Каля помніка супрацоўнікам органаў унутраных спраў і ваеннаслужачым унутраных войскаў МУС, якія загінулі пры выкананні службовага і воінскага абавязку, сабраліся міністр унутраных спраў, мінулыя кіраўнікі ведамства, а таксама намеснікі міністра, начальнікі падраздзяленняў МУС, дэпартаментаў, устаноў адукацыі, абласных УУС і ГУУС Мінгарвыканкама. Удзельнікамі рытуалу таксама сталі ветэраны з розных рэгіёнаў краіны, курсанты і навучэнцы ведамасных навучальных устаноў, выхаванцы ваенна-патрыятычных клубаў.
Выступаючы на ўрачыстай цырымоніі, прысвечанай Дню ўшанавання ветэранаў органаў унутраных спраў і ўнутраных войскаў МУС, міністр унутраных спраў Іван Кубракоў адзначыў, што гэтае свята з’яўляецца правапераемнікам Дня савецкай міліцыі і для кожнага ветэрана напоўнена асаблівым сэнсам.
«Наша ветэранская арганізацыя аб’ядноўвае заслужаных людзей, чый працоўны і баявы шлях выклікае шчырую павагу, дасягненні ўпісаны ў летапіс ведамства, — падкрэсліў генерал-лейтэнант міліцыі. — Прадстаўнікі старэйшага пакалення абаранілі свабоду і незалежнасць дзяржавы на палях Вялікай Айчыннай вайны, перамаглі бандытызм, аднавілі разбураную гаспадарку, абаранілі ад чарнобыльскай катастрофы, выканалі інтэрнацыянальны абавязак у Афганістане, заўсёды забяспечвалі правапарадак і стабільнасць у краіне, выхоўваючы ў моладзі любоў і Айчыне».
Міністр унутраных спраў нагадаў, што ўсе знакавыя мерапрыемствы міністэрства праходзяць каля помніка загінулым вартавым правапарадку — гэта даніна павагі жывых светлай памяці калег, якія аддалі сваё жыццё ў імя правапарадку, грамадскай бяспекі і ўрачыстасці закона, святы абавязак перад калегамі і сябрамі, якія сышлі з жыцця.
20 гадоў таму помнік быў пабудаваны па ініцыятыве ветэранаў на ахвяраванні супрацоўнікаў і вайскоўцаў. Прынята рашэнне аб рэканструкцыі мемарыяла і добраўпарадкаванні прылеглай тэрыторыі ў 2024 годзе.
Кіраўнік ведамства ўручыў узнагароды прадстаўнікам ветэранскага руху, якія найбольш вызначыліся, пасля чаго ўдзельнікі рытуалу ўсклалі вянкі і кветкі да помніка супрацоўнікам і вайскоўцам, якія загінулі пры выкананні службовага і воінскага абавязку, ушанавалі іх памяць хвілінай маўчання. У завяршэнне мерапрыемства ваеннаслужачыя роты ганаровай варты вайсковай часці 3214 прайшлі ўрачыстым маршам па набярэжнай Свіслачы.
У размове з журналістамі Іван Кубракоў расказаў, што стала добрай традыцыяй штогод 10 лістапада збіраць актыў ветэранскай арганізацыі МУС, якая, налічвае больш за 25 тысяч чалавек. «Я ўжо не раз казаў: у нас няма пенсіянераў, ветэраны заўсёды з намі ў адным страі, — падкрэсліў ён. — Ветэраны — гэта залаты і самы надзейны рэзерв міністра ўнутраных спраў».
Міністр праанансаваў сваю сустрэчу з актывістамі ветэранскіх пярвічак з розных куткоў краіны. Кіраўніка ведамства цікавяць пытанні работы з моладдзю ў ведамасных ВНУ, ліцэі і патрыятычных клубах. «Ветэраны чытаюць лекцыі, расказваюць новаму пакаленню, як зараджалася беларуская міліцыя, як працавалі супрацоўнікі ў ранейшыя гады, бо без захавання гісторыі не можа быць будучыні, — перакананы міністр. — У наступным годзе спаўняецца 80 гадоў з дня вызвалення Беларусі ад нямецка-фашысцкіх захопнікаў. МУС унясе прапанову ў аргкамітэт па святкаванні гэтай знакавай даты, каб у складзе парадных разлікаў у форме супрацоўнікаў міліцыі тых гадоў прысутнічаў і легендарны батальён капітана Уладзімірава».
Вераніка КАНЮТА
Фота прэс-службы МУС
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».