Аўтар фотапраекта «Паспей убачыць» кіраўнік Віцебскага фотаклуба «Старая ратуша» імя С. Юркоўскага, старшыня аддзялення Беларускага саюза фатографаў, супрацоўніца Віцебскага абласнога краязнаўчага музея Таццяна Лабацкая. Адзін з блокаў яе фотавыставы прысвечаны менавіта музейным прадметам, дзе яны выступаюць у якасці натуры. Як адзначыў дырэктар Магілёўскага абласнога краязнаўчага музея імя Е.Р.Раманава Яўген Белавусаў, аказваецца з дапамогай фотаапарата музейную дзейнасць можна пераўтварыць у фотамастацтва. Фотапраект Таццяны Лабацкай — гэта погляд на рэчы адначасова вачамі музейшчыка і фатографа. 

• — Сёлетні год асабліва багаты на плённае супрацоўніцтва з віцебскімі калегамі, — паведаміў Яўген Белавусаў. — У музеі гісторыі Магілёва была магчымасць убачыць выстаўку работ заснавальніка першай у Віцебску мастацкай школы Юдэля Пэна, а мастацкі музей імя П.В.Масленікава запрашаў на выставу віцебскіх мастакоў. На гэты раз мы знаёмімся з фотамастацтвам паўночнага рэгіёна.

Цікавасць да выставы праявілі ўдзельнікі Магілёўскага народнага фотаклуба «Вясёлка».

— З Таццянай мы пазнаёміліся больш года таму, хаця завочна былі знаёмыя і раней, —паведаміла член гэтага фотаклуба, магілёўская фотамастачка Ірына Савосіна. — Ідэя паказаць творчасць віцебскіх фотамастакоў магілёўскаму гледачу ўзнікла, калі я наведала віцебскую Ратушу, паглядзела цудоўны музей і экспазіцыю, прысвечаную знакамітаму фатографу XIX стагоддзя Сігізмунду Юркоўскаму, жыццё якога звязана і з Магілёўшчынай. Вельмі радуе, што кантакт з віцебскім фотаклубам адбыўся. Таццяна наогул таленавіты чалавек і яе выстава цудоўная. Афармленне,эстэтыка падачы фатаграфій — усё гэта вельмі цікава. 

Фотапраект працуе ужо другі год, але па ранейшаму прываблівае ўвагу. Аўтар жартуе, што музейшчыкі заўсёды вельмі трапяткі адносяцца да сваіх скарбаў і яны рэдка пакідаюць сцены сваіх сховішчаў. А тут такая добрая магчымасць ўбачыць гэта багацце. 

— Музейны прадмет цікавы тым, што знаходзіцца не ў кагосьці на кухні, а ў музеі і жадае яшчэ паслужыць людзям, — раскрывае яна сакрэт сваёй задумкі. — Калі гэта ваза, яна марыць, каб у яе паставілі кветкі, калі чайнік, чакае, каб з яго ішла пара ад смачнай гарбаты. Добра было б дапоўніць здымкі арыгіналамі, але музейшчыкі не дазваляюць выносіць іх са сваіх сховішч. Нават здымкі праводзіліся непасрэдна там.

Акрамя музейных прадметаў на выставе можна ўбачыць пейзажы і партрэты. Што датычыцца партрэтаў, то гэта любімы жанр фотамастачкі. На іх твары вядомых людзей і не толькі. Ёсць каларытны здымак нават віцебскага бамжа. Чымсьці нагадвае Будулая з вядомай кінастужкі «Цыган». 

Таццяна Лабацкая працуе музейным фатографам ужо пяць гадоў. Прызнаецца, што прыйшла паглядзець, што ёсць у сховішчах музея, і ... засталася працаваць. Музейная работа захапіла яе так, што цяпер яна нават не ўяўляе сябе без гэтай справы. А яшчэ яна спадзяецца, што з магілёўскімі калегамі ў віцебскага фотаклуба атрымацца зрабіць шмат цікавых сумесных праектаў.

Наведаць фотавыставу Таццяны Лабацкай можна будзе ў магілёўскім музеі этнаграфіі да 26 жніўня.

Фота аўтара