З 4 да 7 верасня па запрашэнні Савета Рэспублікі нашу краіну з афіцыйным візітам наведае парламенцкая дэлегацыя Рэспублікі Узбекістан на чале са Старшынёй Сената Олій Мажліса Рэспублікі Узбекістан Танзілой Нарбаевай. У графіку візіту — абмеркаванне пытанняў міжпарламенцкага ўзаемадзеяння. Акрамя таго, упершыню будзе праведзены беларуска-ўзбекскі жаночы бізнес-форум, арганізатарам якога выступае Савет Рэспублікі Нацыянальнага сходу Рэспублікі Беларусь.
«Мы хочам паказаць патэнцыял нашай краіны, паказаць нашу краіну ў цэлым, нашу гасціннасць. Вядома, для нас вельмі важны эканамічны складнік, таму што нас звязваюць добрыя адносіны, шматлікія кантракты, пагадненні, якія дзейнічаюць паміж краінамі. І гэта надасць новы імпульс у супрацоўніцтве. Самае галоўнае — правядзенне дадзенага мерапрыемства павінна даць новы штуршок да супрацоўніцтва паміж нашымі жаночымі, маладзёжнымі арганізацыямі. Мы спадзяёмся, што тыя добрыя, дружалюбныя адносіны, якія ёсць паміж нашымі краінамі і народамі, дзякуючы такім мерапрыемствам будуць прырастаць», — адзначала Старшыня Савета Рэспублікі Наталля Качанава падчас размовы з журналістамі.
5 верасня падчас секцыйных пасяджэнняў будуць разгледжаны найважнейшыя пытанні супрацоўніцтва дзвюх краін. Удзельніцы форуму абмяркуюць пашырэнне супрацоўніцтва Беларусі і Узбекістана ў галіне прамысловасці. У рамках праграмы ўдзельніцы форуму наведаюць з экскурсіяй вытворчыя цэхі БелАЗа, карпаратыўны музей знакамітага прадпрыемства.
Для ўдзельніц секцыі, прысвечанай супрацоўніцтву ў лёгкай прамысловасці, арганізатары падрыхтавалі экскурсію на вытворчыя цэхі ААТ «Камволь».
Не застанецца без увагі ўмацаванне партнёрства аграпрамысловых комплексаў Беларусі і Узбекістана. Пасяджэнне такой секцыі адбудзецца на базе ААТ «Азярыцкі-Агра» (Смалявіцкі раён, Мінская вобласць). Удзельнікі азнаёмяцца з арганізацыяй работы малочнатаварнай фермы, агароднінабульбасховішча, наведаюць выставу прадукцыі ААТ «Азярыцкі-Агра». Падчас работы секцыі асобная ўвага будзе аддадзена ролі жаночай працы ў развіцці сельскай гаспадаркі і сельскіх тэрыторый абедзвюх краін, выпрацоўцы прапаноў у Дэкларацыю першага беларуска-ўзбекскага жаночага бізнес-форуму.
Сярод тэм для разгляду — супрацоўніцтва краін у сферах медыцыны і фармацэўтыкі. Пасяджэнне адпаведнай секцыі пройдзе на базе Гарадскога цэнтра трансфузіялогіі УАЗ «Гарадская клінічная бальніца № 6».
Таксама ў рамках адпаведнай секцыі на абмеркаванне вынесены такія тэмы, як рэалізацыя партнёрства ў сферы навукі і адукацыі і патэнцыял узаемных кантактаў у сферы культуры і турызму. Пасяджэнне дадзенай секцыі адбудзецца ў знакавым для беларускай культуры месцы — Нацыянальным акадэмічным Вялікім тэатры оперы і балета. Плануюцца выступленні, прысвечаныя рэалізацыі сумесных культурных праектаў, развіццю турызму паміж Рэспублікай Беларусь і Рэспублікай Узбекістан; перспектывам развіцця супрацоўніцтва ў сферы музейнай дзейнасці; экспарту адукацыйных паслуг.
Ключавое мерапрыемства першага беларуска-ўзбекскага жаночага бізнес-форуму — пленарнае пасяджэнне на тэму «Жанчыны ў бізнесе — патэнцыял для развіцця дзелавога супрацоўніцтва Беларусі і Узбекістана» — запланавана на 6 верасня.
Валерыя СЦЯЦКО
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
