У Гомелі ўзнагародзілі пераможцаў конкурсу «Энергамарафон»

У Гомельскім абласным грамадска-культурным цэнтры прайшла ўрачыстая цырымонія ўзнагароджання пераможцаў і прызёраў XVII рэспубліканскага конкурсу «Энергамарафон». Яго фіналістамі сталі 164 удзельнікі, якія прадставілі 70 устаноў адукацыі рэспублікі. Пераможцаў вызначылі ў шасці намінацыях і шэрагу паднамінацыі.

Ацаніць усю разнастайнасць і крэатыўнасць праектаў у сферы энергазберажэння і энергаэфектыўнасці можна было на традыцыйнай выставе конкурсных работ. 

На тое, што з кожным годам расце папулярнасць конкурсу, узровень падрыхтоўкі праектаў і творчых работ, звярнулі ўвагу на цырымоніі ўзнагароджання пераможцаў і прызёраў. Удзельнікаў урачыстага мерапрыемства прывіталі намеснік старшыні Дзяржаўнага камітэта па стандартызацыі Рэспублікі Беларусь — дырэктар Дэпартамента па энергаэфектыўнасці Віталь Крэцкі і начальнік Галоўнага ўпраўлення адукацыі Гомельскага аблвыканкама Руслан Смірноў.

— Конкурс прывівае дзецям культуру энергаспажывання. Мы імкнемся рыхтаваць спецыялістаў у гэтай галіне, пачынаючы з дзіцячага сада. Упэўнены, што, пасталеўшы, яны зоймуць кіруючыя пасады і ў далейшым прападзе неабходнасць прымаць узмоцненыя меры ў галіне эканомнага і рацыянальнага выкарыстання рэсурсаў, — адзначыў Віталь Крэцкі.

Так, у 17-ы раз усіх неабыякавых да праблем энергазберажэння і энергаэфектыўнасці навучэнцаў і педагогаў сабраў рэспубліканскі конкурс «Энергамарафон». Кожны год у ім бяруць удзел больш за тры з паловай тысячы чалавек з амаль 500 устаноў адукацыі краіны. 17 гадоў правядзення конкурсу — гэта ўнікальны назапашаны вопыт педагагічнай і кіраўніцкай дзейнасці ў сферы энергазберажэння і экалогіі, выхавання культуры энергаспажывання сярод дзяцей і моладзі.

Лепшыя праекты канкурсантаў рэалізуюцца ў рамках мерапрыемстваў па энергазберажэнні.

— Прыемна бачыць, з якім імкненнем і адказнасцю ў нашым конкурсе бяруць удзел прадстаўнікі педагагічных калектываў, а таксама выхаванцы і навучэнцы ўстаноў адукацыі з усіх рэгіёнаў нашай краіны, — падзякаваў Віталь Крэцкі. Па яго словах, кожны конкурсны праект і работа дэманструюць вялізную ўкладзеную працу, творчы пошук дзяцей і педагогаў, іх шчырае імкненне стаць лепшымі.

Словы віншавання прагучалі ў адрас пераможцаў і прызёраў. Так, у намінацыі «Мастацкая работа па прапагандзе эфектыўнага і рацыянальнага выкарыстання энергарэсурсаў» вызначаны лідар ў паднамінацыі «Відэаролік». Ім стаў «Гомельскі дзяржаўны абласны Палац творчасці дзяцей і моладзі» за работу — «Спадчына і энергазберажэнне». Першыя месцы у паднамінацыях «Улётка; плакат; малюнак» занялі ўдзельнікі конкурсу з дзіцячага сада № 52 Віцебска «Івушка», навучэнцы гімназія № 51 Гомеля і Магілёўскага дзяржаўнага электратэхнічнага каледжа. 

У намінацыі «Сістэма адукацыйнага працэсу і інфармацыйна-прапагандысцкай работы ў сферы энергазберажэння ва ўстанове адукацыі» лепшай прызнана творчая работа гімназія № 4 Віцебска.

У намінацыі «Праект практычных мерапрыемстваў па энергазберажэнні, энергаэфектыўнасці і аднаўляльнай энергіі» за праект «Самазараджальны электрамабіль» першае месца атрымаў навучэнец Магілёўскага дзяржаўнага электратэхнічнага каледжа.

У намінацыі «Культурна-відовішчнае мерапрыемства па прапагандзе эфектыўнага і рацыянальнага выкарыстання энергарэсурсаў» — першае месца на рахунку дзіцячага сада № 14 Светлагорска.

У намінацыі «Гейміфікацыя ў энергазберажэнні» журы конкурсу вызначыла пераможцаў адразу ў трох паднамінацыях: за лепшыя дыдактычную, настольную і камп’ютарную гульні.

У апошняй намінацыі «Лепшы педагагічны работнік па арганізацыі работы па выхаванні культуры рэсурса- і энергазберажэння ў навучэнцаў» першае месца прызначана Магілёўскаму дзяржаўнаму электратэхнічнаму каледжу, а другое — Гомельскаму абласному цэнтру тэхнічнай творчасці дзяцей і моладзі.

Падчас урачыстай цырымоніі ўзнагароджання пераможцаў быў уручаны пераходны вымпел конкурсу. У наступным годзе права і гонар прымаць XVIII рэспубліканскі конкурс «Энергамарафон» прадастаўлена Магілёву.

Наталля КАПРЫЛЕНКА

Фота Андрэя ФЕАКЦІСТАВА