Колькасць аб’ектаў зараднай інфраструктуры для электрамабіляў у Кітаі працягвала імкліва расці. Да канца лютага гэтага года агульная колькасць такіх зарадных прылад дасягнула 21 млн адзінак, што амаль напалову (на 47,8 працэнта) больш у гадавым вылічэнні. Пра гэта сведчаць звесткі Дзяржаўнага ўпраўлення па справах энергетыкі КНР, перадае «Сіньхуа».
Сярод гэтых прылад — звыш 4,8 млн аб’ектаў грамадскага карыстання, што на 28,8 працэнта больш у гадавым вылічэнні. Колькасць прыватных зарадных установак склала звыш 16,1 млн адзінак, што на 54,6 працэнта больш у гадавым вылічэнні. Гэта сведчыць аб значным росце попыту на такія зарадныя прылады ў населеных пунктах.
Гэтыя даныя, апублікаваныя на нацыянальнай платформе маніторынгу і абслугоўвання зараднай інфраструктуры, падкрэсліваюць пашырэнне сеткі падтрымкі электрамабіляў у Кітаі на фоне рэзкага росту продажаў такіх транспартных сродкаў.
Паводле даных Кітайскай асацыяцыі аўтавытворцаў, у мінулым годзе вытворчасць транспартных сродкаў на новых крыніцах энергіі ў краіне набірала абароты: вытворчасць і продажы склалі звыш 16,6 млн і каля 16,5 млн адзінак адпаведна, павялічыўшыся на 29 працэнтаў і 28,2 працэнта ў гадавым вылічэнні.
У кастрычніку мінулага года Кітай апублікаваў трохгадовы план дзеянняў па паляпшэнні зараднай інфраструктуры для электрамабіляў у краіне, накіраваны на стварэнне да канца 2027-га агульнанацыянальнай сеткі з 28 млн зарадных прылад агульнай магутнасцю больш за 300 млн кВт.
