У Нясвіжы ёсць вуліца з такой простай і блізкай назвай: Агародняя. Каля аднаго з дамоў на вяровачцы сушыцца дзіцячае адзенне і некалькі пар красовак на шнурках. Відаць, тут жыве некалькі хлопчыкаў. І сапраўды, у сям'і Дзямідавых іх чацвёра: Дзіма, Данііл, Яўген, Андрэй — і яшчэ сястрычка Карына.
Я пазнаёмілася з мамай мнагадзетнага сямейства: Святлана Дзямідава ніяк не адпавядае свайму статусу, бо дзявочая постаць, юнацкія іскрынкі ў вачах, чысты і свежы твар нагадваюць юную дзяўчыну. Натуральна, спытала, колькі ёй гадоў.
— Трыццаць, — усміхаецца.
— Проста не верыцца, што ў вас — пяцёра дзяцей!
— Я ў сямнаццаць гадоў выйшла замуж. У маёй мамы нас было трое, а бацька памёр рана, і я дапамагала гадаваць малодшага браціка, рабіла ўсё па гаспадарцы, набывала вопыт свайго будучага сямейнага жыцця.
Відаць, таму і не страшна было Святлане займець пяцёра дзяцей. А яшчэ сагравалі любоў і падтрымка любімага мужа Мікалая. Пазнаёміліся маладыя людзі выпадкова, дзякуючы сябрам (дарэчы, жылі яны тады ў Архангельску). Хлопец як убачыў яе, літаральна з першага погляду і вырашыў: «Гэта мой лёс». На спатканнях Коля іграў на гітары, жартаваў — так хацеў спадабацца. Святлана адказала на пачуцці, і неўзабаве маладыя пабраліся шлюбам. Потым нарадзіўся іх першынец Дзімка. А далей жыццё склалася так, што пераехалі ў Нясвіж, бо тут жыў бацька Мікалая. У 2000-м прыехалі пагасціць, а праз год перабраліся ў прыгожы, зялёны райцэнтр.
— Нам так падабаецца тут, — гаворыць Святлана. — І месцы маляўнічыя, і цёпла, і азёры навокал — словам, усё. Наогул, я палюбіла Беларусь. Гэта цудоўная краіна, а людзі якія працавітыя! Мы жывём у доме Колевага бацькі, рамантуем яго, пашыраем, бо сям'я ж вялікая. Муж пасадзіў маліну каля дома. Нядаўна пасадзілі яблыні і вішні. Агарод буду засяваць, каб мець сваё. Папаўняем запасы ў мясцовых лясах, куды ездзім у ягады і грыбы. Купляем яблыкі і сушым. Нарыхтоўваем бярозавы сок — сёлета ўжо маем 200 літраў.
— Святлана, на мой погляд, вы — мужная жанчына. Мець пяцёра дзяцей — не кожнаму пад сілу.
— Ну, я не лічу гэта мужнасцю. Проста ўпэўнена, што дзеці — дар Божы. І колькі мне дадзена, будзем гадаваць. Я ўжо не ўяўляю іншай сям'і. Гэта мая радасць, шчасце, мой добры лёс.
Як спраўляецца мама з бытавымі цяжкасцямі?
— А іх няма, — весела адказвае Святлана. — Нас многа, і кожны мае свае абавязкі. Старэйшыя дзеці глядзяць малодшых, прыбіраюць у хаце, посуд мыюць, усё, што трэба. Пральная машына выручае.
Старэйшы сын Дзямідавых, Дзіма, важна дадае пра свой уклад у агульныя справы: «Я гляджу сваіх брацікаў і сястрычку, дапамагаю маме: мыю посуд, падлогу, бульбу абіраю. А яшчэ вучуся рабіць лаўкі ў гуртку па дрэве». Значыць, расце мужчына, які не цураецца і хатняй работы. Пэўна, будзе камусьці добры муж, бо ў вялікай сям'і закладваюцца правільныя асновы. Другі сынок, Данііл, не забываецца спытаць дазволу пайсці куды ці што ўзяць (цукеркі, пячэнне) — каб і іншым хапіла. 7-гадовы Жэня вельмі любіць важдацца з бацькавымі інструментамі ў гаражы, падносіць патрэбнае пры рамонце машыны, цікавіцца, як працуюць механізмы. Пяцігадовы Андрэйка таксама адгукаецца на любую маміну просьбу: і ложак сам засцілае, і цацкі збірае.
«Гэта ж у Бібліі сказана: «Навучай юнага ў пачатку шляху яго», — прыгадвае Святлана. — Па вялікім рахунку, інакш і нельга, бо тое, што закладзена ў дзяцінстве, спатрэбіцца ў дарослым жыцці». А яно, як вядома, складанае і нялёгкае. Дарэчы, як у матэрыяльным плане жывецца шматдзетнай сям'і?
— Маем усё неабходнае. Муж працуе індывідуальным прадпрымальнікам, заняты цэлы дзень да вечара, але заробкі нядрэнныя. Я працую ў Нясвіжскім раённым тэрытарыяльным цэнтры сацыяльнага абслугоўвання насельніцтва, але пакуль у дэкрэце, атрымліваю на маленькую Карыну (ёй паўтара года) больш як 2 мільёны рублёў. Нашы тры школьнікі харчуюцца бясплатна, за дзіцячы садок плацім 50 працэнтаў. Да 1 верасня даюць невялікую дапамогу і падручнікі. Стараемся, каб у дзіцячым рацыёне пастаянна была садавіна. Не абыходзіцца і без цукерак — а як жа? Выпякаю пячэнне ці торцікі, люблю пабалаваць сям'ю. У нас традыцыя — адзначаць дні нараджэння так, каб кожнаму запомнілася: з шарыкамі, кветкамі, смачнай выпечкай. Мужу на 35 гадоў дзеці напісалі вялікімі літарамі віншаванне і прызнанне: «Мы цябе любім», а па доме развесілі рознакаляровыя шарыкі. Калі Мікалай прыехаў з работы і ўбачыў усё гэта, ён так узрадаваўся! А нядаўна мне Жэня прынёс першую вясновую кветку. Наогул, мае хлопчыкі любяць дарыць мне кветкі. Магчыма, ад мужа пераймаюць. Ён на святы ці проста ў будны дзень можа ўручыць букет.
«Мужу на 35 гадоў дзеці напісалі вялікімі літарамі віншаванне і прызнанне: «Мы цябе любім», а па доме развесілі рознакаляровыя шарыкі».
— Ну, а хто галоўны ў сям'і?
— Муж. Я лічу, ён павінен быць першым, як мужчына і гаспадар. Не згодна з феміністкамі, што жанчыне трэба кіраваць. Магчыма, дзесьці на рабоце і трэба, а на сямейным «фронце» перавага аддаецца мужчыну. Я прыслухоўваюся да яго думкі, а ён — да маёй, усе спрэчныя пытанні вырашаем мірным шляхам. Калі паспрачаемся (у жыцці ўсё бывае), то каб дзеці не чулі. А яны ў нас прывучаны да дысцыпліны. Добра, што не цягнуцца хлопцы мае да камп'ютара, як многія іх аднагодкі праводзяць за ім шмат часу. Вядома, у свой час навучацца і яны, але без урону для вучобы ці дамашніх спраў. Я рада, што Дзіма займаецца ў баскетбольнай секцыі і ў музычнай школе, іграе на дом-
ры і гітары. Малодшы Данііл вучыцца ў дзіцячай школе мастацтваў, добра малюе.
«Не згодна з феміністкамі, што жанчыне трэба кіраваць. Магчыма, дзесьці на рабоце і трэба, а на сямейным «фронце» перавага аддаецца мужчыну».
Між іншым, мастацкія здольнасці перадаліся Даніку ад мамы. У кухні Дзямідавых вісіць незвычайнае пано: кубак кавы на талерачцы і дымок ад яе. Я не здагадалася, з чаго яно зроблена. Калі гаспадыня зняла яго і паказала, аказалася, што матэрыялам сталі зярняткі кавы, прымацаваныя гарачым клеем. Атрымалася арыгінальна і прыгожа.
Яшчэ адзін выраб, таксама з кавы — кубак, абматаны льнянымі ніткамі, а з яго струменяцца зярняткі. Святлана марыць пра швейную машыну (муж абяцаў падарыць), каб самой зашываць ці падкладваць што трэба. Кажа, што ўсяму можна навучыцца, калі ёсць жаданне і патрэба.
...Літаральна ў сакавіку ў Нясвіжскім палацы Радзівілаў намеснік старшыні абласнога Савета дэпутатаў Іван Ліпніцкі ўручыў 17 прадстаўніцам Міншчыны ордэны Маці і грашовыя прэміі. Ад Нясвіжскага раёна ўзнагароду атрымала Святлана Мікалаеўна Дзямідава, мама пяцярых слаўных дзетак. Яна прызнаецца: маўляў, так хвалявалася, што ледзь заўважыла прыгажосць палацавых залаў, па якіх для ардэнаносных маці наладзілі экскурсію...
Раіса ХВІР.
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.