Старшыня Магілёўскага аблвыканкама Анатоль Ісачанка даў справаздачу па сацыяльна-эканамічным развіцці вобласці і падзяліўся планамі на перспектыву.
Улічваючы важнасць пытання, якое было вынесена на парадак дня XX сесіі аблсавета дэпутатаў, на ёй прысутнічалі члены аблвыканкама, кіраўнікі і супрацоўнікі яго структурных падраздзяленняў, ветэраны органаў дзяржкіравання, сенатары і парламентарыі, дэпутаты, старшыні гар- і райвыканкамаў, кіраўнікі адміністрацый раёнаў горада, прадпрыемстваў, устаноў і арганізацый, грамадскіх аб’яднанняў, палітычных партый. Як адзначыў у пачатку сесіі старшыня Магілёўскага аблсавета Аляксандр Гарошкін, гэта тая тэма, з якой трэба ісці да выбаршчыкаў і на лічбах паказваць, што робіцца ўладай для паляпшэння дабрабыту людзей.
Анатоль Ісачанка падрабязна расказаў, якая работа праведзена па ўсіх кірунках гаспадарчай дзейнасці. Напрыклад, пры заданні пабудаваць 418 тысяч кв. метраў жылля ў мінулым годзе пабудавана 420 тысяч. Толькі арэндных кватэр у вобласці здадзена 1123 — на 100 больш, чым у 2024-м. На трэць болей пабудавана за кошт мясцовых бюджэтаў сацыяльных кватэр — 196.
На рамонт дарог і мастоў з рэспубліканскага і мясцовага бюджэтаў летась выдаткавана больш за 400 мільёнаў рублёў, што дазволіла адрамантаваць 517 кіламетраў мясцовых дарог і 4 масты, а таксама 330 кіламетраў рэспубліканскіх дарог і 8 мастоў. Усяго за пяцігодку адрамантавана 1560 кіламетраў мясцовых дарог — на 23 % больш, чым прадугледжана дзяржпраграмай «Дарогі Беларусі». Сёлета толькі на паляпшэнне якасці дарожнай сеткі ў аграгарадках будзе накіравана 12 мільёнаў рублёў — на чвэрць болей, чым летась.
— Планамерна выконваецца даручэнне Прэзідэнта па забеспячэнні насельніцтва якаснай пітной вадой, — падкрэсліў Анатоль Ісачанка. — За пяцігодку пабудавана 183 станцыі абезжалезвання вады, з іх летась — 66.
Шмат зроблена для скарачэння страт цеплавой энергіі. Толькі за мінулы год было мадэрнізавана і пабудавана 24 кацельні — удвая больш, чым пазалетась. За пяцігодку гэта лічба склала 78.
Анатоль Ісачанка нагадаў, што нязменны прыярытэт развіцця краіны — сацыяльны. На гэту сферу накіроўваецца 70 % выдаткаў бюджэтаў рэгіёнаў.
— Пабудавана шэсць дзіцячых садкоў, тры школы, шэсць дзіцячых дамоў сямейнага тыпу, — паведаміў ён. — Не менш маштабныя планы наперадзе. Працягваецца будаўніцтва школы ў Магілёве, запланавана ўзвядзенне школьнага басейна ў Чэрыкаве, дзіцячага садка — у Мсціславе.
За мінулую пяцігодку на развіццё матэрыяльна-тэхнічнай базы сістэмы аховы здароўя было накіравана каля 1 мільярда рублёў, з якіх 205 мільёнаў — летась. У канцы года ў Магілёве адкрыўся новы сучасны корпус фізічнай і рэабілітацыйнай медыцыны Магілёўскай абласной дзіцячай бальніцы.
За пяцігодку шмат чаго зроблена для турыстычнай сферы. Сярод буйных аб’ектаў — інтэрактыўны Музей Славы Магілёўшчыны, шыкоўны палацава-паркавы комплекс у Жылічах.
— За пяцігодку ў 2,7 раза павялічылася паступленне валюты ад замежных турыстаў, на 10 % узрасла загрузка гасцініц, — рэзюмаваў Анатоль Ісачанка. — Экспарт турыстычных паслуг летась склаў 7,5 мільёна долараў. Гэта найлепшы паказчык за апошнія 20 гадоў.
Рэалізацыя ўсіх праектаў наўпрост залежыць ад напаўняльнасці бюджэту, а значыць стабільнай работы рэальнага сектара эканомікі і прыцягвання інвестыцый.
— За мінулы год у вобласць прыцягнутая 4,8 мільярда інвестыцый — на 10 % болей, чым пазалетась, — паведаміў кіраўнік вобласці. — Гэтаму садзейнічала рэалізацыя 80 інвестпраектаў з аб’ёмам інвестыцый болей як на 750 мільёнаў рублёў. Створана звыш 220 новых працоўных месцаў. Сярод самых буйных і перспектыўных — комплексы па вырошчванні рыб каштоўных парод у Краснапольскім і Хоцімскім раёнах і матачніка па вытворчасці ікры радужнай стронгі ў Чэрыкаўскім раёне, вытворчасць фібрацэментных пліт у Крычаве.
Летась у вобласці было створана імпартазамяшчальнай прадукцыі на 1,1 мільярда долараў. Работа эканомікі дазволіла забяспечыць рост узроўню даходаў насельніцтва. За пяць апошніх гадоў рэальная зарплата вырасла ў вобласці на 47 %, экспарт тавараў павялічыўся ў 1,3 раза, паслуг — у 1,5. Па праграме «Адзін раён — адзін праект» рэалізавана 25 праектаў, створана 1100 новых працоўных месцаў.
Істотны ўклад у прырост ВРП унесла АПК. У мінулым годзе атрыманы валавы збор насення і рапсу ў памеры адзін мільён 404 тысячы тон — на трэць больш, чым пазалетась. У жывёлагадоўлі на 2,7 % павялічылася вытворчасць малака, на 6,8 % — гадоўля свіней, на 1,3 % — птушкі.
— Для выканання задач Кіраўніка дзяржавы аб пастаўках сельгаспрадукцыі на экспарт, у бягучай пяцігодцы плануецца атрымаць каля 400 мільёнаў долараў выручкі, — адзначыў старшыня аблвыканкама. — Разам з традыцыйнымі відамі сельгаспрадукцыі дадасца яшчэ і экспарт прадукцыі рыб каштоўных парод, вытворчасць якіх плануецца павялічыць у шэсць разоў.
Працягваецца мадэрнізацыя жывёлагадоўчага комплексу. Да 2030 года запланавана будаўніцтва і рэканструкцыя 83 жывёлагадоўчых аб’ектаў. У вобласці будзе функцыянаваць 275 МТК з завершаным цыклам вытворчасці. На гэтыя мэты плануецца накіраваць 460 мільёнаў рублёў.
Для рэалізацыі такіх прыярытэтаў, як дэмаграфічная бяспека, развіццё чалавечага патэнцыялу, стварэнне якаснага і зручнага асяроддзя для жыцця, рост канкурэнтаздольнасці, лічбавае і тэхналагічнае развіццё, моцныя рэгіёны, турыстычны патэнцыял, у вобласці сфарміравана і ў бліжэйшы час будзе зацверджана Праграма сацыяльна-эканамічнага развіцця вобласці на пяцігодку. Плануецца рэалізаваць болей за 160 праектаў з планавым аб’ёмам інвестыцый 6 мільярдаў рублёў.
— Ключавая задача на гэты год — забеспячэнне ўстойлівасці эканомікі і рост дабрабыту насельніцтва, — падкрэсліў Анатоль Ісачанка. — Перад вобласцю пастаўлены задачы па забеспячэнні тэмпу росту ВРП 102,9 %, намінальнай налічанай сярэднямесячнай зарплаты — 112,6 %, інвестыцый — 102,9 %. Для прыцягвання інвестыцый сёлета запланавана рэалізацыя 115 праектаў на 5,4 мільярда рублёў.
Нэлі ЗІГУЛЯ
Фота аўтара
