Снег, завіруха, вецер як наступствы цыклону Улі зрабілі ўрачыстае мерапрыемства, якога чакалі цэлы год, да якога рыхтаваліся, яшчэ больш атмасферным і рамантычным.

— У гады нашага дзяцінства, маладосці зімы бывалі менавіта такімі, — дамы і кавалеры ўваходзілі ў святочную залу ў прыўзнятым настроі, — але гэта не замінала нам бегаць на вучобу і работу, на сустрэчы з сябрамі і на спатканні да каханых. Няўжо нас, загартаваных і прагных да жыцця, спужае нейкі цыклон?

У напоўненай святлом і ўсмешкамі зале рэстарана «Паўночная сталіца», быццам спецыяльна прызначанай для пышных баляў, панавалі музыка і танцы. Настрой стваралі прафесіяналы з Віцебскай абласной філармоніі, юныя артысты з розных устаноў культуры і адукацыі і самі ўдзельнікі мерапрыемства. Здавалася, яны скінулі дзясяткі гадоў з плеч, выконвалі не толькі класічныя, але і жартаўлівыя нумары, многія з якіх рэпеціравалі загадзя з харэографамі. 

— У многіх нашых ТЦСАНах працуюць харэаграфічныя гурткі і аматарскія клубы, — патлумачыла намеснік старшыні камітэта па працы, занятасці і сацыяльнай абароне насельніцтва аблвыканкама Вера Астапенка. — Для іх удзельнікаў калядны баль становіцца своеасаблівай творчай справаздачай, нездарма сёння мы бачым вальсы, бачату, танцавальныя кампазіцыі пад сучасныя рытмы і нават канкан! 

Адметная рыса «Каляднай сімфоніі» на Віцебшчыне тое, што гэта міжпакаленчы баль. Разам з прадстаўнікамі залатога ўзросту ў ім удзельнічае моладзь, каб вучыцца ўзаемадзейнічаць, заўважаць адно ў адным самае лепшае і прыгожае. 

Святлана ЯКАЎЛЕВА
Фота з адкрытых крыніц