Вось і скончылася сёлетняя прыёмная кампанія. Разам з агульнымі вынікамі мы можам падвесці і "ўнутрырэдакцыйныя". І яны для нас даволі прыемныя. Дык вось: усе нашы юныя няштатныя аўтары, якія актыўна супрацоўнічалі з "Чырвонкай" цягам апошняга года, сталі студэнтамі! Марачы аб прафесіі журналіста, яны зрабілі першы важны крок у ажыццяўленні сваіх планаў. Мы ведаем, наколькі часам нашым маладым аўтарам было нялёгка, асабліва ў апошнія месяцы: напружаная вучоба, алімпіяды, выпускныя экзамены, цэнтралізаванае тэсціраванне, уступныя экзамены… Паралельна яны пісалі для "Чырвонкі", з большасцю мы практычна ўвесь час былі на сувязі. Усе яны вытрымалі гэты няпросты жыццёвы іспыт, усе аказаліся сапраўднымі байцамі! Шчыра віншуем з паступленнем, будучыя калегі!
Лаўрэат сёлетняга конкурсу "Новы погляд" Таццяна Лауш пасля заканчэння Падгорненскай сярэдняй школы Баранавіцкага раёна стала студэнткай факультэта журналістыкі Гродзенскага дзяржаўнага ўніверсітэта імя Я.Купалы. Удалай сёлета стала спроба і для пераможцы гэтага конкурсу Кацярыны Лясун з вёскі Каменны Барок Бярэзінскага раёна: яна паступіла ў Інстытут журналістыкі БДУ (на здымку).
Разам з ёй, толькі на розных спецыяльнасцях, будуць вучыцца выпускніцы Ліцэя БДУ Кацярына Жорава (таксама лаўрэат конкурсу "Новы погляд"), Ганна Пярова і Ульяна Будзік. Наш самы актыўны аўтар Кацярына Жорава паведаміла нам, што "публікацыі прыёмная камісія захваліла, сказалі, што ні ў каго да мяне не было аналітыкі, адны заметкі-апытанкі". Ганна Пярова напісала, што паступіла на бюджэт без праблем на спецыяльнасць, па якой хацела вучыцца апошнія два гады: "Дзякуй за вялікі вопыт працы з вамі! Камісія вельмі хваліла мае матэрыялы з "Чырвонкі", казала, каб я супрацоўнічала з вамі і далей. Не ведаю, ці хацелі б вы, але мне гэта падабалася, і спадзяюся, што матэрыял, надрукаваны ў "Чырвонцы" 25 ліпеня, будзе не апошні". Ульяна Будзік была другой па выніках паступлення ў спісе абітурыентаў. Яна, як і абсалютна ўсе іншыя нашы аўтары, таксама паабяцала прадоўжыць супрацоўніцтва з "Чырвонкай". "Думаеце, калі паступлю, дык забудуся пра рэдакцыю? А вось і не! І не спадзявайцеся!" — напісала яна яшчэ да таго, як сталі вядомыя канчатковыя вынікі прыёмнай кампаніі.
Дзякуй за добрыя словы! І мы спадзяёмся на наша далейшае супрацоўніцтва з вамі: спачатку як з няштатнымі аўтарамі, а потым — як з практыкантамі. А праз некалькі гадоў, глядзіш, вы станеце нашымі калегамі — штатнымі супрацоўнікамі. Мары павінны збывацца да канца!
Рэдакцыя "Чырвонкі"
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.