— У ходзе рэалізацыі першага этапу праекта напрыканцы мінулага года на тэрыторыі аўтавакзала і дыспетчарскай станцыі «Падкасцельцы» былі пабудаваны дзве зарадныя станцыі для адначасовай зарадкі двух электробусаў на кожнай, — расказаў дырэктар філіяла «Аўтатранспартнае прадпрыемства № 6 г. Наваполацка» ААТ «Віцебскаблаўтатранс» Іван Рашчынскі. — Адначасова горад атрымаў пяць першых электробусаў мадэлі Vіtovt ІІ вытворчасці «Белкамунмаша».
Па заказе новапалачан вытворцы паставілі ў горад нафтавікоў электробусы асабліва вялікай умяшчальнасці, так званыя «гармонікі», каб спраўляцца з вялікім пасажырапатокам у гадзіны пік, калі работнікі накіроўваюцца на работу ў прамысловую зону і адтуль дадому. Тэхнічным заданнем была прадугледжана хуткая зарадка, каб за 4-6 начных гадзін акумулятары зараджаліся поўнасцю і электробусы цэлы дзень маглі працаваць на лініі, здзяйсняючы не меней за 200 км прабегу.
У першым квартале бягучага года справіліся з рэалізацыяй другога этапу праекта. Увялі ў экплуатацыю яшчэ 10 электразарадных станцый на асноўнай пляцоўцы вытворчай базы аўтатранспартнага прадпрыемства. Адначасова яно ўзбагацілася на 21 электробус.
Цяпер 26 новенькіх блакітных электрамашын, а гэта больш за чвэрць усяго рухомага саставу, бегаюць паміж Наваполацкам і Полацкам, па маршрутах да найбуйнейшых прадпрыемстваў горада — ААТ «Нафтан» і завода «Палімір». Гэта істотна палепшыла якасць жыцця гараджан.
Важна, што ўвасабленне пілотнага праекта станоўча ўплывае на экалогію горада, зніжэнне забруджвання паветра і аздараўленне гарадскога асяроддзя. Павелічэнне долі электрычных пасажырскіх перавозак адлюструецца на выкарыстанні асабістага аўтатранспарту: паменшае машын на стаянках каля прахадных. А чаму б і не скарыстацца новым грамадскім транспартам?
Ён прадугледжвае высокі ўзровень камфорту для пасажыраў: наяўнасць сістэм кандыцыянавання і ацяплення, адсутнасць выхлапных газаў, таніраванае шкло. У салоне 38 сядзячых месцаў, павялічана колькасць месцаў для пажылых пасажыраў, уладкаваны дзве пляцоўкі для размяшчэння дзіцячых і інвалідных калясак. Усталявана відэаназіранне, кнопкі для сувязі з вадзіцелем і прыпынку па запатрабаванні, ёсць магчымасць безнаяўнага разліку за праезд.
З пункту гледжання кіравання электробусам ёсць пэўныя адрозненні ад аўтобусаў ранейшых гадоў выпуску. Рухавік у новых машынах размешчаны ў хвасце і штурхае задні мост прычэпа, па такім жа прынцыпе працуюць сучасныя аўтобусы на вуглевадародным паліве. Першых вадзіцеляў, якія перасаджваліся за руль электробусаў, накіроўвалі на стажыроўку ў мінскія транспартныя паркі. Яны ж пазней стажыравалі таварышаў на месцы. Кіроўцы адзначаюць, што электробусы больш дынамічныя, хутчэй развіваюць хаду, вылучаюцца манеўранасцю, плаўныя і бясшумныя.
Праўда, не паўсюдна маршрутная сетка і ўмовы эксплуатацыі дазваляюць выкарыстоўваць электробусы, якія вельмі патрабавальныя да якасці дарог. Ёсць прыгарадныя і дачныя маршруты, на якія выпускаць электробусы нерацыянальна па прычынах малога пасажырапатоку і вялікай працягласці маршрутаў. Для забеспячэння работы на іх новых машын патрабаваліся б дадатковыя, даволі цяжкія, акумулятары. Да таго ж з-за сваёй габарытнасці «блакітныя» маюць павышаныя патрабаванні да пляцовак развароту. Дарэчы, над іх прывядзеннем у адпаведнасць стандартам папрацавала само аўтатранспартнае прадпрыемcтва і тыя ж «Нафтан» і «Палімір».
— Зрабіўшы значны прарыў у развіцці электратранспарту, мы не заспакойваемся, — працягвае Іван Рашчынскі. — Планава аднаўляем дызельны аўтапарк: сёлета атрымалі 13 аўтобусаў вытворчасці ААТ «Мінскі аўтамабільны завод». Чакаем яшчэ адзін. Гэты транспарт набыты ў лізінг за кошт сродкаў абласнога бюджэту. Усё дзеля таго, каб нашым людзям жылося лепей.
Святлана ЯКАЎЛЕВА
Фота аўтара
