У бальніцах на перыяд ўздыму захворвання на ВРВІ забяспечаны запас лекаў на 2-4 месяцы

У бальніцах на перыяд ўздыму захворвання на ВРВІ забяспечаны запас лекаў на 2-4 месяцы, паведаміў БелТА першы намеснік старшыні Камітэта па ахове здароўя Мінгарвыканкама Павел Удот.

«Я ўпэўнены, што ўсе стацыянарныя, амбулаторна-паліклінічныя ўстановы аховы здароўя не толькі ў Мінску, але і па ўсёй краіне гатовыя да сезона. Штогод з улікам папярэдняга эпідэміялагічнага сезона складаюцца планы закупак лекавых сродкаў. На сёння дэфіцыту ў леках у стацыянарных установах горада Мінска няма», — сказаў Павел Удот. Паводле яго слоў, у бальніцах забяспечаны 2-3-месячны запас прэпаратаў, і гэты запас не зніжаецца.

Першы намеснік старшыні камітэта адзначыў, што ў выпадку неабходнасці заўсёды ёсць магчымасць атрымаць тыя ці іншыя лекі праз Міністэрства аховы здароўя, якое таксама валодае пэўнымі запасамі. Прэпараты захоўваюцца да моманту выкарыстання.

«Мы паставілі сабе планку — ад двух да чатырох месяцаў запасу (лекаў у стацыянарах. — Заўв. БЕЛТА), — працягнуў першы намеснік начальніка Галоўнага ўпраўлення па ахове здароўя Мінскага аблвыканкама Зіновій Гозман. — Працуем з РУП "Мінская фармацыя", якое забяспечвае нас медыкаментамі. Нам не трэба трымаць у бальніцы гэты чатырохмесячны запас. Мы ведаем, што ён ёсць на нашай фармацыі. І як толькі бальніца атрымлівае тавар, фармацыя тут жа яго папаўняе».

Наяўнасць двухмесячных запасаў неабходных лекаў пацвердзіў галоўны ўрач Брэсцкай абласной клінічнай бальніцы Аляксандр Карпіцкі. Гаворка ідзе пра антыбіётыкі, супрацьвірусныя прэпараты, лекі, якія патрабуюцца пры ўскладненнях вірусных пнеўманій і інш.

«Запас робім і па прэпаратах, і па сродках індывідуальнай абароны, і па мыйных, дэзінфікуючых сродках. У абласной бальніцы мы гэты запас ужо зрабілі», — сказаў Аляксандр Карпіцкі. Датычна прэпаратаў, ён удакладніў, што ў асноўным гэта лекі айчыннай вытворчасці.