Цэнтр кітайскай мовы адкрыўся ў Міжнародным універсітэце «МІТСО»

Размаўляць з патэнцыйнымі кліентамі на адной мове ў прамым і пераносным сэнсах, валодаць прафесійнай лексікай і ведамі па развіцці пэўнай галіны не толькі ў Беларусі, але і ў Паднябеснай. Такія задачы мае на мэце цэнтр кітайскай мовы і культуры, які ўрачыста адкрылі ў дзень ведаў у Міжнародным універсітэце «МІТСО» у сталіцы. Ініцыятыва была рэалізавана пры садзейнічанні Федэрацыі прафсаюзаў Беларусі.

Сёння адносіны паміж Беларуссю і Кітаем дынамічна развіваюцца па ўсіх накірунках — ад прамысловасці да медыцыны. Становіцца відавочным, што вывучэння кітайскай мовы толькі для стасункаў на бытавым узроўні недастаткова. Трэба рыхтаваць спецыялістаў, якія будуць разумець сацыяльна-эканамічныя асаблівасці Кітая, традыцыі і культуру. Калі гэта, напрыклад, лагіст, то ён павінен дасканала ведаць, як развіваецца гэтая галіна не толькі ў Беларусі, але і ў Кітаі, зазначылі ва ўніверсітэце.

— Прэзідэнт шмат гаворыць пра важнасць узаемадзеяння з Кітаем, шмат кажа пра неабходнасць развіцця моладзі і стварэння ўмоў для таго, каб яна пачувала сябе камфортна, бачыла перспектывы свайго развіцця, — заўважыла падчас урачыстага адкрыцця Цэнтра Вольга Чупрыс, намеснік кіраўніка Адміністрацыі Прэзідэнта. — МІПСА — вельмі буйны ўніверсітэт з даўнімі традыцыямі, якія існуюць ужо амаль сто гадоў. Установа дынамічна развіваецца і знаходзіцца на вастрыі з’яў краіны і свету, і такі Цэнтр прыцягне моладзь.

Штогод ва ўніверсітэце стараюцца ўкараніць нешта новае і карыснае для навучання маладых людзей, стварыць дадатковыя магчымасці для ўсебаковага развіцця студэнтаў, заўважыў Міхаіл Орда, старшыня Федэрацыі прафсаюзаў Беларусі:

— Быць запатрабаванымі і паспяховымі ў жыцці, ісці ў нагу з часам, каб дасягаць асабістых мэт і прыносіць карысць сваёй краіне, — гэта вельмі важна для моладзі. Летась мы адкрылі ў МІПСА вельмі запатрабаваны ў студэнтаў спартыўна-аздараўленчы цэнтр. Сёння — цэнтр кітайскай мовы і культуры. Гэта неабходна, каб нашы маладыя людзі не толькі ведалі кітайскую мову, але і глыбока разумелі культуру і эканоміку гэтай краіны, далей развівалі адносіны паміж нашымі дзяржавамі. Цэнтр будзе працаваць на пастаяннай аснове, а да работы будуць прыцягваць носьбітаў кітайскай мовы. Плануюцца і стажыроўкі ў Кітаі. Сумесна з Федэрацыяй прафсаюзаў Кітая мы будзем развіваць і пашыраць гэты праект.

Прафсаюзны ўніверсітэт цягам многіх гадоў развівае практычнае супрацоўніцтва з вышэйшымі навучальнымі ўстановамі розных краін. Гэта сумесныя адукацыйныя праграмы, праграмы па абмене студэнтамі, стажыроўкі, арганізацыя і правядзенне міжнародных канферэнцый і алімпіяд.

У планах цэнтр кітайскай мовы і культуры не толькі правядзенне заняткаў. Але і падрыхтоўка да здачы міжнароднага кваліфікацыйнага іспыту, арганізацыя акадэмічнага абмену з вышэйшымі навучальнымі ўстановамі, якія спецыялізуюцца ў галіне кітаязнаўства. Будзе праводзіцца і падрыхтоўка і арганізацыя ўдзелу моладзі ў Сусветным студэнцкім конкурсе на веданне мовы «Мост кітайскай мовы», які быў заснаваны ў 2002-м Кітайскім дзяржаўным камітэтам па выкладанні кітайскай мовы за мяжой.

Ірына СІДАРОК

Фота дадзена Федэрацыяй прафсаюзаў Беларусі