Рэгістрацыя на ЦЭ стартуе 20 сакавіка. Мінадукацыі нагадвае, як ён будзе праходзіць

Рэгістрацыя для ўдзелу ў цэнтралізаваным экзамене стартуе 20 сакавіка, паведамілі ў прэс-службе Міністэрства адукацыі.

Рэгістраваць школьнікаў для ўдзелу ў ЦЭ будуць з 20 сакавіка па 5 красавіка, рэгістрацыя на ЦТ пройдзе з 9 па 22 красавіка. «У гэтым годзе ЦТ і ЦЭ пройдуць у адзіныя тэрміны для ўсіх — і для выпускнікоў 2024 года, і для тых, хто скончыў школу ў мінулыя гады. Так, 27 мая адбудзецца ЦЭ для 11-класнікаў па прадмеце па выбары і адначасова ЦТ для выпускнікоў мінулых гадоў па аднаму з двух профільных прадметаў — уступных экзаменаў у ВНУ на выбар абітурыентаў.ЦЭ для 11-класнікаў і адначасова ЦТ для выпускнікоў мінулых гадоў па беларускай або рускай мове пройдзе 30 мая (мова выбірае абітурыент).ЦТ па другім з двух профільных прадметаў — уступных экзаменаў у ВНУ на выбар абітурыентаў адбудзецца 3 і 6 чэрвеня. Такое выпрабаванне павінны здаць усе, хто будзе паступаць у ВНУ ў 2024 годзе», — расказалі ў прэс-службе ведамства.

Рэгістрацыю навучэнцаў 11-х класаў для ўдзелу ў ЦЭ будуць праводзіць установы агульнай сярэдняй адукацыі. Зарэгістравацца на ЦТ можна ў 40 пунктах анлайн праз асабісты кабінет удзельніка.

«Што датычыцца новаўвядзенняў гэтага года, то змяніўся час прыбыцця навучэнцаў у пункты правядзення ЦЭ — ён скарочаны да 30 хвілін, раней выпускнікі абавязаны былі прыбываць за гадзіну. Таксама з новага — ЦЭ пройдзе ў будні, а не ў нядзелю, як летась. Акрамя таго, рэзервовымі днямі ЦЭ па вучэбных прадметах па выбары вызначаны даты правядзення ЦТ у рэзервовыя дні, іншыя тэрміны — 19 жніўня. Рэзервовымі днямі для ЦЭ па беларускай мове або рускай мове стануць даты правядзення ЦТ у рэзервовыя дні, іншыя тэрміны — 21 жніўня. Захаванымі засталіся рэзервовыя дні для ЦТ — гэта 19, 21 і 23 чэрвеня», — праінфармавалі ў адукацыйным ведамстве.

Прэв’ю: БелТА