Што чакае рынак найбуйнейшых гандлёвых анлайн-платформаў

Гаворка ў нашым выпадку ідзе аб гандлёвых пляцоўках, або маркетплэйсах. Гэта анлайн-платформы для продажу і куплі тавараў і паслуг праз інтэрнэт. Простымі словамі, прадаўцы размяшчаюць свае тавары, пакупнікі выбіраюць варыянты, якія іх задавальняюць па цэнах, характарыстыках і іншых параметрах. Аднак самі маркетплэйсы нічога не прадаюць, іх задачы — забяспечваць прасоўванне тавараў, прыцягваць трафік, рабіць сайт і пошук тавараў зручнымі і такім чынам павялічваць продаж прадпрымальнікам.

Пра тое, што чакае рынак буйных маркетплэйсаў, паслугамі якіх актыўна карыстаюцца беларусы, мы спыталі ў эксперта і дырэктара кампаніі правайдара электронных плацяжоў Assіst Belarus Вячаслава Сеніна.

Наш спікер абраў чатыры кірункі развіцця найбуйнейшых сусветных гандлёвых пляцовак, сфера дзейнасці якіх будзе распаўсюджвацца і на тэрыторыю нашай краіны.

Самым важным кірункам стане гнуткае «пашырэнне геаграфіі прысутнасці». Сапраўды, маркетплэйсы будуць імкнуцца выходзіць на новыя рынкі, асабліва ў краінах, якія развіваюцца, дзе ёсць вялікі патэнцыял росту інтэрнэт-пакупак. Для гэтага яны будуць адаптаваць свае платформы да мясцовых законаў, культуры, валюты і мовы, а таксама супрацоўнічаць з мясцовымі партнёрамі па лагістыцы, аплаце і дастаўцы.

На другім месцы стане тэма паляпшэння якасці сэрвісу. Маркетплэйсы будуць інвеставаць у развіццё сваіх тэхналогій, каб павысіць хуткасць, зручнасць і надзейнасць сваіх сэрвісаў. Яны будуць выкарыстоўваць штучны інтэлект, машыннае навучанне, блокчэйн і іншыя інавацыі для аналізу даных, персаналізацыі прапаноў і аптымізацыі цэнаў. Досыць актуальнай стане гэтая тэма пры распрацоўцы сучасных метадаў кіравання грашовымі патокамі, якія будуць амаль на 100% выключаць ашуканскія схемы. Схема кіравання інвентаром і аўтаматызацыя працэсаў будуць аптымальна распрацаваны.

Трэцяй тэмай развіцця будзе разнастайнасць прапаноў. Гандлёвыя пляцоўкі стануць пашыраць свой асартымент тавараў і паслуг, каб задаволіць усе патрэбы сваіх кліентаў. Яны будуць дадаваць новыя катэгорыі, такія, як прадукты харчавання, лічбавыя тавары, падпіскі, адукацыю і іншыя.

Асабліва варта спыніцца на прадуктах харчавання. Запыт спажыўцоў на анлайн-пакупкі сфарміраваў новы трэнд развіцця для рынку фермерскай прадукцыі — на маркетплэйсы прыйшлі вытворцы прадуктаў харчавання, характэрнымі якасцямі якіх з’яўляюцца экалагічнасць і арганічны цыкл вытворчасці.

Напрыклад, у Расіі рэалізацыя харчовай прадукцыі анлайн лічыцца больш экалагічнай: пры продажы тавараў на маркетплэйсах вытворцы рэгулююць збытавы ланцуг самастойна і падладжваюць прапанову пад попыт, мінімізуючы страты пры захоўванні.

Адным са значных этапаў работы пляцовак анлайн-продажаў з’яўляецца дастаўка. Імкнучыся пашырыць кліенцкую аўдыторыю за кошт няўхільнага росту попыту на якаснае і хуткае абслугоўванне, вытворцы і маркетплэйсы мадэрнізуюць лагістычныя схемы, робячы дастаўку не толькі зручнай, але і экалагічнай. У Расіі ў апошнія 5 гадоў актыўна развіваецца дастаўка з нулявым вугляродным следам: гэта кур’еры на веласіпедах і пешыя кур’еры. Кампенсуе негатыўнае ўздзеянне на навакольнае асяроддзе таксама дастаўка ў пункты самавыдачы, парадку 65% заказаў маркетплэйсаў пакупнікі забіраюць самастойна.

Развіццё анлайн-продажаў фермерскай прадукцыі на платформах па продажы прадуктаў харчавання або спецыялізаваных фермерскіх маркетплэйсах дае сельгасвытворцам шэраг пераваг: прамы выхад на пакупніка, эканомію на выкарыстанні складскіх памяшканняў, а таксама на лагістыцы, маркетынгу і дастаўцы. Для маркетплэйсаў гэта магчымасць пашырыць асартымент за кошт унікальных свежых і якасных тавараў.

Па разнастайнасці прапаноў гандлёвыя пляцоўкі таксама будуць падтрымліваць розныя фарматы продажу, такія як аўкцыёны, групавыя пакупкі, другасны рынак і іншыя. Дарэчы, міждзяржаўнымі гандлёвымі пляцоўкамі ўжо цяпер актыўна карыстаюцца прадаўцы другаснага рынку жылля асноўных рэгіёнаў Кіпра. Дастаткова ў сваім сотавым тэлефоне адзін раз зрабіць запыт на падобную тэматыку — мінімум раз на тыдзень вы будзеце атрымліваць свежую інфармацыю аб жыллі на продаж у гэтай краіне.

Чацвёртым кірункам выступае сацыяльная адказнасць. Маркетплэйсы будуць улічваць уплыў сваёй дзейнасці на навакольнае асяроддзе і грамадства. Яны стануць прымяняць прынцыпы ўстойлівага развіцця, такія як экалагічнасць упакоўкі і дастаўкі, падтрымка малога і сярэдняга бізнесу, абарона правоў спажыўцоў і прадаўцоў, дабрачыннасць і іншыя.

Сяргей КУРКАЧ