У Кітаі ў ліпені агульны аб’ём рознічных продажаў спажывецкіх тавараў, асноўны паказчык спажывецкага патэнцыялу краіны, дасягнуў 3,88 трлн. юаняў, што на 3,7 працэнта вышэй за паказчык аналагічнага перыяду мінулага года. Пра гэта паведамі ў Дзяржаўным статыстычным упраўленні КНР, перадае «Сіньхуа».

Сёлета за 7 месяцаў гэты паказчык вырас на 4,8 працэнта ў гадавым вылічэнні і дасягнуў 28,42 трлн юаняў. Праграма пакупкі спажывецкіх тавараў па схеме трэйд-ін працягнула аказваць стымулюючы эфект на рынак. Згодна са статыстыкай, продажы бытавой тэхнікі і аўдыёвізуальнага абсталявання ў буйных рытэйлераў выраслі на 28,7 працэнта ў гадавым вылічэнні, а рэалізацыя мэблі павялічылася на 20,6 працэнта.

Анлайн-розніца заставалася дынамічным сегментам: яе аб’ём вырас на 9,2 працэнта ў гадавым вылічэнні. Продажы фізічных тавараў праз інтэрнэт павялічыліся на 6,3 працэнта, склаўшы амаль чвэрць ад агульнага аб’ёму рознічных продажаў.

Спажыванне паслуг таксама расло стабільнымі тэмпамі: рознічныя продажы ў гэтым сектары за 7 месяцаў выраслі на 5,2 працэнта ў гадавым вылічэнні. Як заявіў прадстаўнік Дзяржаўнага статыстычнага упраўлення КНР Фу Лінхуэй, у сферах турыстычнага кансалтынгу і арэнды, транспартных паслуг, а таксама паслуг у галіне культуры, спорту і вольнага часу быў зафіксаваны двухзначны рост рознічных продажаў.

Фу Лінхуэй падкрэсліў, што дзяржаўная палітыка садзейнічае пашырэнню спажывання і фарміраванню новых пунктаў росту, аднак папярэдзіў, што знешнія нявызначанасці і абмежаванні ўнутранай пакупніцкай здольнасці прадаўжаюць ствараць выклікі.

Як падкрэсліў прадстаўнік Дзяржаўнага статыстычнага упраўлення КНР, у перспектыве будуць прыняты меры для далейшай рэалізацыі мэтавых ініцыятыў па стымуляванні спажывання, культывавання новых драйвераў росту ў сферы паслуг, удасканалення спажывецкага асяроддзя і забеспячэння стабільнага развіцця.