Камунальныя, дарожныя службы, а таксама энергетыкі, дзяржаўтаінспекцыя, падраздзяленні МНС працуюць у рэжыме 24/7. Так, камунальшчыкі вобласці задзейнічаюць на прыборцы снегу больш за 500 адзінак тэхнікі; прадпрыемства «Віцебскаўтадар», адказнае за ўтрыманне дарог рэспубліканскага значэння, — каля 270 адзінак тэхнікі, столькі ж — прадпрыемства «Віцебскаблдарбуд», якое абслугоўвае дарогі мясцовага значэння. 

На аператыўнай нарадзе, праведзенай старшынёй аблвыканкама Аляксандрам Субоціным, абмеркавалі арганізацыю работ па ліквідацыі наступстваў цыклону. Першаступенныя задачы: бесперабойная расчыстка ад снегу дарог і вуліц, яго прыборка ў населеных пунктах, уключаючы аддаленыя; забеспячэнне руху транспарту па ўсёй дарожнай сетцы вобласці; аператыўнае аднаўленне энергазабеспячэння арганізацый і дамоў. Старшыня аблвыканкама заклікаў мабілізаваць усе тэхнічныя і чалавечыя рэсурсы на барацьбу са снежнай стыхіяй. Дарэчы, штабы па барацьбе з наступствамі надзвычайных сітуацый, якія ўзначальваюць старшыні гаррайвыканкамаў, працуюць ва ўсіх раёнах. Для зручнай сувязі паміж іх удзельнікамі створаны спецыяльныя групы і чаты ў месенджарах. 

Аб’яўлены аранжавы ўзровень небяспекі нясе такія з’явы, як падзенне дрэваў, парушэнне электразабеспячэння, абрыў ліній сувязі і электраперадачы, абрушэнне канструкцый і дахаў, зніжэнне бачнасці, цяжкасць руху транспарту, павелічэнне верагоднасці дарожна-транспартных здарэнняў і выпадкаў траўматызму. 

Сапраўды, надзвычайныя сітуацыі ўжо склаліся. Так, па стане на 9.00 вяліся работы па аднаўленні электразабеспячэння ў 23 населеных пунктах вобласці. Энергетыкі працуюць у складанейшых умовах надвор’я, праводзяць аператыўныя пераключэнні, спажыўцоў засілкоўваюць па рэзервных схемах электразабеспячэння. 

Тройчы за ноч падраздзяленні МНС выязджалі для аказання тэрміновай дапамогі: у Бешанковіцкім раёне на дарогу ўпала дрэва, пад Новалукомлем у гурбе засела машына хуткай дапамогі, а ў віцебскім мікрараёне Руба давялося буксіраваць аўтобус. 

Адбыўся парыў паветраапорнай мембраны футбольнага манежа ЦСК «Віцебск». Зараз там прыпынены трэніроўкі, прынята рашэнне спускаць мембрану для правядзення яе рамонту. 
Па інфармацыі прэс-службы ДАІ, на тэрыторыі вобласці ўведзены спецыяльны план «Надвор’е». Па стане на 13.00 9 студзеня ўсплёску аварый у параўнанні са звычайнымі днямі не назіраецца. ДТЗ, у якіх пацярпелі б людзі, не зафіксаваны. Супрацоўнікі дзяржаўтаінспекцыі аказвалі дапамогу мікрааўтобусу, які з’ехаў у кювет, і яго давялося выцягваць на дарогу. Да ведама: у Telegram створаны рэспубліканскі чат-бот МУС «Мы заўжды побач», куды можна звярнуцца па дапамогу. Асноўная нагрузка ДАІ зараз звязана з суправаджэннем калон спецыялізаванай тэхнікі, якая расчышчае дарогі, іх вызваленнем ад прыпаркаваных машын, якія замінаюць выкананню работ. Адзначаецца змяншэнне на аўтатрасах і гарадскіх вуліцах ліку аўтамабілістаў-аматараў: яны абачліва пакінулі свае аўтамабілі на парковачных месцах. 

Актыўную дапамогу профільным арганізацыям аказваюць прадпрыемствы ўсіх формаў уласнасці, прадастаўляючы тэхніку, расчышчаючы снег не толькі на сваіх тэрыторыях, але і прылеглыя дарожкі, прыпыначныя пункты. Так, раніцай толькі ў Віцебску на дапамогу камунальным службам накіравана З0 адзінак тэхнікі. З энтузіязмам далучыліся да «снежных дэсантаў» прафсаюзы, а Чырвоны Крыж гатовы арганізаваць пункты абагрэву. Хаця асноўная нагрузка па вызваленні са снежнага палону дамоў адзінокіх і адзінока пражываючых вяскоўцаў кладзецца на супрацоўнікаў сацыяльнай службы, звярнуцца па дапамогу можна на «гарачыя лініі» райкамаў БРСМ. З усіх куткоў вобласці прыходзяць навіны аб тым, што прадстаўнікі грамадскіх арганізацый, проста жыхары змагаюцца са снегам. 

— Тое, што валанцёры атрада «Добрае сэрца» Талочынскай СШ № 1 імя Ф. Макавецкага расчысцілі двор адзінокай жыхарцы аграгарадка Друцк, інваліда 1-й групы Людмілы Рабцавай, для іх — проста размінка на свежым паветры, а для яе — знак таго, што яна не кінутая сам-насам са сваёй бядою, — паведаміла першы сакратар Талочынскага райкама БРСМ Ірына Фёдарава. — Аб’яднацца падчас складаных абставін — гэта не лозунг, а прынцыповая пазіцыя нашай арганізацыі. Будзем дзейнічаць так і надалей. Заклікаем усіх жыхароў Віцебшчыны азірнуцца і дапамагчы таму, каму горш, каму не справіцца з гурбамі ў адзіночку. 

Святлана ЯКАЎЛЕВА, 
фота з адкрытых крыніц.