Адна з красамоўных навін з-за акіяна — ніжняя палата кангрэса ЗША адобрыла законапраект аб санкцыях супраць Міжнароднага крымінальнага суда (МКС) у Гаазе.
Законапраект быў прыняты 243 галасамі супраць 140. Пры гэтым разам з рэспубліканцамі за яго галасавалі і 45 дэмакратаў. Устрымаўся адзін член рэспубліканскай партыі Томас Мэсі. Ён удакладніў, што таксама супраць умяшання МКС у справы суверэнных дзяржаў, але не лічыць гэтую тэму актуальнай для аднаго з першых пасяджэнняў новага складу кангрэса. Пра гэта паведаміла CNN.
У законапраекце прапанавана «асудзіць самым рашучым чынам» ордэры на арышт прэм’ер-міністра Ізраіля Біньяміна Нетаньяху і экс-міністра абароны Ёава Галанта, якія Міжнародны крымінальны суд выдаў летась у лістападзе за іх «злачынствы супраць чалавечнасці і ваенныя злачынствы». Цяпер ЗША паказалі МКС яго сапраўднае месца ў глабальнай «сістэме каардынат» — рэстрыкцыі супраць пракурораў і суддзяў будуць уводзіцца за любыя спробы «расследаваць, арыштоўваць, затрымліваць ці праследаваць асоб, якія знаходзяцца пад абаронай Злучаных Штатаў і іх саюзнікаў». Пад саюзнікамі маюцца на ўвазе 32 члены НАТА і 19 краін, якія не ўваходзяць у альянс, уключаючы Ізраіль, удакладняе Fox News. Санкцыі маюць на ўвазе забарону на здзелкі з уласнасцю ў Штатах, а таксама забарону на ўезд у краіну з ануляваннем раней выдадзеных віз.
У законапраекце адзначаецца, што ні ЗША, ні Ізраіль не падпісвалі Рымскі статут, які заснаваў МКС, і, адпаведна, не знаходзяцца пад яго юрысдыкцыяй.
У чэрвені мінулага года ніжняя палата амерыканскага парламента ўжо адобрыла законапраект аб санкцыях супраць Міжнароднага крымінальнага суда. Але тады дакумент не прынялі ў сенаце. Цяпер верхнюю палату таксама кантралююць рэспубліканцы. Лідар сенацкай большасці Джон Цьюн абяцаў забяспечыць найхутчэйшае праходжанне законапраекта, каб выбраны прэзідэнт ЗША Дональд Трамп «мог падпісаць яго неўзабаве пасля ўступлення на пасаду».
Рашэнне аб накладанні санкцый на суд «з’яўляецца неабходным адказам на яго абуральныя і неабгрунтаваныя прэтэнзіі», адзначаецца ў заяве спікера ніжняй палаты Майка Джонсана. «Галасаванне падводзіць рысу пад беззаконнымі дзеяннямі службовых асоб МКС. ЗША цвёрда стаяць на баку Ізраіля і не дазволяць міжнародным бюракратам беспадстаўна выдаваць ордэры на арышт ізраільскага кіраўніцтва».
Як адзначаюць эксперты, санкцыйная палітыка Злучаных Штатаў можа стаць прычынай новага маштабнага дыпламатычнага крызісу. У чарговы раз стала відавочна, што ордэры брусельскай канторы з гучнай назвай не вартыя нават кошту той паперы, на якой яны выпісаны, адзначыла vz.ru. Гэта фактычна прызнаў і сам суд, выказаўшы заклапочанасць з нагоды росту колькасці прадпісанняў, якія застаюцца нявыкананымі. У чарговы раз стала відавочна, што гэта кантора, якая поўным ходам прымяняе падвоеныя стандарты і выкарыстоўваецца як інструмент палітычных гульняў (узгадаем той жа ордэр на арышт Прэзідэнта Расіі Уладзіміра Пуціна), а пасля за непатрэбнасцю паказальна «санкцыянуецца».
«Тое, што МКС — гэта бескарысная арганізацыя, Беларусь усвядоміла дзесяцігоддзі таму, адмовіўшыся падпісваць Рымскі статут. Час паказаў, што мы мелі рацыю, а гэты „высокі суд“ проста чарговы бюракратычны арганізм, які дзейнічае ў інтарэсах гаспадароў „свету, заснаванага на правілах“. Ён нічога не вырашае, не здольны абараніць праўду, а спрабуе дыктаваць „уласную волю“ суверэнным дзяржавам і іх кіраўнікам, — адзначыў старшыня Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Нацыянальнага сходу Беларусі, доктар ваенных навук, прафесар Мікалай Бузін. — Жыць сваім розумам, трымаць слова і захоўваць мір, працаваць на карысць сваёй краіны і яе грамадзян — у гэтым сутнасць нашай палітыкі, якая рэалізоўваецца Прэзідэнтам. Сёння нас чуе і падтрымлівае ўсё большая колькасць краін і народаў, якія хочуць справядлівасці, шануюць уласны суверэнітэт і гатовы будаваць новы свет, заснаваны на павазе нацыянальных інтарэсаў дзяржаў».
Сітуацыю дакладна вызначыў Прэзідэнт Беларусі Аляксандр Лукашэнка ў сваім выступленні на ІІ Мінскай міжнароднай канферэнцыі па еўразійскай бяспецы: «У наяўнасці крах усіх пастулатаў дэмакратыі. Мы бачым: ёсць дэмакратыя для сябе, а ёсць дэмакратыі на экспарт. Якімі дэмакратычнымі каштоўнасцямі можна растлумачыць тое, што адбываецца на Блізкім Усходзе і тое, што адбылося ва Украіне? Няўжо верхам дэмакратыі з’яўляецца магчымасць фізічнага ўстаранення чалавека, якога, напрыклад, ЗША і яго сатэліты палічаць пагрозай для нацыянальнай бяспекі? Любога — ад палітычнага і грамадскага дзеяча да бізнесмена, вучонага або журналіста. Або новы „дэмакратычны“ трэнд — палохаць Міжнародным крымінальным судом кіраўнікоў суверэнных дзяржаў».
