Завяршыўся афіцыйны візіт беларускай дэлегацыі на чале з Віктарам Хрэніным у Кітайскую Народную Рэспубліку. Яго асноўным вынікам стала выпрацоўка «дарожнай карты» па развіцці двухбаковага ваеннага і ваенна-тэхнічнага супрацоўніцтва. Акрамя таго, у ходзе афіцыйнага візіту абмяркоўваліся пытанні сумеснай падрыхтоўкі ваеннаслужачых Узброеных Сіл Беларусі і Народна-вызваленчай арміі Кітая, удзелу кітайскіх калег у конкурсах Армейскіх міжнародных гульняў, якія плануецца правесці на тэрыторыі нашай краіны. Асаблівую ўвагу бакі ўдзялілі ўзаемадзеянню ў галіне падрыхтоўкі ваенных кадраў. Ёсць канкрэтныя дамоўленасці па сумесным удзеле ў дзейнасці па падтрыманні міжнароднага міру і бяспекі пад эгідай ААН.
Пытанні двухбаковага ваеннага супрацоўніцтва кіраўнік абароннага ведамства Беларусі абмяркоўваў і на сустрэчы з членам Палітбюро Цэнтральнага Камітэта Камуністычнай партыі Кітая, намеснікам Старшыні Цэнтральнага ваеннага савета Кітайскай Народнай Рэспублікі генерал-палкоўнікам Чжанам Юсем, і падчас іншых мерапрыемстваў, запланаваных у ходзе афіцыйнага візіту.
Беларуская ваенная дэлегацыя наведала Універсітэт нацыянальнай абароны Народна-вызваленчай арміі Кітая. Віктар Хрэнін азнаёміўся з матэрыяльна-тэхнічнай базай установы адукацыі, паразмаўляў з выкладчыцкім складам, наведаў музей універсітэта і пакінуў запіс у кнізе ганаровых гасцей. Дарэчы, навучанне беларускіх і кітайскіх ваеннаслужачых у ваенных навучальных установах Беларусі і Кітая праводзіцца на планавай аснове. У Ваеннай акадэміі нашай краіны прайшлі навучанне звыш 350 кітайскіх вайскоўцаў. У навучальных установах Народна-вызваленчай арміі Кітая атрымала дадатковую адукацыю больш як 80 беларускіх ваеннаслужачых.
Выступаючы на 10-м Пекінскім форуме па пытаннях бяспекі «Сяншань», у якім узялі ўдзел прадстаўнікі ўзроўню міністра абароны з больш як 40 краін свету, Віктар Хрэнін адзначыў, што ў сучасным свеце, які фундаментальна мяняецца, Рэспубліка Беларусь імкнецца захаваць суверэнітэт, права на канструктыўнае ўзаемадзеянне з усімі краінамі. «І мы бачым, што такую пазіцыю падзяляе большасць свабодных дзяржаў планеты, — удакладніў ён. — Разам з тым мы разумеем, што шлях да шматпалярнасці не будзе просты. Трансфармацыя сістэмы міжнародных адносін чакана сутыкаецца з актыўным процідзеяннем прыхільнікаў аднапалярнай мадэлі светаўладкавання. Яны будуць працягваць шукаць новыя магчымасці для захавання свайго дамінавання. І ваенная сіла, на жаль, тут будзе заставацца адным з галоўных аргументаў».
Міністр абароны звярнуў увагу на тое, што мы становімся сведкамі разбурэння сістэмы міжнародных адносін, заснаванай на міжнародным праве. «У першую чаргу, ідзе дэмантаж механізмаў кантролю над узбраеннямі, якія ствараліся дзесяцігоддзямі, і падтрымання стабільнасці, — канкрэтызаваў ён. — І калі раней сістэма дагавораў забяспечвала баланс сіл на мінімальным узроўні абароннай дастатковасці, то сёння ўжо нішто не стрымлівае дзяржавы ад рэалізацыі іх агрэсіўных планаў. У Еўропе бескантрольнасць служыць штуршком да новага вітка гонкі ўзбраенняў. Невыпадкова сёння бачная тэндэнцыя па нарошчванні дзяржавамі ваенных бюджэтаў, закупцы наступальных узбраенняў для сваіх войскаў, павелічэнні колькасці войскаў, правядзенні бясконцых вучэнняў каля межаў апанентаў. А ў цэлым паскораная мілітарызацыя планеты павышае верагоднасць развязвання поўнамаштабных ваенных канфліктаў ва ўсіх рэгіёнах свету».
Па словах кіраўніка абароннага ведамства, намецілася небяспечная тэндэнцыя, калі для супрацьдзеяння сваім канкурэнтам на міжнароднай арэне адраджаюцца старыя саюзы дзяржаў, фарміруюцца новыя ваенна-палітычныя блокі, а таксама пашыраюцца функцыі рэгіянальных альянсаў, якія існуюць. Напрыклад, блок НАТА заяўляе аб глабалізацыі сваіх функцый на ўсю планету. На супрацьстаянне з геапалітычнымі канкурэнтамі ў Азіяцка-Ціхаакіянскім рэгіёне арыентаваны «Стратэгічны трохвугольнік» ЗША, Японіі і Паўднёвай Карэі. Яшчэ адным саюзам, накіраваным на недапушчэнне збліжэння краін рэгіёна ў рамках АСЕАН, з’яўляецца «Чатырохбаковы дыялог па бяспецы» (QUAD).
Як канстатаваў Віктар Хрэнін, узровень мілітарызацыі, які расце, нічым не абмежаваны, рост ваеннай моцы стварае ў рэгіянальных дзяржаў ілюзію, што ўсе праблемы можна вырашыць сілай. «Логіка тут простая: ва ўмовах трансфармацыі светаўладкавання, калі геапалітычныя цэнтры сілы ўцягнуты ў бескампраміснае супрацьстаянне адзін з адным, лакальны канфлікт не будзе заўважаны міжнароднай супольнасцю, — патлумачыў міністр абароны. — Адпаведна не будзе і рэакцыі з боку міжнародных арганізацый па бяспецы. Варта сказаць, што ў аналагічным ключы думаюць і недзяржаўныя гульцы ў асобе міжнародных тэрарыстычных і экстрэмісцкіх арганізацый. Яны таксама спрабуюць адваяваць сабе месца ў светапарадку, які фарміруецца, і рэалізуюць гэтыя памкненні ўласнымі ўзброенымі фарміраваннямі». Менавіта па гэтай прычыне, акцэнтаваў увагу генерал-лейтэнант, мы становімся сведкамі актывацыі ачагоў «замарожаных канфліктаў» па ўсім свеце: у Сірыі, ва Украіне, на Блізкім Усходзе.
Беларусь поўнасцю падтрымліваее ідэю гарманічнага і раўнапраўнага суіснавання ўсіх краін, усіх народаў. У гэтай сувязі міністр абароны прывёў старажытную кітайскую мудрасць: найлепшая вайна тая — якая не адбылася. «Падзяляючы такі падыход, Рэспубліка Беларусь ніколі не звязвала сваю будучыню з ваенным вырашэннем міжнародных праблем, — канстатаваў ён. — Мы заўсёды выступалі за рэгуляванне ўсіх спрэчных пытанняў мірным шляхам, лічачы ваенную сілу толькі крайнім сродкам адпору агрэсару. Менавіта таму нам у вельмі імпануе кітайская Ініцыятыва па глабальнай бяспецы. Будзем спрабаваць данесці да разважлівай часткі сусветнай супольнасці думку аб непадзельнасці бяспекі, аб згубнасці спроб забяспечыць уласную бяспеку за кошт мілітарызацыі. Зыходзячы з гэтага, заклікаем усе адказныя незалежныя краіны задумацца над перазагрузкай міжнароднай дагаворнай сістэмы, накіраванай на павышэнне транспарэнтнасці ў ваеннай сферы, захаванне парытэту ваенных сіл з адначасовым раззбраеннем да ўзроўню абароннай дастатковасці».
Паводле прэс-службы Мінабароны
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
