Як выконваецца даручэнне Прэзідэнта навесці парадак у жывёлагадоўлі Гомельшчыны

Кіраўніком дзяржавы год таму перад вобласцю была пастаўлена задача навесці парадак у жывёлагадоўлі. «Даручэнні былі дадзены генеральнаму пракурору, міністру ўнутраных спраў і адказнаму за Гомельскую вобласць. Увесь гэты час мы маніторылі сітуацыю на малочнатаварных комплексах. Было шмат бязладзіцы, падзёж жывёлы і інш. Сёння трэцяя нарада падобнага роду, дзе мы будзем канстатаваць, што ёсць станоўчыя змены. Мы сёння назіраем зніжэнне падзяжу, а таксама рост пагалоўя БРЖ на 6,1 тысячы галоў», — адзначыў пракурор Гомельскай вобласці Віктар Марозаў на нарадзе па пытаннях АПК у паўднёва-ўсходнім рэгіёне.

Пракурор Гомельскай вобласці прывёў таксама прыклады з афіцыйнай статыстыкі. Так, з 61 узбуджанай крымінальнай справы па прыпісках няма фактаў 2023 года. «Усе прыпіскі — мінулых гадоў. Гэта сведчыць аб тым, што мы пераламалі псіхалогію нашых кіраўнікоў, ёсць разуменне аб тым, што прыпіскі — гэта дзеянні, якія крымінальна караюцца. Думаю, у тым плане будзе менш крымінальных спраў. Дала эфект і прафілактычная работа. Гучныя працэсы, якія праходзілі ў прысутнасці кіраўнікоў гаспадарак, выязныя судовыя пасяджэнні мелі выхаваўчае значэнне», — акцэнтаваў увагу ён.

Разам з тым Віктар Марозаў акрэсліў, што яшчэ шмат працы наперадзе.

Каардынацыйны савет па барацьбе са злачыннасцю і карупцыяй у рэгіёне праходзіў у Гомельскім аблвыканкаме пры ўдзеле намесніка кіраўніка спраў Прэзідэнта Мікалая Рагашчука, старшыні Гомельскага аблвыканкама Івана Крупко, памочніка Прэзідэнта — інспектара па Гомельскай вобласці Юрыя Горлава, генеральнага пракурора Андрэя Шведа.

«Гэта сур’ёзная размова на дастаткова высокім узроўні», — падкрэсліў Віктар Марозаў.

Як адзначыў першы намеснік старшыні аблвыканкама Дзмітрый Петражыцкі, у другім паўгоддзі бягучага года з улікам больш жорсткага кантролю з боку раённых і абласных структур кіравання за выпойваннем і ўтрыманнем удалося знізіць падзёж маладняку на 13 працэнтаў да аналагічнага ўзроўню 2022 года. «Адзін з фактараў — паляпшэнне імуннага статусу маладняку. Асабліва ў Веткаўскім, Гомельскім, Добрушскім раёнах. А таксама будаўніцтва 37 прафілакторыяў», — падкрэсліў ён.

Гэта работа будзе прадоўжана і ў 2024 годзе. «У планах будаўніцтва 42 новых і рэканструкцыя 21 існуючага памяшкання, што дасць магчымасць стварыць дадаткова 6,2 тысячы жывёла-месцаў практычна па ўсёй вобласці», — прывёў прыклады Дзмітрый Петражыцкі. Істотна дапамогуць палепшыць сітуацыю нарыхтаваныя ў дастатковай колькасці кармы — 31,32 ц кармавых адзінак на ўмоўную галаву жывёлы, набыццё 120 пастэрызатараў. У рэгіёне абазначана стратэгія развіцця аграпрамысловага комплексу.