Першыя дні снежня будуць па-сапраўднаму снежнымі, а ўначы яшчэ і ўстойліва халоднымі, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
А ў пятніцу надвор’е ў краіне будзе вызначаць вобласць паніжанага атмасфернага ціску. Воблачна з праясненнямі. У многіх раёнах краіны пройдзе снег. Ноччу і раніцай месцамі чакаецца слабы туман. На асобных участках дарог галалёдзіца. Вецер паўднёвы, паўднёва-заходні слабы да ўмеранага. Тэмпература паветра ўдзень — ад нуля да мінус 6 градусаў. Атмасферны ціск будзе слаба падаць, а днём ён істотна не зменіцца.
У другі дзень каляндарнай зімы снегапады ўжо спыняцца, а таму стане яшчэ халадней. У гэты дзень надвор’е ў асноўным вызначыць вобласць павышанага атмасфернага ціску, у другой палове дня па поўдні краіны адаб’ецца ўплыў атмасферных франтоў, якія ссоўваюцца з боку Украіны. Будзе воблачна з праясненнямі. Пераважна без ападкаў, толькі ноччу па поўначы, а днём па поўдні краіны пройдзе кароткачасовы снег. На асобных участках дарог галалёдзіца. Вецер няўстойлівы ўмераны. Тэмпература паветра ўначы ад мінус 4 градусаў да мінус 10, пры праясненнях — да мінус 15. Днём — таксама будзе не казка — ад нуля да 7 марозу.
У нядзелю сіноптыкі папярэджваюць нас складанымі метэаўмовамі. Менавіта 3 снежня надвор’е пагоршыць сістэма атмасферных франтоў ад цыклону, які ссоўваецца з боку Карпат на Бранскую вобласць Расіі. Будзе воблачна, ноччу з праясненнямі. На большай частцы тэрыторыі краіны чакаецца снег, мокры снег і слабая завіруха. Месцамі па краіне будзе ісці моцны снег. На асобных участках дарог галалёдзіца. Вецер паўночнай чвэрці парывісты. Тэмпература паветра ўначы складзе ад мінус 3 градусаў да мінус 10 градусаў, пры праясненнях будзе падаць да мінус 15 градусаў. Днём адносна цяплей — ад нуля да мінус 7 градусаў.
Паводле папярэдняй інфармацыі айчынных сіноптыкаў, з пачаткам новага працоўнага тыдня зіма некалькі ўзмоцніць націск. У нашу краіну прарвуцца паветраныя масы арктычнага паходжання, тэмпература паветра будзе паніжацца, а атмасферныя франты і няўстойлівыя паветраныя масы працягнуць пастаўляць у краіну новыя порцыі снегу.
У панядзелак на большай частцы тэрыторыі краіны чакаецца кароткачасовы снег. На асобных участках дарог галалёдзіца. Тэмпература паветра ўначы будзе вагацца ад мінус 5 да мінус 12 градусаў, а пры праясненнях — да мінус 16 градусаў. Днём слупкі тэрмометра пакажуць мінус 2–9 градусаў.
У аўторак і сераду месцамі па краіне пройдзе кароткачасовы снег. На асобных участках дарог утворыцца галалёдзіца. Уначы тэмпература паветра будзе ў межах ад мінус 5 да мінус 12 градусаў, а пры праясненнях — ад мінус 13 да мінус 17 градусаў. Днём сіноптыкі абяцаюць 2–9 марозу.
Сяргей КУРКАЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
