Гэта стала вядома ў выніку жараб’ёўкі, якая адбылася напярэдадні, а ўжо сёння канкурсанты будуць спяваць песні славянскіх аўтараў. Першай на сцэну выйдзе Віўен Эльтс з Эстоніі. Заўтра, у другі дзень юныя артысты выканаюць саўндтрэкі з папулярных фільмаў і мультфільмаў у суправаджэнні Нацыянальнага акадэмічнага канцэртнага хора Беларусі імя Міхаіла Фінберга. Завершыць конкурсную праграму выступленне Барбі — Барбарэ Маргошыі з Грузіі.
Брастаўчанка Лізавета Цупрык выканае твор беларускага кампазітара Валерыя Шмата «Мой дом» і саўндтрэк да мультфільма «Чараўнік краіны Оз» Over The Rainbow.
Для абсалютнай большасці дзяцей спевы з аркестрам — першы ў жыцці вопыт. Як і далёкае падарожжа ў краіну, дзе дагэтуль не бывалі.
— Я яшчэ вельмі мала бачыла, але заўважыла, што ў Беларусі любяць дзяцей, усе добразычлівыя і прадбачлівыя да нас, — падзялілася першымі ўражаннямі аб Сінявокай Карла Балог з Харватыі. — У вас чыста, многа прыгожых помнікаў, краявідаў, дрэў і кветак. Хочацца паглядзець Віцебск, горад «Славянскага базара», пра які я так шмата чула, пабліжэй.
Канкурсанты з 19 краін размаўляюць на розных мовах, але пасля вызначэння сваіх парадкавых нумароў дружна, з усмешкамі і танцамі праспявалі негалосны гімн фестывалю «Васільковае лета». Пры гэтым здавалася, што энергіі ў іх — праз край.
— Так, дарога была доўгая, больш за 4,5 тысячы кіламетраў ад майго роднага Бішкека да Віцебска, але я пераважна спаў, таму і не стаміўся, — непасрэдна пасмяяўся Алімхан Муратаў з Кыргызстана. — Я спяваю з дзяцінства, прыкладна з трох гадоў, зараз мне 13. Думаю, спаборнічаць буду найперш з хлопцамі, нас усяго трое, акрамя мяне, Давідэ Гураджы з Італіі і Цзыду Гао з Кітая. Мы прыкладна равеснікі. Будзем весці сябе з дзяўчатамі па-мушкецёрску, а хто стане лепшым — вырашыць журы.
Старшыня журы — заслужаная артыстка Расійскай Федэрацыі Ілона Бранявіцкая — заўважыла, што перад імі стаіць няпростая задача, бо заўсёды складана ацэньваць дзяцей. Яна параіла канкурсантам нічога не баяцца і ўсвядоміць, што днямі будзе ацэнена іх творчая форма толькі на бягучы момант. Яны юныя, знаходзяцца ў стартавай кропцы далейшага росту і развіцця — а далей магчыма ўсё, варта толькі захацець.
— Галоўнае, за чым я прыехала на «Славянскі базар», — гэта ўражанні, — адзначыла Кіра Абрамаў з Ізраіля. — Мама вучыць, што трэба быць адкрытай свету, тады ён адкажа ўзаемнасцю. Так хораша знаёміцца з дзецьмі з розных куткоў зямлі, сябраваць, спяваць! Сёння я проста радуюся такой магчымасці.
Святлана ЯКАЎЛЕВА
