— Абрад «Цягнуць каляду на дуб» быў адноўлены, дзякуючы шчырай зацікаўленасці людзей і падтрымцы мясцовай улады, — паведаміла Жанна Ачыновіч. — Работнікі Каўбчанскага сельскага клуба, этнаграфічнае аб’яднанне «Вераценца», творчы калектыў раённага Дома культуры пастаянна адраджаюць абрады і традыцыі. Прыемна, што ў гэтым актыўна дапамагаюць не толькі мясцовыя жыхары, але і неабыякавы да жыцця сваёй вёскі старшыня Каўбчанскага сельвыканкама Дзмітрый Міхайлавіч Рамановіч.

Сёлета абрад прайшоў весела і дынамічна, як было і ў ранейшыя часы. Праз увесь населены пункт цягнулі на санках «бабку» з куццёй, спяваючы калядныя песні з традыцыйнымі словамі: «Ай, калядачкі, а на дуб, на дуб...». Гулянне прадоўжылася ў сельскім клубе, дзе ўсе дружна спявалі мясцовыя песні і ладзілі традыцыйныя танцы. 

— Было бачна, што гэта не проста забава ці гістарычная рэканструкцыя, а моцны матыватар, які здольны прывабіць людзей у вёску, — адзначыла Жанна Ачыновіч. — 

Людзі адчуваюць сувязь з месцам, дзе яны жывуць, і з тымі, хто знаходзіцца з імі побач. Шанцы на тое, што моладзь застанецца ці нават вернецца, значна ўзрастаюць. З’яўляецца цікавасць да абрадаў, гісторыі сваёй сям’і, роду, вёскі, што ў сваю чаргу ўмацоўвае нацыянальную і культурную ідэнтычнасць. Аднаўленне традыцый робіць жыццё ў вёсцы больш насычаным, цікавым і адметным ад гарадскога. І абрад «Цягнуць каляду на дуб» у Коўбчы — сімвал таго, што традыцыі могуць стаць жывым пульсам вёскі. Гэта шлях да моцных і прывабных для жыцця вёсак, дзе кожны адчувае сябе часткай вялікай і багатай гісторыі.

Нэлі ЗІГУЛЯ