Так званая «інфантыльная эканоміка», пра якую гавораць «для школьнікаў занадта наіўна, а дарослых — у самы раз», набірае абароты ў Кітаі, увасабляючыся ў самых разнастайных формах.

Тая прадукцыя, якая калісьці лічылася эксклюзіўнай для дзяцей, паступова выйшла за рамкі ўзроставых абмежаванняў і ператварылася ў эмацыянальныя носьбіты для прадстаўнікоў пакалення Z (народжаныя ў перыяд 1995-2009 гг.). Яна здольная напаўняць іх «унутранае дзіця» радасцю і здымаць сапраўдную трывогу.

Для многіх кітайскіх падлеткаў ранішняя дылема «якую мяккую цацку сёння ўзяць з сабой» даўно стала важней за выбар адзення. Гэтыя, здавалася б, простыя бірулькі для сумак ператварыліся ва ўнікальную мову самавыяўлення і новы драйвер «інфантыльнай эканомікі».

У краме MINISO LAND, размешчанай на адной з пешаходных вуліц горада Гуанчжоу (адміністрацыйны цэнтр правінцыі Гуандун, Паўднёвы Кітай), гэта тэндэнцыя відавочная: уся сцяна аддадзена пад калекцыю падвесак — ад класічных персанажаў з такіх вядомых франшыз, як «Hello Kitty» і «Гары Потэр», да такіх папулярных персанажаў, як «Чыікава» і герояў мультфільма «Звераполіс 2». Пакупнікі, у асноўным моладзь, запоўнілі ўсе праходы. Хтосьці ледзь трымае ў руках дзясяткі рэчаў у чаканні сваёй чаргі ў касы. Цэны вар’іруюцца ад дзясяткаў да сотняў юаняў, але запал ва ўсіх аднолькавы.

Паводле даных апытанняў, праведзеных даследчым інстытутам пры кампаніі электроннай камерцыі «Цзындун» (Jingdong), больш за 80 працэнтаў рэспандэнтаў маюць свае маленькія цацкі. Больш за тое амаль 70 працэнтаў апытаных маюць звычку насіць з сабой плюшавыя падвескі, а іх галоўнай матывацыяй з’яўляецца пачуццё суцяшэння, якое яны адчуваюць ад погляду і дакранання да іх.

«Гэта не проста ўпрыгожванні, а мабільныя рэгулятары настрою і візуальныя носьбіты ідэнтычнасці моладзі», — тлумачыць віцэ-прэзідэнт і дырэктар па маркетынгу MINISO LAND Лю Сяабінь.

Паводле яго слоў, на падвесныя аксесуары і ўпрыгожванні зараз прыпадае звыш 35 працэнтаў усяго асартыменту мяккіх цацак MINISO LAND, а летась агульны аб’ём продажаў гэтай катэгорыі прадукцыі перавысіў 12 млн штук.

Гэта захапленне ў роўнай ступені заўважнае і ў інтэрнэце. У папулярным дадатку сацыяльнай сеткі Сяахуншу (Rednote) хэштэг «Усё можна павесіць на сумку» набраў больш за 130 млн праглядаў, а хэштэг «Дарослыя таксама хочуць гуляць у цацкі» — 25,5 млрд праглядаў. Карыстальнікі сеткі ахвотна дзеляцца сваімі стратэгіямі падбору персанажаў і «сацыялізуюцца» праз агульнае замілаванне да вызначаных персанажаў.

«Кожны вечар перад сном я кажу сваёй лабубу „дабранач“. Яна — мой самы надзейны спадарожнік, калі я вяртаюся дадому з працы. Я не ўспрымаю яе як цацку. Яна дапамагае мне расслабіцца», — заявіла 30-гадовая Сяавэнь, якая летась купіла 23 розныя плюшавыя цацкі і калекцыйныя фігуркі персанажаў, патраціўшы на гэта ў сярэднім больш за 1200 юаняў у месяц.

Намеснік кіраўніка Шанхайскага даследчага цэнтра адкрытай стратэгіі Чжан Цзюань адзначыла, што рост эмацыянальнага спажывання сярод моладзі невыпадковы, яго сутнасць заключаецца ў павышэнні духоўных патрэб пасля задавальнення матэрыяльных. Маладыя людзі гатовы плаціць за «эмоцыі» не толькі ў сувязі з павышэннем узроўню сваіх даходаў, але і з прычыны патрэбнасці ў расслабленні, вольным часе і іншых забаўках.

У адрозненне ад «пустышкі» ў грамадскім успрыманні, «пустышка для дарослых», заснаваная на канцэпцыі дзіцячых пустышак, цалкам мадэрнізаваная па матэрыяле, дызайне і выкарыстанні, каб задавальняць патрэбнасці дарослых у самазаспакаенні і зняцці трывогі. Такі прадукт нават спалучаецца з упрыгожваннямі ў выглядзе бранзалетаў, ператвараючы іх з «асабістых рэчаў» у партатыўныя модныя аксесуары.

Згодна з «Дакладам аб даследаванні стану сну ў Кітаі за 2025 год», узровень парушэнняў сну сярод людзей ва ўзросце 18 гадоў і старэйшых у Кітаі дасягнуў 48,5 працэнта. А такія «пустышкі» якраз кропкава ўздзейнічаюць на патэнцыяльныя праблемы ў людзей з высокім ціскам, такія як начны скрыгат зубамі і перадсонная трывога, набіраючы папулярнасць сярод моладзі.

У «Аналізе спажывецкіх тэндэнцый інфантыльнай эканомікі за 2025 год» гаворыцца, што колькасць абмеркаванняў дадзенай тэматыкі ў сацсетках павялічылася на 26 працэнтаў у гадавым вылічэнні, што сведчыць аб значным патэнцыяле росту і высокай актыўнасці карыстальнікаў. У ім таксама адзначаецца, што такая эканоміка з’яўляецца не проста вяртаннем да дзіцячых паводзін, а мадэллю эмацыянальнага спажывання, абумоўленай рознымі псіхалагічнымі патрэбамі.

Навуковы супрацоўнік даследчага інстытута электроннай камерцыі пры Міністэрстве камерцыі КНР Хун Юн падкрэсліў, што развіццё новай спажывецкай сферы сведчыць аб павышэнні ўзроўню сацыяльна-эканамічнага развіцця і разнастайнасці поглядаў спажыўцоў на лад жыцця. Гэта не толькі дае спажыўцам больш магчымасцяў выбару, але і спараджае шэраг новых прадпрыемстваў і рыначных магчымасцяў.

Сюй Сіньюэ, асістэнт-прафесар інстытута культурных індустрыі Шэньчжэньскага ўніверсітэта, лічыць, што пакаленне Z надае больш увагі самавыяўленню. З павышэннем узроўню спажывання і паглыбленым развіццём інфантыльнай эканомікі спажывецкія тавары, якія выклікаюць эмоцыі, прадоўжаць станавіцца важнай часткай жыцця маладых людзей.