Сцэна... на ёй стаіць адзін чалавек з мікрафонам, які спрабуе жартаваць, і штосьці, мабыць, у яго атрымліваецца. Хтосьці смяецца. Праўда, нехта з гледачоў крычыць: «Сыходзь са сцэны, няўдачнік». А ён толькі больш хвалюецца, спрабуе годна адказаць нахабніку і працягвае. Вось і апошні жарт, апладысменты... Да гледачоў гатовы выйсці наступны выступоўца. Што гэта? Знаёмцеся: стэндап.
Гэта зусім не КВЗ!
Яшчэ год таму амаль ніхто і ўявіць сабе не мог, што гэты кірунках у гумары стане такім папулярным і амаль ва ўсіх абласных цэнтрах з'явяцца свае стэндап-пляцоўкі — месцы, дзе любы чалавек можа выйсці і падзяліцца з гледачом сваімі думкамі і меркаваннямі. Але галоўнае ў стэндапе — гэта смех гледача, таму меркаванні павінны змяшчаць жарты.
З жартам любыя праблемы ўспрымаюцца інакш. Мяркуйце самі: пра адно і тое ж вам можа расказаць які-небудзь занудны чыноўнік, якога амаль ніхто ўважліва слухаць не будзе, і юнак. Апошні, мабыць, і не так добра валодае інфармацыяй, але паспрабуе зрабіць, каб вы не толькі не заснулі, пакуль ідзе яго выступленне, але і смяяліся з жартаў, якія ён прыдумаў на абраную тэму. Мабыць, параўнанне і не самае ўдалае — чыноўнікі ў клубах не выступаюць жа, — але ўсё ж такі...
«Мая дзяўчына кажа, што я ў акулярах непрыгожы. І мне было б усё роўна, але, калі я ў акулярах, яна таксама не прыгажуня»... (Арцём Гаус)
«Пірог» са... смехам
«Чызкейкі» — такую незвычайную назву мелі першыя стэндап-канцэрты ў Беларусі. Праводзіліся яны ў актавай зале Беларускага дзяржаўнага эканамічнага ўніверсітэта ў Мінску. Як і раней, «чызкейкі» сёння арганізуе Вячаслаў Камісаранка — вядомы ў свой час рэзідэнт тэлепраграмы «Забойная ліга» на расійскім ТНТ. Цікава, што ў першым канцэрце ўдзельнічалі толькі... два чалавекі, якія прэзентавалі стэндап, — сам Вячаслаў і яго сябар Аляксандр Сабалеўскі. Абодва пачалі займацца гумарам у КВЗ і мелі поспех на яго пляцоўках.
«Стэндап зацікавіў мяне адсутнасцю рамак у параўнанні з любой іншай формай гумару. Ты можаш рабіць у ім літаральна ўсё. Акрамя таго, тут у цябе ёсць магчымасць не толькі жартаваць, але і выказвацца, дзяліцца сваім меркаваннем, гаварыць аб праблемах. А яшчэ стэндап вельмі падабаецца сваёй мінімалістычнасцю. На сцэне толькі мікрафон і ты», — падзяліўся сваімі думкамі Вячаслаў Камісаранка.
Сапраўды, у адрозненне ад таго ж КВЗ ці тэатральных гумарыстычных спектакляў, у стэндапе непатрэбны рэквізіт ці сцэнічнае адзенне. А яшчэ ў стэндапе ты ні перад кім не адказны. Толькі перад сабой. Ніхто не скажа табе, што ты падвёў калектыў. Таму што твой калектыў — гэта ты сам.
Сёння «чызкейкі» праводзяцца не так часта — некалькі разоў на год. І гэта не цяжка растлумачыць: усе, хто пачынаў ствараць стэндап у Беларусі некалькі гадоў таму, сёння працуюць на расійскім ці ўкраінскім тэлебачанні. Гэта Зміцер Нарышкін, Вячаслаў Камісаранка, Аляксандр Сабалеўскі, Іван Усовіч і іншыя.
«Я не баюся падысці да дзяўчыны. Не бачу ў гэтым нічога цяжкага. Падышоў да дзяўчыны і ўсё. Гэта ж не загаварыць, правільна?» (Расціслаў Шлапак)
Дзве хвіліны
для шчасця
Але па-сапраўднаму стэндап як жанр пачаў распаўсюджвацца толькі восенню мінулага года, калі адчыніў свае дзверы «Вольны мікрафон» у Мінску. У адрозненне ад «чызкейкаў», дзе ўдзельнічалі, так бы мовіць, толькі прафесіяналы, прымаць удзел у «Вольным мікрафоне» можа любы ахвотны. Стэндап хутка распаўсюджваецца па ўсёй краіне. За некалькі месяцаў свае стэндап-пляцоўкі з'явіліся ў Віцебску, Гомелі, Кобрыне. А ў Брэсце нават існуе «Стэндап-ліга». Гэта такое своеасаблівае стэндап-шоу, дзе комікі спаборнічаюць паміж сабой.
У некаторых стэндап-пляцовак ёсць свае правілы. Напрыклад, калі больш за дзве хвіліны ніхто не смяецца з жартаў, гумарыста выганяюць пад спецыяльную музыку. Але гэта ніяк не зняславіць артыста, бо ўсе разумеюць, як гэта цяжка — якасна жартаваць.
У развіцці беларускага стэндапа ёсць і свае праблемы.
«Да таго часу, пакуль на айчыннам тэлебачанні не з'явіцца сваё стэндап-шоу, нельга казаць пра якія-небудзь перспектывы стэндап-руху ў Беларусі. Бо без медыйнасці стэндап-рух будзе існаваць выключна на ўзроўні самадзейнасці. Калі моцны стэндап-комік не атрымлівае за сваю працу грошы, на якія можна было б жыць, то ён паедзе туды, дзе для таго, каб займацца любімай справай, не трэба сумяшчаць свой занятак з работай у іншых сферах. Таму калі нічога не зменіцца, то стэндап-рух у нашай краіне будзе выконваць функцыю «кузні кадраў» для расійскіх і ўкраінскіх тэлеканалаў», — акрэсліў перспектывы і праблемы стэндапа арганізатар першых вольных мікрафонаў у Мінску Яўген Свірыдовіч.
«Мая настаўніца заўсёды білася з астатнімі настаўнікамі. Яна лічыла, што званок толькі для яе». (Максім Маісееў)
Што ты робіш,
хлопча?..
Стэндап — гэта форма гумару, у якой ёсць свае жанры і кірункі. Напрыклад, так званы «Оnе Lіnе» — жарт у адзін радок. Кароткая форма.
Большасць з людзей расказвае гісторыі са свайго жыцця, каб прэзентаваць сябе гледачу. Рэлігія, нацыянальнасць, стэрэатыпы, жыццёвыя праблемы — гэта ўсё толькі тэмы. Праз іх мы знаёмімся з выступоўцамі. Даведваемся пра іх праблемы і інтарэсы.
Нічога дзіўнага, што лепш за ўсё стэндап развіваецца менавіта ў Мінску. Тут ужо распачалі сваю дзейнасць некалькі стэндап-праектаў: адкрыты мікрафон «Ореn Mіnsk» (пляцоўка, на якой можа выступіць любы ахвотны; адкрыты мікрафон праходзіць два разы на месяц у клубе Jасk Сlub); «Nеwmаn Stаnd-uр Shоw» (справаздачны канцэрт, на якім гледачам паказваюць лепшыя стэндап-выступленні за мінулы месяц; праходзіць раз у месяц у бары Nеwmаn); КАІН (стэндап-шоу, якое адбываецца ў клубе «Каёт» раз у некалькі месяцаў).
Але самы цікавы, на маю думку, праект — «Стэндап-Кавярня». Гэта стэндап-шоу на беларускай мове. Праходзіць раз у паўтара месяца ў клубе Jасk Сlub. Арганізавалі яго Яўген Свірыдовіч разам з «Арт Сядзібай». Трэба сказаць, што ахвотных пачуць жарты на роднай мове прыйшло больш, чым гледачоў на рускамоўных імпрэзах.
«Я не разумею дзяўчат, якія, калі пужаюцца, закрываюць вочы рукамі. Для гэтага ёсць вейкі!» (Іван Усовіч)
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.