Міжнародны форум СМІ і аналітычных цэнтраў Глабальнага Поўдня праходзіць у горадзе Куньміне, адміністрацыйным цэнтры правінцыі Юньнань. Арганізатарам выступіла інфармацыйнае агенцтва «Сіньхуа». Беларусь на Глабальным форуме прадстаўляе «Звязда».

Прэзідэнт Беларусі Аляксандр Лукашэнка лічыць Глабальны Поўдзень новым сусветным цэнтрам сілы, а Беларусь — яго састаўной часткай. Такое меркаванне беларускі лідар выказаў у інтэрв’ю інфармацыйнаму агенцтву «Сіньхуа» перад Форумам ШАС у Цяньцзіні.

Адно з пытанняў кіраўніку дзяржавы датычылася перспектыў развіцця Глабальнага Поўдня, які становіцца важнай сілай, што садзейнічае пазітыўным змяненням, на фоне такіх выклікаў, як геапалітычная напружанасць і ўзмацненне пратэкцыянізму.

Аляксандр Лукашэнка канстатаваў, што краіны Азіі, Афрыкі і Лацінскай Амерыкі цяпер выходзяць з ценю каланіяльнага мінулага і ўсё больш рашуча заяўляюць пра сябе на сусветнай арэне. «Яны больш не хочуць быць толькі пастаўшчыкамі сыравіны і танных тавараў, а імкнуцца адыгрываць значную ролю ў сусветнай эканоміцы. І гэта правільна. Іх уплыў расце на вачах: эканамічны рост многіх краін Глабальнага Поўдня ўжо апярэджвае развітыя дзяржавы Поўначы, гандлёвыя і фінансавыя цэнтры паступова перамяшчаюцца ў Азію», — адзначыў беларускі лідар.

Ён звярнуў увагу, што краіны Глабальнага Поўдня вырабляюць усё неабходнае — ад сыравіны да высокіх тэхналогій, і таму здольны поўнасцю забяспечваць патрэбнасці сваіх народаў. «Яны аб’яднаны імкненнем да справядлівага і раўнапраўнага свету, дзе ўлічваюцца інтарэсы кожнай дзяржавы, а рашэнні прымаюцца сумесна. Таму мы бачым рост іх актыўнасці, умацаванне існуючых рэгіянальных арганізацый, фарміраванне новых аб’яднанняў і платформ», — адзначыў Прэзідэнт. Такія арганізацыі, як, напрыклад, ШАС, БРІКС, АСЕАН, Афрыканскі саюз, СЕЛАК, даюць магчымасць каардынаваць пазіцыі па ключавых пытаннях на шляху да стварэння альтэрнатыўных інстытутаў глабальнага кіравання.

Аляксандр Лукашэнка падкрэсліў, што краіны Глабальнага Поўдня дзейнічаюць самастойна, зыходзячы са сваіх інтарэсаў. Яны адмаўляюцца ад аўтаматычнага паўтарэння чужых рашэнняў, настойваюць на мірным урэгуляванні канфліктаў, раўнапраўі і адкрытасці ў эканоміцы, выступаюць за ўдзел усіх краін у вырашэнні глабальных праблем, у тым ліку кліматычных. «Гэта сіла ўжо ўплывае на сусветны парадак, і яе роля будзе толькі ўзрастаць. Гэта новы цэнтр сілы», — упэўнены кіраўнік дзяржавы.

«Будучыня развітых краін у многім будзе залежаць ад таго, як хутка яны змогуць прызнаць новую рэальнасць, перастануць жыць па старых догмах і навучацца выбудоўваць раўнапраўныя, узаемапаважлівыя адносіны з Глабальным Поўднем», — заявіў Прэзідэнт.

Беларусь, паводле яго слоў, падзяляе прынцыпы і погляды Глабальнай большасці, лічыць сябе яе састаўной часткай і актыўна ўдзельнічае ў фарміраванні новага сусветнага парадку. «Мы ўвайшлі ў склад ШАС і сталі партнёрам БРІКС з канкрэтнымі прапановамі, якія працуюць ужо і прыносяць вынік. Мы прыйшлі не з пустымі рукамі, а з дакладным парадкам дня, з перспектыўнымі праектамі ў сферах энергетыкі, транспарту, лагістыкі, фінансаў, прамысловай кааперацыі, харчовай бяспекі, гандлю і тэхналогій. А ў далейшым разлічваем на прадаўжэнне плённага ўзаемадзеяння з Кітаем як адным з бясспрэчных лідараў Глабальнага Поўдня і ўсяго свету. Дзеля нашых краін, дзеля нашых народаў», — рэзюмаваў Аляксандр Лукашэнка.

Як падкрэслілі арганізатары, мэта форуму СМІ і аналітычных цэнтраў Глабальнага Поўдня ў Куньміне — стварэнне важнай платформы для медыяарганізацый, аналітычных цэнтраў, дзяржаўных устаноў і прадпрыемстваў з мэтай узмацнення калектыўнага ўплыву Глабальнага Поўдня, яго голасу на сусветнай арэне. У гэтым годзе форум сабраў прадстаўнікоў усіх гэтых сектараў, засяродзіўшыся на тэме «Пашырэнне правоў і магчымасцяў Глабальнага Поўдня, кіраванне глабальнымі зменамі».

На пленарных пасяджэннях форуму пройдуць паглыбленыя абмеркаванні па ключавых тэмах. У прыватнасці, будуць абмяркоўвацца «Адстойванне адзінства, дасягненне кансенсусу — Голас глабальнага Поўдня за мір», «Каардынацыя развіцця, стымуляванне росту — Глабальны Поўдзень на ўздыме», «Умацаванне сувязей, пракладанне новых шляхоў — Сумесная сіла Глабальнага Поўдня», «Аб’яднанне культур, садзейнічанне ўзаемаразуменню — Міжцывілізацыйны дыялог Глабальнага Поўдня».

Падфорумы будуць вывучаць такія найважнейшыя галіны, як глабальныя медыястратэгіі і трансфармацыя на аснове штучнага інтэлекту, захаванне сусветнай спадчыны і напрамкі супрацоўніцтва Поўдзень—Поўдзень. Акрамя таго, дэлегаты возьмуць удзел у спецыяльна арганізаваных паралельных мерапрыемствах і культурных турах, накіраваных на больш глыбокае ўзаемадзеянне і ўмацаванне партнёрскіх адносін.

Правінцыя Юньнань, размешчаная на паўднёвым захадзе Кітая, гэта рэгіён захапляльнага дух разнастайнасці, дзе заснежаныя горы сустракаюцца з трапічнымі лясамі. Гэта стратэгічныя вароты ў Паўднёвую і Паўднёва-Усходнюю Азію, якія адзначаюцца разнастайнасцю этнічных груп, якія жывуць у гармоніі, ствараючы багатую культурную мазаіку. Ад Старога горада Ліцзян, унесенага ў спіс Сусветнай спадчыны ЮНЕСКА, да знакамітых каменных лясоў — цудоўныя пейзажы і культурныя скарбы Юньнані натхняюць на інавацыі і адначасова шануюць традыцыі, што робіць яе ідэальнай пляцоўкай для дыялогу аб перспектывах развіцця Глабальнага Поўдня.

Мікалай ЛІТВІНАЎ