Знойдзеныя магільні з’яўляюцца часткай руін «Чанчунь» і размешчаны на тэрыторыі павета Фупін горада Вэйнань. Раскопкі тут пачаліся ў жніўні 2022 года і праводзяцца сумесна Інстытутам археалогіі правінцыі Шэньсі, Музеем горада Вэйнань і Упраўленнем культуры і турызму павета Фупін.

Археолагі таксама знайшлі пяць ям з пахаваннямі вазоў і коней.

Малодшы навуковы супрацоўнік Інстытута археалогіі правінцыі Шэньсі Лі Яньфэн паведаміў, што магільні можна падзяліць на чатыры катэгорыі ў залежнасці ад іх марфалагічных асаблівасцяў. Дзве з іх адносяцца да ліку пахаванняў адносна высокага класа. Падчас раскопак тут было знойдзена больш за 300 артэфактаў, уключаючы прадметы з медзі, нефрыту, каменя і ракавінак, а таксама лакаваныя вырабы. З іх асабліва вытанчанымі з’яўляюцца нефрытавыя падвескі з узорамі ў выглядзе чалавека і дракона, каменныя гонгі.

У невялікіх магільнях выкарыстоўваліся толькі адзіночныя труны і адсутнічалі бронзавыя артэфакты. Даследчыкі знайшлі ў іх толькі гліняныя пасудзіны і ўпрыгожванні з ракавінак, дзякуючы чаму была зроблена выснова аб тым, што ўладальнікі магільняў, магчыма, былі прасталюдзінамі.

Па словах Лі Яньфэна, параўнаўшы характарыстыкі формы керамічных і бронзавых вырабаў і правёўшы даследаванне чалавечых касцей з выкарыстаннем метаду датыроўкі па вугляроду-14, археолагі вызначылі, што астанкі ў раёне раскопак могуць адносіцца да эпохі ад сярэдняга да позняга перыяду дынастыі Заходняя Чжоу (1046 г. да н. э. — 771 г. да н. э.). «Хоць магілы адрозніваюцца па рангу, яны размешчаны ўпарадкавана, што адлюстроўвае асаблівасці «радавых пахаванняў» і «цэнтралізаванай сістэмы грамадскіх могілак», — адзначыў Лі Яньфэн.