Мерапрыемства прысвечана 80-годдзю Перамогі ў Вялікай Айчыннай вайне. Яго стартам стане мітынг на мемарыяльным комплексе «Буйніцкае поле». Подзвіг герояў будзе ўшанаваны хвілінай маўчання, а на гранітныя пліты лягуць жывыя кветкі. Рабяты наведаюць нядаўна створаны ў Буйнічах музей Славы Магілёўшчыны, дзе даведаюцца пра гераічнае мінулае Прыдняпроўскага краю.

— Фестываль збярэ больш за 150 байцоў студэнцкіх атрадаў, ветэранаў руху, ганаровых госцей і жыхароў горада, — паведамілі ў Магілёўскім абкаме БРСМ. — На ім моладзь будзе ўспамінаць подзвіг нашых прадзедаў, дэманстраваць свае таленты, спаборнічаць у конкурсах і зараджаць усіх прысутных сваёй энергетыкай. Гэта свята патрыятызму, моладзі і студэнцкага братэрства. 

Пасля Буйніч фестываль працягнецца ў цэнтры Магілёва на адкрытай пляцоўцы каля кінатэатра «Чырвоная Зорка». Праграма пачнецца з традыцыйнага гімна беларускіх студэнцкіх атрадаў і ўзняцця флагаў. Далей каманды пакажуць на што яны здольныя ў конкурснай праграме «Запальвае студатрад». Моладзь будзе пець, танцаваць, паказваць тэатральныя замалёўкі, дэманстраваць свае візітоўкі. Завершыцца творчае свята вячэрнім кінапаказам на вялікім экране пад адкрытым небам.