Тэма алімпіяды «Расія і Беларусь: гістарычная і духоўная агульнасць». У ёй удзельнічаюць больш за 30 каманд, у складзе якіх — каля 200 чалавек. Сёння яны ўсклалі вянкі і кветкі да Вечнага агню на плошчы Перамогі падчас акцыі «Мы гэтай памяці верныя».
Да юных гасцей з розных куткоў Беларусі і Расіі звярнуўся старшыня аблвыканкама Аляксандр Субоцін: «Віцебская вобласць — адзін з самых маляўнічых куткоў Беларусі, і старажытны Віцебск, яе непаўторная культурная сталіца, з гонарам прымае вас. Вашы намаганні, праца і імкненне да самаразвіцця заслугоўваюць павагі».
Алімпіяда прадугледжвае такія туры, як напісанне сачынення і выкананне комплекснай работы па рускай мове і літаратуры, а таксама конкурсы: рытарычнага майстэрства, выразнага літаратурнага чытання.
На працягу трох дзён падлеткі таксама будуць удзельнічаць у грамадзянска-патрыятычных акцыях. Для іх падрыхтавана насычаная культурна-асветніцкая праграма: экскурсіі па Віцебску і ў Полацк. Да таго ж, яны паглядзяць спектакль у Нацыянальным акадэмічным тэатры імя Якуба Коласа. Будзе час для знаёмстваў і ўстанаўлення асабістых кантактаў па інтарэсах.
