МАК зацвердзіў уключэнне новых відаў у праграму Алімпійскіх гульняў 2028

На гэтым тыдні ў індыйскім Мумбаі скончылася 141-я сесія Міжнароднага алімпійскага камітэта, якая вызначае развіццё сусветнага алімпійскага руху на бліжэйшыя гады. На жаль, для беларускага спорту добрых навін з палей саміта не прыйшло. Самае балючае пытанне аб вяртанні нашых спартсменаў на міжнародныя старты і іх допуск на Алімпійскія гульні 2024 года зноў засталося без адказу. Пазіцыя не змянілася: Міжнародны алімпійскі камітэт, як адзначыў дырэктар дэпартамента па сувязях з нацыянальнымі алімпійскімі камітэтамі Джэймс Маклеод, асуджае невыкананне рэкамендацый па допуску да спаборніцтваў беларусаў асобнымі федэрацыямі па відах спорту. І на гэтым увесь удзел МАК у вырашэнні гэтага пытання, якое выклікае крызіс алімпійскага руху. 

«Рэкамендацыі застаюцца ў сіле. МАК ставіць перад сабой мэту выключыць дыскрымінацыю спартсменаў на аснове іх нацыянальнасці. У сакавіку гэтага года МАК выпусціў спецыяльныя рэкамендацыі па допуску беларускіх і расійскіх спартсменаў. З таго часу многія міжнародныя спартыўныя федэрацыі змаглі распрацаваць крытэрыі па вяртанні спартсменаў у нейтральным статусе. Часам адбываецца ўмяшанне ў прыняцце незалежных рашэнняў з боку федэрацый, калі краіны настойваюць на поўным адхіленні беларусаў і расіян і нядопуску іх да ўдзелу ў спаборніцтвах, нават адмаўляючы ў выдачы віз. МАК асуджае падобнае ўмяшанне і ўважліва вывучае такія выпадкі. Таксама вы ведаеце, што НАК Беларусі і Расіі не атрымалі запрашэння на Алімпійскія гульні. МАК пакідае за сабой права выслаць іх у прыдатны для гэтага час», — сказаў Маклеад на сесіі.

І на гэтым усё. У Міжнароднага алімпійскага камітэта былі больш важныя задачы падчас сесіі. І гэта нават не змены ў Алімпійскай хартыі. А ўключэнне ў праграму летніх Алімпійскіх гульняў 2028 у Лос-Анджэлесе года пяці новых відаў: сцяг-футбол, крыкет, лакрос, сквош і бейсбол.

«Гэтыя пяць прапанаваных відаў спорту поўнасцю адпавядаюць мясцовай спартыўнай культуры і прадэманструюць свету культавыя амерыканскія віды спорту. Іх уключэнне дасць магчымасць алімпійскаму руху ўзаемадзейнічаць з новымі супольнасцямі спартсменаў і балельшчыкаў у ЗША і ва ўсім свеце», — паведаміў прэзідэнт МАК Томас Бах. Гучыць, канешне, вельмі прыгожа, калі не ўлічваць, што геаграфія гэтых відаў не надта шырокая. Разгледзем іх падрабязней. 

Бейсбол быў часткай алімпійскай сям’і падчас Гульняў у 1904-м годзе. Затым быў закінуты. А на Гульнях 2020 года вярнуўся як дадатковы від спорта. Напэўна,  усе ведаюць, што бейсбол надзвычай папулярны ў ЗША, таму цалкам лагічным здаецца, што ён увайшоў у праграму Гульняў, якія прыме гэта краіна. 

Стрыечны брат бейсбола родам з Англіі — крыкет – шалёную папулярнасць набыў у Індыі. Сёння гэты спорт мае больш за мільён аматараў ва ўсім свеце. Кубак свету, які прайшоў у Індыі, прыцгянуў увагу ўсёй краіны. Міжнародны алімпійскі камітэт гэтым своечасова скарыстаўся. Паведамляецца, што правы на трансляцыю Гульняў у Парыжы Індыя набыла прыкладна за 18 мільёнаў еўра. Але ў выпадку ўключэння крыкету ў праграму Алімпіяды індыйцы гатовы заплаціць і ўсе 173 мільёнаў еўра. Вось і ўся няхітрая арыфметыка.

Сцяг-футбол, па сутнасці, – гэта спрошчаная версія амерыканскага футбола. У ім менш сутыкненняў, траўм. У кожнай камандзе па 5 гульцоў і адзін запасны, матч працягваецца 20 хвілін на адкрытым полі. Заканадаўца мод, як не цяжка здагадацца — Злучаныя Штаты Амерыкі. Але прызёрамі чэмпіянату свету 2021 года сталі Мексіка, Італія і Панама. 

Лакрос — гульня, мэта якой закінуць мяч у вароты саперніка, выкарыстоўваючы клюшку. Адзначна сцвярджаць пра яго сусветную папулярнасць цяжка. Лідары лакроса — ЗША і Канада, якія сталі пераможцамі чэмпіянату свету 2023. 

Сквош — адна з разнавіднасцей тэніса. Толькі замест сеткі — сцяна, а гульцы знаходзяцца з аднаго боку і адбіваюць мяч адзін аднаму ад сцяны. Прапаноўвалася ўключыць яго ў алімпійскую праграму яшчэ ў пачатку стагоддзя, але гэтую ідэю недастаткова падрыхтавалі. Варта адзанчыць, што сквош досыць папулярны ў свеце, мае свой прафесіяльны тур, рэйтынгавую сістэму. Але ў Беларусі шырокай папулярнасці ён не набыў. Як і іншыя новыя алімпійскія віды. У нашай краіне яны зусім не распаўсюджаны, хіба што выключна на аматарскім узроўні. Не сфарміраваныя нацыянальныя каманды, спартсмены не ўдзельнічаюць у міжнародных стартах. Таму Алімпійскія гульні 2028 года для нашай краіны будуць цікавымі толькі дзякуючы нашым традыцыйным відам, дзе, хочацца верыць, беларускія спартсмены будуць чэмпіёнамі. 

Валерыя СЦЯЦКО