон» і тыя самыя «800 кіламетраў да Масквы», што абараняе беларуская армія сёння, у рэчышчы падзей ва Украіне, набываюць зусім іншае гучанне нават у рыторыцы самых радыкальных расійскіх лібералаў.
Відаць, да разумення значнасці ролі Беларусі, як заходняга рубяжу АДКБ, прыходзіць і палітычнае кіраўніцтва Расіі: падчас выставы MІLEX‑2014 Міністэрства абароны РФ падпісала кантракт аб бязвыплатнай перадачы беларускаму боку чатырох зенітна-ракетных комплексаў С‑300.
І тут вельмі важна разумець, што ўмацаванне Узброеных Сіл Беларусі — гэта не падстава для мілітарызму, але патрэба суверэннага развіцця і неабходная гарантыя мірнага жыцця цывільнага насельніцтва.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.