Снег жа сыпаў, не прыпыняючыся ўсю ноч і на наступны дзень. Раніцай у Магілёўскім гарвыканкаме адбылося другое пасяджэнне штаба па ліквідацыі наступстваў НС. На ім кампетэнтныя службы абгаварылі дадатковыя аб’ёмы работ і падключылі да расчысткі суб’екты гаспадарання. Напрыклад, ААТ «Магілёўліфтмаш» дапамагаў у прыборцы вулічных сетак і тратуараў па праспекце Міру.

— Усе службы задзейнічаны на прыборцы і расчыстцы снегу ў поўным аб’ёме, — падкрэсліў першы намеснік старшыні Магілёўскага гарвыканкама Ігар Бушлякоў. — У горадзе працуе больш за 100 адзінак аўтамабільнай тэхнікі і 470 рабочых па прыбіранні і санітарным утрыманні тэрыторый. Галоўны акцэнт зроблены на расчыстку дарог, тратуараў, прыпыначных пунктаў. Наступны этап — вываз снегу, складаванне яго ва ўстаноўленых месцах. 

У пятніцу асобныя сумёты на вуліцах дасягалі некалькіх метраў. Шмат хто з магіляўчан узброіўся рыдлёўкай і расчышчаў завалы — нехта па месцы сваёй работы, нехта каля жылых дамоў.

На гарадскіх аўтадарогах прыкметна паменшылася асабістай тэхнікі, але грамадскі транспарт працаваў, нягледзячы на бесперапынную завею. Парывы ветру даходзілі да 25 метраў у секунду.

Па інфармацыі начальніка Магілёўскага гараддзела па надзвычайных сітуацыях Вячаслава Башарымава, за першыя суткі снегападу ў Магілёве выпала больш чым 24 міліметры ападкаў. 

— Усе неабходныя брыгады працуюць ва ўзмоцненым варыянце нясення службы, жыццезабеспячэнне Магілёва не парушана, — паведаміў ён. — За ноч паступіла 19 паведамленняў, з іх 4 на зняцце незамацаваных канструкцый, два — на аказанне дапамогі сацыяльна неабароненай катэгорыі грамадзян. У адным выпадку адключыўся ацяпляльны кацёл, у другім — у чалавека з інваліднасцю засыпала ўваходныя дзверы. Адразу ж былі прынятыя меры. Былі выезды на аказанне дапамогі аўтамабілістам і некалькі разоў — машыне хуткай медыцынскай дапамогі, якая захрасла ў снезе. 

Галоўны ўрач Магілёўскай цэнтральнай паліклінікі Віктар Алексяйкоў дадаў, што ў начны час у шасці выпадках узнікалі праблемы з пад’ездам да месца пражывання пацыентаў, але выручалі ратавальнікі.

— У выніку ўсе пацыенты наведаны, усім аказана неабходная дапамога, — удакладніў галоўны ўрач. — Хворыя, якіх спатрэбілася шпіталізаваць, дастаўлены ў стацыянарныя ўстановы.

Усе амбулаторна-паліклінічныя ўстановы адкрыты, медыцынская дапамога аказваецца ў поўным аб’ёме. 

У маштабах вобласці на расчыстцы дарог і апрацоўцы іх супрацьгалалёднымі сродкамі ноччу працавалі 226 адзінак тэхнікі камунальных службаў. З 5 гадзін раніцы на барацьбу са снегам выйшлі больш за 900 камунальных работнікаў. 

— Аварыйных сітуацый у рэгіёне не дапушчана, — паведаміў намеснік гендырэктара дзяржаб’яднання «Жыллёва-камунальная гаспадарка Магілёўскай вобласці» Дзмітрый Місюроў. — Асноўныя магістральныя вуліцы пераважна расчышчаны. Першачарговая ўвага надаецца гарадскім маршрутам і пад’язным шляхам да сацыяльных устаноў — бальніц, школ, дзіцячых садкоў.

Па даных РУП «Магілёўэнерга» электразабеспячэнне на працягу неспрыяльных сутак парушалася ў 25 населеных пунктах. Парывы аператыўна ліквідавалі аварыйна-аднаўленчыя брыгады.

На дапамогу магіляўчанам выйшлі валанцёры «Чырвонага крыжа» — яны прапаноўвалі гарачую гарбату і кашу. Адзін з такіх пунктаў абагрэву працаваў у раёне Цэнтральнага рынку. Яшчэ адзін перасоўваўся па горадзе на спецыялізаванай машыне. 

Яшчэ адно назіранне. Улічваючы, што шмат гараджан пакінулі свае аўто дома, рэзка ўзрос попыт на таксі. У час «Ч» кошт на яго паслугі ўзрос у некалькі разоў. 

У пятніцу вобласць працягвала супрацьстаяць стыхіі. У штабе па ліквідацыі наступстваў НС паведамілі, што работы не прыпыняцца нават тады, калі стыхія адступіць. Але наступствы будуць ліквідавацца ўжо ў штатным рэжыме. 

Нэлі ЗІГУЛЯ
Фота аўтара