Як адзначыў кіраўнік дыпламатычнай місіі, кітайска-беларускія адносіны прайшлі праз 34-гадовы неардынарны шлях развіцця. «Пад стратэгічным кіраўніцтвам Старшыні Сі Цзіньпіна і Прэзідэнта Аляксандра Лукашэнкі двухбаковыя адносіны вытрымалі выпрабаванні міжнароднай турблентнасцю і ўступілі ў найлепшы перыяд у гісторыі, — падкрэсліў Чжан Вэньчуань. — Аляксандр Лукашэнка нядаўна здзейсніў паспяховы візіт у Кітай. Кіраўнікі дзвюх краін правялі важную сустрэчу, на якой намецілі новыя перспектывы развіцця двухбаковых адносін. Старшыня Сі Цзіньпін заявіў, што паглыбленне ўсепагоднага і ўсебаковага кітайска-беларускага супрацоўніцтва адпавядае тэндэнцыям гістарычнага развіцця і карэнным інтарэсам народаў дзвюх краін. Кітай і Беларусь павінны падтрымліваць стратэгічныя кантакты і прасоўваць бесперапыннае развіццё двухбаковых адносін на высокім узроўні і прыносіць больш карысці народам дзвюх краін. Прэзідэнт Аляксандр Лукашэнка выказаў гатоўнасць нарошчваць стратэгічнае ўзаемадзеянне з Кітаем, пашыраць напрамкі супрацоўніцтва і забяспечваць далейшае развіццё двухбаковых адносін».

Пасол адзначыў, што ў 2026-м Прэзідэнт Беларусі Аляксандр Лукашэнка падпісаў новую Дырэктыву аб развіцці беларуска-кітайскіх адносін, якая задала новыя арыенціры для супрацоўніцтва. «У 2025 годзе агульны аб’ём гандлю паміж Кітаем і Беларуссю ўжо склаў больш за 8,8 мільярда долараў. У першым паўгоддзі 2026-га адзначаецца вялікі прырост. Таму цалкам верагодна, што сёлета ў нас будзе новы рэкорд гандлю паміж Кітаем і Беларуссю — узаемадзеянне пашыраецца і паглыбляецца ва ўсіх галінах», — канстатаваў Чжан Вэньчуань.

Супрацоўніцтва Беларусі і КНР з’яўляецца ўзорам узаемнага даверу, павагі і падтрымкі, адзначыў першы намеснік Прэм’ер-міністра Мікалай Снапкоў. «У Кітаі кажуць, што калі карані глыбокія, дрэва не баіцца ветру. За больш як векавую гісторыю Камуністычная партыя Кітая даказала, што менавіта трывалыя каштоўнасныя асновы, стратэгічнае бачанне і адзінства народа дазваляюць краіне ўпэўнена рухацца наперад, пераадольваючы любыя выпрабаванні», — падкрэсліў Мікалай Снапкоў.

Кітайская цывілізацыя на працягу тысячагоддзяў вучыла бачыць перспектыву далей за адно пакаленне. «Менавіта таму сённяшнія дасягненні Кітая — гэта не выпадковы поспех, а заканамерны вынік паслядоўнага руху, дзе кожны новы этап абапіраецца на досвед папярэдняга. Сёння ўвесь свет уважліва назірае за тым, як Кітай упэўнена рэалізуе курс на ўсебаковае будаўніцтва моцнай сучаснай сацыялістычнай дзяржавы», — звярнуў увагу першы намеснік Прэм’ер-міністра.

Мікалай Снапкоў сказаў, што Беларусь шчыра радуецца поспехам свайго ўсепагоднага і ўсебаковага стратэгічнага партнёра. «Нашы адносіны з’яўляюцца ўзорам узаемнага даверу, павагі і падтрымкі. Яны паслядоўна развіваюцца дзякуючы стратэгічнаму кіраўніцтву Прэзідэнта Беларусі Аляксандра Лукашэнкі і Старшыні Кітайскай Народнай Рэспублікі Сі Цзіньпіна», — выказаў упэўненасць першы віцэ-прэм’ер.

У чэрвені гэтага года лідары дзвюх дзяржаў зноў сустрэліся ў Пекіне. «Гэта сустрэча стала не проста важнай падзеяй двухбаковага парадку дня, а чарговым пацвярджэннем таго, што беларуска-кітайскія адносіны захоўваюць асаблівую дынаміку і стратэгічную глыбіню, — лічыць Мікалай Снапкоў. — Менавіта асабісты давер Аляксандра Лукашэнкі і Сі Цзіньпіна прадаўжае задаваць высокую планку ўсяму комплексу супрацоўніцтва».

«Нашы краіны падзяляюць перакананне, што сапраўднае партнёрства будуецца не на кан’юнктуры, а на ўзаемнай павазе і даверы. Упэўнены, што супрацоўніцтва будзе і ў далейшым умацоўвацца, уносячы важкі ўклад у развіццё эканомік дзвюх краін, дабрабыт народаў і фарміраванне справядлівага шматпалярнага свету. Прынятая сёлета новая Дырэктыва аб практычным напаўненні ўсепагоднага і ўсебаковага стратэгічнага партнёрства Рэспублікі Беларусь і Кітайскай Народнай Рэспублікі, правядзенне гадоў прамысловай кааперацыі, рэалізацыя буйных інвестыцыйных праектаў з’яўляюцца сімваламі таго, як задачы лідараў дзяржаў становяцца асновай супрацоўніцтва і ператвараюцца ў рэальныя вытворчасці, тэхналогіі, працоўныя месцы і новыя магчымасці для будучых пакаленняў», — падкрэсліў першы намеснік Прэм’ер-міністра.

Ён пажадаў Кітайскай Народнай Рэспубліцы далейшага працвітання, Камуністычнай партыі Кітая міру, дабрабыту і далейшага ўмацавання абараназдольнасці дзяржавы. «Няхай сяброўства паміж Беларуссю і Кітаем, праверанае часам і агульнымі справамі, становіцца мацнейшым за год ад году, а нашы народы нязменна захоўваюць мір, дабрабыт і ўпэўненасць у заўтрашнім дні», — рэзюмаваў Мікалай Снапкоў.

Вельмі важны аспект — паглыбленне супрацоўніцтва ў сферы забеспячэння бяспекі. Як адзначыў аташэ па пытаннях абароны пры пасольстве КНР у Беларусі Лю Чжэ, цяпер міжнародная абстаноўка перажывае найбольш складаныя і глыбокія змяненні з часоў заканчэння Другой сусветнай вайны. «Ва ўмовах вайны ў многіх краінах і рэгіёнах „закон джунгляў“ сур’ёзна падарваў міжнароднае права, што яшчэ больш абвастрыла глабальныя праблемы бяспекі, — падкрэсліў аташэ па пытаннях абароны. — На гэтым фоне Старшыня Сі Цзіньпін вылучыў чатыры асноўныя ініцыятывы — па глабальным развіцці, глабальнай бяспецы, глабальнай цывілізацыі і глабальным кіраванні, актыўна садзейнічаючы фарміраванню супольнасці адзінага лёсу чалавецтва, прапанаваўшы кітайскі падыход да вырашэння глабальных выклікаў і пабудовы больш справядлівага і раўнапраўнага міжнароднага парадку. Кітайскія вайскоўцы актыўна ўвасабляюць гэтыя канцэпцыі ў жыццё праз канкрэтныя дзеянні, падаючы міжнароднай супольнасці сродкі забеспячэння грамадскай бяспекі, такія як міжнародныя міратворчыя аперацыі, канваіраванне суднаў у акіяне і гуманітарная дапамога».

Як заявіў аташэ па пытаннях абароны, «мы з задавальненнем адзначаем, што ваенныя сувязі паміж Кітаем і Беларуссю ўвесь час пашыраюцца і паглыбляюцца. Кітайскія ўзброеныя сілы гатовы сумесна з беларускімі ўзброенымі сіламі актыўна рэалізоўваць важныя дамоўленасці кіраўнікоў дзвюх краін, бесперапынна ўмацоўваць стратэгічны дыялог, узбагачаць змест супрацоўніцтва, удасканальваць механізмы абменаў і выводзіць міжармейскія адносіны на новы ўзровень».

Міністр абароны Віктар Хрэнін падкрэсліў значнасць супрацоўніцтва Беларусі і Кітая, ён заўважыў, што паміж нашымі краінамі няма закрытых тэм ва ўзаемадзеянні. «Беларусь высока цэніць адносіны ўсепагоднага і ўсебаковага стратэгічнага партнёрства і ўзаемавыгаднага супрацоўніцтва з Кітаем, — заявіў Віктар Хрэнін. — Падкрэслю, што ваеннае і ваенна-тэхнічнае супрацоўніцтва з’яўляецца адным з іх найважнейшых складнікаў». Міністр абароны адзначыў, што надзейным фундаментам для развіцця супрацоўніцтва ў ваеннай сферы застаюцца сяброўства, узаемаразуменне і давер, якія склаліся гістарычна.

Мікалай Літвінаў
Фота Яўгена Пясецкага