Вось вам і вясна. На гэтым тыдні яна адступіць і нават пахаладае, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды. Снег будзе ісці нават днём. А ў свой час люты быў і насамрэч цёплы і даваў надзею на цёплую раннюю вясну. Нягледзячы на тое, што на календары — сакавік, у кліматычных адносінах гэты месяц усё ж такі яшчэ застаецца зімовым, таму для яго характэрна неаднаразовая змена надвор’я, у тым ліку і вяртанне маразоў.
А ў аўторак будзе яшчэ сонечна і адносна цёпла. Раніцай чакаюцца ападкі ў выглядзе дажджу і мокрага снегу. Днём, з ростам фону атмасфернага ціску, у большасці раёнаў абыдзецца ўжо пераважна без ападкаў. Толькі месцамі па захадзе краіны, дзе яшчэ будзе адбівацца ўплыў актыўнага франтальнага падзелу, месцамі пройдуць невялікія дажджы. Уначы і раніцай у асобных раёнах магчымыя слабыя туман, галалёд, на дарогах галалёдзіца. Тэмпература паветра днём 2–8 цяпла, па паўднёвым захадзе паветра прагрэецца да плюс 11 градусаў.
У далейшым характар надвор’я пачне змяняцца. Наша краіна апынецца пад уплывам антыцыклону з цэнтрам над Скандынавіяй. Пры гэтым па яго перыферыі ў краіну пачне паступаць больш халодная паветраная маса. Тэмпературны фон панізіцца, і ў начныя гадзіны ў асноўным будзе знаходзіцца ў межах ад нуля да мінус 7 градусаў. Толькі ў ноч на сераду, 6 сакавіка, на паўднёвым захадзе мінімальныя значэнні складуць плюс 1–2 градусы. А з чацвярга да суботы пры ўмове працяглых праясненняў не выключана паніжэнне і да мінус 10 градусаў.
У сераду будзе пераважна без ападкаў. Ноччу і раніцай на асобных участках дарог галалёдзіца. Тэмпература паветра ўначы складзе ад нуля да мінус 6 градусаў, па паўднёвым захадзе — 1–2 цяпла. Днём будзе ад мінус 1 да плюс 6 градусаў. Не будзе ападкаў і ў чацвер. Тэмпература паветра ўначы складзе 1–7 градусаў марозу, месцамі — да мінус 10 градусаў. Днём будзе ад нуля да 6 цяпла.
Прагназуецца без дажджу ў пятніцу і суботу. 8 сакавіка тэмпература паветра ўначы складзе 1–7 марозу, месцамі — да мінус 10 градусаў. Днём будзе ад нуля да плюс 7 градусаў. Паводле папярэдніх прагнозаў айчынных сіноптыкаў, у выхадныя да холаду дададуцца і зімовыя ападкі. Напрыклад, у суботу тэмпература паветра ўначы складзе ад нуля да мінус 6 градусаў, месцамі — да мінус 9 градусаў. Днём 1–8 цяпла.
У нядзелю франтальны раздзел, які ссоўваецца з боку Польшчы, унясе карэктывы. Кароткачасовыя ападкі ў выглядзе снегу, мокрага снегу і дажджу пройдуць месцамі па тэрыторыі краіны. Ноччу і раніцай на асобных участках дарог галалёдзіца. Тэмпература паветра ўначы складзе ад мінус 5 да плюс 2 градусаў, пры праясненнях — да 8 марозу. Днём ад нуля да плюс 7 градусаў, па поўдні і паўднёвым захадзе — да 10 цяпла.
Сяргей КУРКАЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.