Лядовы палац, узведзены па даручэнні Прэзідэнта Беларусі, 31 студзеня адкрыты ў Светлагорску. Наваселле ў шматфункцыянальным спартыўным будынку адзначылі матчам дзіцячых каманд Гомельскай і Бранскай (Расія) абласцей.
Сучасны спартыўны палац — доўгачаканая падзея не толькі для жыхароў буйнога райцэнтра, але і спартыўнага асяроддзя Гомельшчыны ў цэлым. У лядовым палацы ў Светлагорску цяпер ёсць магчымасць актыўна развіваць хакей з шайбай і фігурнае катанне.
Гонар палаца — лядовая арэна — класічная канадская пляцоўка памерам 60 на 26 метраў. Для яе абслугоўвання комплекс аснашчаны сучасным халадзільным абсталяваннем, сістэмай кандыцыяніравання, электроннымі лёдазалівачнымі камбайнамі. Сёння ў палацы прыняты на працу штатны трэнер, які праводзіць набор юных хакеістаў. Яны ўжо пачалі падрыхтоўку. Ёсць перспектывы і для культывіравання ў раёне фігурнага катання.
Між тым у палацы будуць праходзіць і спартыўна-масавыя мерапрыемствы, спаборніцтвы, аздараўленчыя і вучэбна-трэніровачныя заняткі. Дарэчы, на лядовай арэне арганізуюць і масавае катанне на каньках для ўсіх ахвотных: прадугледжаны пакоі для захоўвання, завострывання, сушкі і выдачы канькоў.
У палацы акрамя лядовай арэны размясцілася залы харэаграфіі, акрабатыкі, адпрацоўкі кідкоў, навучальны клас, трэнерскія і судзейскія пакоі, раздзявалкі для спартсменаў, а таксама трэнажорная зала плошчай 180 «квадратаў».
Ва ўрачыстай цырымоніі адкрыцця новага спартыўнага аб’екту ў Светлагорску прынялі ўдзел старшыня Гомельскага аблвыканкама Іван Крупко і губернатар Бранскай вобласці Аляксандр Багамаз. Кіраўнікі беларускага і расійскага рэгіёнаў асабіста апрабавалі магчымасці і абсталяванне кідковага пакоя палаца.
— Сёння ў спартыўнай гісторыі Светлагорска адкрылася новая цікавая старонка. Горад атрымаў для развіцця зімовых відаў спорту сучасную лядовую арэну, — павіншаваў жыхароў і гасцей райцэнтра старшыня Гомельскага аблвыканкама Іван Крупко.
Як падкрэсліў кіраўнік рэгіёну, адкрыццё чаканага спартыўнага аб’екта дапаможа рыхтаваць перспектыўных спартсменаў, ігракоў прафесійных каманд. Лядовы палац — выдатная магчымасць карысна і цікава праводзіць час усім ахвотным аматарам здаровага ладу жыцця.
Павіншаваў жыхароў Гомельшчыны і губернатар Бранскай вобласці Расіі Аляксандр Багамаз. Па словах кіраўніка расійскага рэгіёна, сімвалічна, што самыя маленькія хакеісты Гомельскай і Бранскай абласцей першымі апрабавалі лёд новенькай светлагорскай арэны. Тут прайшоў сяброўскі матч паміж дзіцячымі камандамі беларускага і расійскага рэгіёнаў.
— Я як балельшчык і мы ўсе хваляваліся, балелі. Гэта была годная гульня дзвюх каманд, — падзяліўся ў размове з журналістамі губернатар Бранскай вобласці. — Самае галоўнае, заўжды падкрэсліваю, што хлопцы, якія сёння гулялі — гэта будучыня нашых краін. Гэта не толькі хакеісты — гэта і будучыя кіраўнікі раёнаў, абласцей, будучыя міністры, прэзідэнты, магчыма. Тое, што мы закладвае разам, каб як мага болей згуртоўваць нашых дзяцей — у нас працуе шмат праграм сярод школьнікаў, каля ста мерапрыемстваў мы правялі за мінулы год — каб дзеці і спаборнічалі, і сябравалі потым па жыцці.
Каб прывітаць жыхароў горада і павіншаваць з адкрыццём лядовага палаца ў Светлагорск з хакейнай камандай прыехаў намеснік старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці Дзмітрый Баскаў. Ён падзяліўся, што без сумненняў Светлагорск абяцае стаць хакейным цэнтрам прыцягнення.
— І ў наступны раз мы прыедзем сюды ўжо глядзець на мясцовых дзяцей, якія будуць радаваць нас сваімі перамогамі. Бо пабудаваць лядовы палац — адно, а насыціць яго жыццём — зусім іншае. Перакананы, што ў жыхароў, кіраўніцтва горада гэта атрымаецца, — адзначыў Дзмітрый Баскаў.
Парламентарый у чарговы раз нагадаў, наколькі значная ўвага надаецца сацыяльнай дзяржаўнай палітыцы ў нашай краіне.
— Будаўніцтва такога роду аб’ектаў — у тым ліку яе неад’емная частка, неабходная для развіцця новага пакалення беларусаў. Давайце ўзгадаем пачатак двухтысячных гадоў, калі па даручэнні Прэзідэнта пачалі будаваць лядовыя палацы. Сёння мы бачым тое пакаленне беларусаў з розных рэгіёнаў, якія трапляюць у лепшыя каманды НХЛ, вялікую колькасць дзяцей, якія выігрываюць міжнародныя спаборніцтвы, — падкрэсліў Дзмітрый Баскаў.
Між тым сёлета на Гомельшчыне плануецца справіць наваселле шэрагу спартыўных комплексаў — узводзяцца стадыёны ў гарадскім пасёлку Карма, у Нароўлі, запланавана адкрыццё ўнікальнага для рэгіёна палаца гульнявых відаў спорту ў Мазыры.
Наталля КАПРЫЛЕНКА
фота ТК «Гомельшчына афіцыйна»
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
