Наталля Качанава правяла сустрэчу з паслом Таджыкістана ў Беларусі

Бахтавар Сафарзада не так даўно выконвае дыпламатычную місію ў нашай краіне. Надзвычайным і Паўнамоцным Паслом Рэспублікі Таджыкістан у Рэспубліцы Беларусь ён быў прызначаны 31 мая 2023 года. У нядаўнім мінулым дыпламат быў дэпутатам, прадстаўляў сваю дзяржаву ў Міжпарламенцкай Асамблеі краін — удзельніц СНД. Старшыня Савета Рэспублікі выказала ўпэўненасць, што з прыходам пасла на работу ў Беларусь кантакты паміж парламентарыямі дзвюх краін стануць яшчэ больш інтэнсіўнымі. 

«Паміж нашымі краінамі склаліся добрыя, сяброўскія адносіны, — падкрэсліла спікер верхняй палаты парламента. — Таджыкістан для нас заўсёды быў добрым сябрам. Нас звязваюць гістарычныя карані. І, вядома, умногім гэта дзякуючы той працы, якую праводзяць лідары нашых краін — Аляксандр Лукашэнка і Эмамалі Рахмон».

«Мы разумеем, што ў эканамічным плане ў нас яшчэ ёсць перспектывы для росту, — адзначыла спікер. — У нас працуюць сумесныя прадпрыемствы. Аднак няма мяжы ўдасканаленню». У прыватнасці, Наталля Качанава прывяла ў прыклад супрацоўніцтва ў сферы лёгкай прамысловасці. Яна назвала перспектыўным праект па лініі МПА СНД «Садружнасць моды» і нагадала, што нядаўна Савет Рэспублікі арганізаваў і правёў форум жанчын-прадпрымальніц Беларусі і Узбекістана. «Будзем вельмі рады, калі такі форум мы зможам правесці і з жанчынамі Таджыкістана, — заўважыла Старшыня Савета Рэспублікі. — Можна думаць аб розных праектах, якія былі б на карысць нашых краін і народаў».

У гэтай сувязі спікер верхняй палаты парламента расказала пра праект «Цягнік Памяці», які рэалізуецца верхнімі палатамі Беларусі і Расіі. «Памяць аб Вялікай Айчыннай вайне ў нас з вамі агульная, — канстатавала Наталля Качанава. — Мы вельмі спадзяемся, што сёлета хлопцы і дзяўчаты і з Таджыкістана прымуць удзел у гэтым праекце. Будзем вельмі рады. Увогуле па лініі моладзі нам трэба працаваць вельмі шчыльна». Спікер расказала, што маладыя людзі з Таджыкістана праходзяць навучанне ў беларускіх універсітэтах. «І гэта цудоўна, бо будзе сябраваць моладзь — будзе будучыня ў нашых краін», — падкрэсліла яна. 

Старшыня Савета Рэспублікі звярнула ўвагу на важнасць работы па міжпарламенцкай лініі і расказала, што запрасіла свайго таджыкскага калегу наведаць нашу краіну з афіцыйным візітам. «Мы будзем рабіць усё для таго, каб нашы адносіны па лініі парламентарыяў развіваліся вельмі эфектыўна, — адзначыла Наталля Качанава. — У нас сапраўды паміж калегамі складваюцца добрыя сяброўскія адносіны, якія дазваляюць нам працаваць і адчуваць, што ў нас ёсць не проста надзейныя партнёры, а добрыя сябры, дзе мы можам разам вырашаць любыя пытанні. Асабліва гэта важна ў рабоце ў міжнародных арганізацыях: па лініі ШАС, СНД. Мы бачым, наколькі сёння далікатны свет і якія падзеі адбываюцца ў цэлым у свеце, таму наша задача — зрабіць усё для таго, каб падтрымліваць адзін аднаго. Каб мы сумесна прымалі рашэнні, якія б дазвалялі эфектыўна развівацца нашым краінам, жыць у міры нашым народам. І паверце, мы для гэтага будзем рабіць усё, што ад нас залежыць». 

Старшыня Савета Рэспублікі праінфармавала пасла Таджыкістана аб найважнейшых падзеях, якія ў хуткім часе адбудуцца ў Беларусі. «Мы ўпершыню правядзем адзіны дзень галасавання ў адпаведнасці з абноўленай Канстытуцыяй Рэспублікі Беларусь, — паведаміла яна. — У наступным годзе — 80 гадоў з дня вызвалення Беларусі ад нямецка-фашысцкіх захопнікаў. І, вядома, мы будзем запрашаць нашых бліжэйшых сяброў, аднадумцаў — бліжэйшых не па адлегласці, а па духу». Наталля Качанава заўважыла, што члены Савета Рэспублікі будуць удзячны, калі іх калегі-парламентарыі наведаюць гэтыя ўрачыстыя мерапрыемствы, а таксама возьмуць удзел у назіранні за выбарамі.

«Адным словам, задач у нас вельмі шмат, — рэзюмавала спікер. — І перспектывы, якія адкрываюцца перад намі ў плане супрацоўніцтва, шырокія. Вы павінны ведаць, што ў вас тут добрыя, надзейныя сябры. Мы заўсёды будзем рады. І калі ёсць нейкія прапановы, мы заўсёды гатовы актыўна ўключыцца для таго, каб яны былі рэалізаваны эфектыўна на карысць нашых краін і народаў. І мы не павінны падвесці нашых кіраўнікоў, бо сапраўды гэта такі добры прыклад, калі нашы мудрыя кіраўнікі робяць усё для таго, каб нашы краіны і народы жылі ў міры і спакоі і развіваліся на карысць нашых людзей».

У сваю чаргу, пасол Таджыкістана падкрэсліў, што ў іх краіне Наталлю Качанаву ведаюць як актыўнага дзяржаўнага дзеяча: прычым не толькі ў Рэспубліцы Беларусь, а і ў межах СНД, на прасторы іншых міжнародных арганізацый. «Беларусь для нас — сяброўская краіна, — падкрэсліў Бахтавар Сафарзада. — Паміж нашымі парламенцкімі структурамі ў рамках двухбаковых і шматбаковых сусветных фарматаў існуе вельмі актыўная дзейнасць».

Пасол звярнуў увагу на агульную пазіцыю Беларусі і Таджыкістана па лініі міжпарламенцкага і міжнароданага супрацоўніцтва, заканатворчасці і многіх іншых сферы. «Гэта сведчыць аб стратэгічным партнёрстве, моцным саюзе, — падкрэсліў ён. — Маецца патэнцыял, ёсць куды развівацца, улічваючы сяброўскія адносіны нашых лідараў». 

Дыпламат расказаў аб бліжэйшых сумесных планах і праектах, якія датычацца кааперацыі і імпартазамяшчэння. 

У размове з журналістамі пасол, кажучы аб сумесных гандлёва-эканамічных праектах, дыпламат адзначыў, што ў апошнія гады іх стала нямала. Па яго словах, яны садзейнічаюць актывізацыі і павышэнню тавараабароту. У Мінску плануецца стварыць гандлёвы дом «Таджыкістан», які будзе служыць яшчэ і кардынацыйным цэнтрам бізнэс-супольнасці абедзвюх краін. Рэспубліка Таджыкістан зацікаўлена ў стварэнні сумесных карпарацый. У прыватнасці, па вытворчасці мяса-малочнай прадукцыі. Прыклады ўжо ёсць — у Таджыкістане наладжана вытворчасць беларускай сельгастэхнікі. Ёсць зацікаўленасць таджыкскіх грамадзян наведаць нашу краіну з турыстычнай мэтай. Канкрэтныя прапановы ў гэтым кірунку маюць і іх турыстычныя кампаніі. 

Вераніка КАНЮТА

Фота БелТА