Кітайскай паліцыі з 2025 года ўдалося затрымаць больш за 880 падазраваных ва ўчыненні эканамічных злачынстваў, якія хаваліся за мяжой пасля выкрыцця, у іх ліку — 38 уцекачоў, якія трапілі пад дзеянне «Чырвонага апавяшчэння» Інтэрпола. Пра гэта паведамілі ў Міністэрстве грамадскай бяспекі (МГБ) КНР, перадае «Сіньхуа».
Аперацыі па затрыманні былі праведзены ў перыяд з 2025 года па канец красавіка 2026-га падчас «Палявання на ліс» — спецыяльнай кампаніі, ініцыяванай МГБ КНР з 2014 года з мэтай затрымання меркаваных эканамічных злачынцаў, якія ўцяклі за граніцу.
За адпаведны перыяд, як расказаў кіраўнік Аператыўна-вышуковага бюро па эканамічных злачынствах Міністэрства грамадскай бяспекі Хуа Лебін, праваахоўнікі раскрылі 128 тысяч спраў аб эканамічных злачынствах і вярнулі ў дзяржаўную казну 37,5 мільярда юаняў. У прыватнасці, былі раскрыты больш за 1600 спраў, звязаных з выкарыстаннем афшорных кампаній і ценявога банкінгу для перамяшчэння за мяжу атрыманых злачынным шляхам сродкаў, нанесены ўдар па больш чым 100 міжрэгіянальных падпольных банкаўскіх сетках.
МГБ раскрыла падрабязнасці пра 20 тыповых выпадкаў, звязаных з эканамічнымі злачынствамі. Гэта незаконная прадпрымальніцкая дзейнасць, адмыванне грошай, падробка грашовых знакаў, атрыманне страхавой кампенсацыі або вяртанне падаткаў падманным шляхам і іншыя злачынствы.
