Баіцеся пакідаць адных дома сваіх пажылых бацькоў? Ім сумна, не хапае зносін, а вы цэлы дзень занятыя на рабоце? Бабулям і дзядулям неабходныя нагляд і догляд, а ў вас тэрміновыя неадкладныя справы? Выйсце ёсць — «дзіцячы садок» для пажылых людзей.
Пра гэтую адносна новую паслугу я даведалася падчас наведвання дома-інтэрната «Камфортнае жыццё», што непадалёку ад Асташыцкага Гарадка. «Калі, напрыклад, дачка працуе, яна можа адвезці маму ці тату зранку да нас, а вечарам пасля работы забраць, каб не перажываць, што стары чалавек застаўся адзін дома, — распавядае дырэктар дзяржаўнай установы Юлія Дударонак. — Бабулі і дзядулі ў нас могуць знаходзіцца пад наглядам спецыялістаў да 12 гадзін у суткі днём. Дадзеная паслуга бясплатная, плаціць трэба толькі за харчаванне».
Як расказала намеснік начальніка ўпраўлення — начальнік аддзела сацыяльных устаноў упраўлення сацыяльных устаноў і матэрыяльна-бытавога забеспячэння пенсіянераў і інвалідаў Камітэта па працы, занятасці і сацыяльнай абароне Мінаблвыканкама Вера Падароўская, паслуга, якая больш правільна называецца «дзённае знаходжанне для пажылых людзей», аказваецца на базе дамоў-інтэрнатаў — як агульнага тыпу, так і псіханеўралагічных. Гэта як дзіцячы садок, але толькі для бабуль і дзядуль. Яго паслугамі можна карыстацца на працягу пяці дзён на тыдзень (за выключэннем выхадных і святочных дзён) з 8.00 да 20.00. Ніхто не забараняе прывезці пажылога чалавека ў дом-інтэрнат на некалькі гадзін ці на першую палову дня, ва ўсіх розныя абставіны. Адзінае, што павінна быць, — заключэнне ўрачоў, што чалавек мае патрэбу ў такой паслузе.
У «дзіцячым садку» бабулі і дзядулі могуць адпачыць, паспаць, наведаць гурткі па інтарэсах і проста пакантактаваць. Ім не будзе сумна і адзінока, бо іх акружаць клопатам і ўвагай. Акрамя таго, спецыялісты акажуць санітарна-медыцынскія паслугі (у прыватнасці, пракантралююць, каб чалавек своечасова выпіў таблетку, калі трэба, зробяць укол, дапамогуць у правядзенні гігіенічных працэдур), арганізуюць вольны час (гэта могуць быць гурткі па інтарэсах, канцэрты, нейрагімнастыка і іншае), акажуць псіхолага-сацыяльную падтрымку. Пры заключэнні дагавора ўсё гэта агаворваецца і складаецца індывідуальны пералік сацыяльных паслуг ды іншых мерапрыемстваў з улікам асаблівасцяў пажылога чалавека.
Падобная паслуга вельмі зручная для тых сталых людзей, якія не гатовыя ў дадзены момант пераязджаць у традыцыйны дом-інтэрнат, але адчуваюць цяжкасці з самаабслугоўваннем на працягу дня. Акрамя таго, яна можа стаць прамежкавым этапам паміж знаходжаннем дома і ў доме-інтэрнаце для пажылых, падрыхтуе старога чалавека да новага спосабу жыцця і новага месца паступова, без рэзкай змены абстаноўкі.
Як удакладнілі ў Камітэце па працы, занятасці і сацыяльнай абароне Мінскага аблвыканкама, паслуга пакуль, на жаль, не надта запатрабаваная. Звязана гэта, відаць, з тым, што амаль усе дамы-інтэрнаты размешчаныя за горадам. Дзецям не вельмі зручна і дорага вазіць пажылых бацькоў кожны дзень за 20-50 кіламетраў і вечарам забіраць. Таму ў якасці альтэрнатывы ў дамах-інтэрнатах аказваюцца кароткатэрміновыя сацыяльныя паслугі. Напрыклад, калі вы з'язджаеце ў водпуск, то можаце аформіць маму ці тату ў дом-інтэрнат на 14 дзён (максімум на месяц).
Яшчэ адной альтэрнатывай з'яўляецца паслуга дзённага нагляду, якая аказваецца ў Тэрытарыяльных цэнтрах сацыяльнага абслугоўвання насельніцтва. Як распавяла начальнік упраўлення дзяржаўнай сацыяльнай падтрымкі і сацыяльнага абслугоўвання Камітэта па працы, занятасці і сацыяльнай абароне Мінаблвыканкама Людміла Вашчыла, дадзеная паслуга ўведзена не так даўно, з сярэдзіны 2021 года. Яна аказваецца днём на платнай аснове як у форме паўстацыянара ў самім тэрытарыльным цэнтры, так і дома (у тэрытарыяльным цэнтры на базе аддзялення дзённага знаходжання — кошт складае на сёння 75 капеек у гадзіну, дома будзе крыху даражэй — 1 рубль 16 капеек). Чалавек мае права атрымліваць такую паслугу ад 10 да 40 гадзін у тыдзень. Прызначаная яна для людзей, у якіх ёсць псіхічныя расстройствы, у прыватнасці, пачатковая стадыя дэменцыі. Гэтым людзям не патрэбная сядзелка і сацыяльны работнік, бо яны, як правіла, мабільныя, многае могуць рабіць самі. Яны маюць патрэбу менавіта ў наглядзе, суправаджэнні падчас прагулак. Бо могуць забыцца выключыць газ, своечасова прыняць таблеткі, паесці, нават заблукаць. Небяспечна пакідаць іх у кватэры адных, адпускаць у краму. Таму калі дзеці не маюць магчымасці цэлы дзень знаходзіцца побач з мамай ці татам, яны могуць скарыстацца дадзенай паслугай, і прафесійны нагляд і догляд пажылога чалавека, пакуль тыя на рабоце, будуць ажыццяўляць кваліфікаваныя спецыялісты. Для тых бабуль і дзядуль, якія карыстаюцца паслугай у форме паўстацыянара — наведваюць тэрытарыяльны цэнтр, дадаткова праводзяцца заняткі па інтарэсах.
— Паслуга маладая, таму яшчэ не такая папулярная, як іншыя, — адзначае Людміла Вашчыла, — але з кожным годам звяртаецца ўсё больш людзей. У цэлым гэтай паслугай ужо скарысталася каля 90 чалавек, з іх у паўстацыянары — дзесяць, астатнія — дома.
Надзея ДРЫНДРОЖЫК
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
