Калісьці лічылася, што ў хакей гуляюць толькі сапраўдныя мужчыны. Але час ідзе і цяпер на каньках з клюшкай у руках выходзяць і дзяўчыны. І робяць гэта зусім не на аматарскім узроўні. Днямі Федэрацыя хакея Беларусі абвясціла навіну, якая вызначыла новую старонку ў развіцці айчыннага хакея: у нашай краіне стартуе першы ў гісторыі жаночы чэмпіянат па хакеі. Стартуе зусім хутка, 30 кастрычніка. Першы тур спаборніцтваў прыме сталічная «Алімпік-Арэна». Для ўдзелу ў турніры будуць сфарміраваны тры каманды, сабраныя па геаграфічным прынцыпе: каманда, якая прадстаўляе сталіцу і сталічны рэгіён; каманда, якая прадстаўляе заходні і цэнтральны рэгіёны (Гродненская, Брэсцкая і Мінская вобласці); каманда, якая аб’яднала спартсменак з Віцебскай, Магілёўскай і Гомельскай абласцей.
Першынства будзе праводзіцца інакш, чым мужчынскае. Рэгулярны чэмпіянат пройдзе па туравай сістэме. Аматараў чакае чатыры гульнявых тыдні: па адным восенню і зімой і два вясной. У кожны гульнявы тыдзень кожная каманда правядзе па 4 матчы, атрымаецца па 16 матчаў за сезон. Па выніках рэгулярнага чэмпіянату будуць вызначаны два фіналісты, якія разыграюць званне чэмпіёна ў фінальнай серыі матчаў.
Федэрацыя хакея Беларусі абяцае зусім хутка аб’явіць назвы і склад каманд-удзельніц.
Стварэнне жаночай хакейнай лігі ў Беларусі – цалкам лагічны крок. У кастрычніку 2021 года Федэрацыя хакея Беларусі прыняла канцэпцыю развіцця жаночага хакея ў Рэспублікі Беларусі. Канцэпцыя дзейнічае да 2028 года. І яна ўжо прыносіць свае вынікі.
«У нас ужо ёсць жаночая зборная, якая выступае ў юнацкай лізе. Аднак у краіне ўжо значна больш дзяўчат, якія дайшлі да ўзроўню, калі яны могуць спаборнічаць у асобных камандах без хлопцаў. Гэта стала перадумовай да пераходу на наступную прыступку ў рэалізацыі нашай канцэпцыі развіцця жаночага хакея ў Беларусі — да стварэнн нацыянальнага чэмпіянату. Правядзенне першынства жаночых каманд дасць магчымасць сфарміраваць паўнацэнную жаночую супольнасць у хакеі і дасць яшчэ большай колькасці дзяўчат шанс на тое, каб у будучым стаць прафесійнымі хакеісткамі. Такі сур’ёзны крок быў бы немагчымы без дапамогі нашага партнёра, флагмана беларускай прамысловасці, „Беларуськалія“», — адзначыў старшыня ФХБ Аляксандр Багдановіч.
У свеце жаночы хакей развіваецца з 1989 года, калі Міжнароднай федэрацыяй былі арганізаваны першыя спаборніцтвы. Але гэта калі казаць пра аіфцыйны пачатак гісторыі. Насамрэч, дзяўчыны пачалі гуляць у хакей на сто гадоў раней. Першы жаночы матч прайшоў у Канадзе ў 1889 годзе, ці, як сцвярджаюць іншыя крыніцы ў 1892 годзе. У пачатку ХХ стагоддзя дзяўчаты з ЗША і Канады актыўна гулялі ў хакей. Нестабільнае эканамічнае становішча, выкліканае дзвюма сусветнымі войнамі, зразумела, прыпынілі развіццё гэтага віду спорта. Адраджэнне адбылося толькі напрыканцы стагоддзя. Першы афіцыйны чэмпіянат свету прайшоў ў 1990 годзе ў хакейнай Канадзе. У праграму зімовых Алімпійскіх гульняў жаночы хакей быў уключаны ў 1998 годзе. Для прафесійнага спорту 34 гады зусім няшмат, таму жаночы хакей яшчэ набірае папулярнасць ва ўсім свеце.
Правілы гульні ў жаночы хакей амаль нічым не адрозніваюцца ад добра вядомых правіл мужчынскага хакея. Усё тыя ж тры перыяды па 20 хвілін на класічнай хакейнай пляцоўцы. Асноўнае адрозненне — у жаночым хакеі забаронена сілавая барацьба. І ў адрозненне ад хакеістаў, хакеісткі павінны ўвесь час гульць у масцы, якая цалкам закрывае твар.
У Беларусі жаночы хакей развіваецца не першы год. У 2010 годзе была створана першая жаночая прафесійная хакейная каманда «Пантэра», якая разглядалася як базавы клуб для фарміравання жаночай зборнай. На жаль праз тры гады з-за фінансавых праблем клуб перастаў існаваць. Але гэта была толькі паўза.
У 2022 годзе Федэрацыя хакея Беларусі сумесна з ТРК TRINITI (Гродна) правялі унікальнае мерапрыемства — сусветны жаночы хакейны матч — Global Girls Game. Настаўнікамі каманд сталі зоркі беларускага хакея: адзін з найлепшых беларускіх хакеістаў у НХЛ Міхаіл Грабоўскі і экс-галоўны трэнер нацыянальнай каманды Анатоль Варывончык. У кастрычніку 2022 года быў арганізаваны першы ў гісторыі кэмп жаночай зборнай. Яго задачай была ацэнка спартыўнага ўзроўню дзяўчат і прагляд найбольш перспектыўных спартсменак. Гэтая работа ўзмацнялася і ў 2023 годзе. У лютым на пляцоўцы гродненскага гандлёва-забаўляльнага цэнтра ізноў адбыўся сусветны жаночы хакейны матч Global Girls Game, удзел у якім прынялі 67 дзяўчат. Добрай традыцыяй стала правядзенне майстар-класаў ад гульцоў вядучых каманд.
Што ж, прыйшоў час праверыць, на што здольныя беларускія хакеісткі.
Валерыя СЦЯЦКО
Фота ФХБ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.