Новы фармат сацыяльных зносін у Кітаі — «дацзы»

«Маўклівая, не парушаю асабістыя межы, гатовая падзяліць рахунак і разам пафатаграфаваць стравы», — такая кароткая, але ёмістая самапрэзентацыя з’явілася пад пастом у папулярнай кітайскай сацыяльнай сетцы RED, дзе карыстальнікі шукалі партнёраў для сумеснага абеду. Больш за восемсот каментарыяў пад гэтым пастом паказваюць шалёную папулярнасць новага фармату сацыяльных узаемаадносін у Кітаі — кампаньёны або «дацзы», перадае «Жэньмінь жыбаа» анлайн».

«Дацзы» — гэта людзі, якія разам удзельнічаюць у розных мерапрыемствах. Ад партнёра па кубачку кавы да партнёра для сумесных заняткаў спортам і нават партнёра па разбітым сэрцы, разам з якім можна палегчыць горыч растання з каханым чалавекам — кітайская моладзь лічыць, што падзяліць з кампаньёнам можна абсалютна ўсё. Імгненны зарад энергіі і эфектыўнае змаганне з адзінотай — шматлікія кітайцы знаходзяць фармат зносін «дацзы» найболей зручным у сучасным грамадстве.

У той жа час «дацзы» мае на ўвазе захаванне пэўнай сацыяльнай дыстанцыі. «Неўмяшанне ў асабістую прастору» — асноўнае правіла. Калі маладыя людзі шукаюць сабе кампаньёна, яны звычайна паведамляюць узрост і для якіх мэт, уласна, яны шукаюць партнёра. На астатнюю асабістую інфармацыю пры пошуку «дацзы» існуе табу. Эксперты адзначаюць, што акцэнт на дакладных межах — характэрная рыса сацыяльных узаемаадносінаў сучаснай моладзі. Раней уласцівая кітайскаму культурна-генетычнаму коду рыса «ўсе свае» і эмацыйная згуртаванасць паступова пачынаюць знікаць.

Пошук «дацзы» становіцца неад’емнай патрэбай у сучасным грамадстве, якое пастаянна змяняецца. З аднаго боку, маладыя людзі, якія жывуць у буйных гарадах, увесь час сутыкаюцца з пераездамі і зменай месца працы, што бесперапынна руйнуе стабільныя сацыяльныя сувязі, заснаваныя на доўгатэрміновых зносінах. З іншага боку, распаўсюджванне інтэрнэту і рост папулярнасці сацыяльных сетак даюць магчымасці для з’яўлення новых сацыяльных сувязяў.