Сергеенка: Не толькі выявіць недахопы, але і аператыўна іх ліквідаваць

Падчас маніторынгу падрыхтоўкі навучальных устаноў да новага навучальнага года стаіць мэта не толькі выявіць недахопы, але і аператыўна іх ліквідаваць. Такім меркаваннем з журналістамі падзяліўся кіраўнік Адміністрацыі Прэзідэнта Ігар Сергеенка падчас наведвання шэрагу ўстаноў адукацыі Глускага раёна, перадае БелТА.

«Нашы дзеці па ўсёй краіне 1 верасня дружна пойдуць у школы і сядуць за парты, — адзначыў Ігар Сергеенка. — Пры падрыхтоўцы навучальных устаноў да новага навучальнага года ў адпаведнасці з даручэннем Прэзідэнта Адміністрацыяй арганізаваны маніторынг работы па ліквідацыі недахопаў. Па ўсёй краіне працуюць групы, узначаленыя памочнікамі Прэзідэнта па рэгіёнах, у склад якіх уваходзяць супрацоўнікі Камітэта дзяржкантролю, Міністэрства адукацыі, Генеральнай пракуратуры. Стаіць мэта не толькі выявіць недахопы, але і аператыўна дапамагчы ў іх вырашэнні, каб стварыць годныя ўмовы для вучобы, забяспечыць бяспеку, улічыць усе пытанні — ад харчавання да падвозу дзяцей у школу».

Для азнаямлення з падрыхтоўкай устаноў адукацыі Ігар Сергеенка прыняў рашэнне выехаць у Глускі раён Магілёўскай вобласці. «Хацелася паглядзець, як тут, у беларускай глыбінцы, арганізавана гэтая праца, — падкрэсліў ён. — У ходзе размовы з кіраўнікамі і педагогамі, падчас наведвання гарадской школы, якая абраная ў маршруце зусім нечакана, а таксама сельскай школы я ўбачыў, што мясцовыя органы ўлады добрасумленна падышлі да гэтага пытання — сур’ёзных заўваг па гатоўнасці навучальных устаноў Глускага раёна практычна не выяўлена».

Ігара Сергеенку прыемна здзівіла праведзеная праца ў сярэдняй школе № 2 Глуска, якую кіраўнік Адміністрацыі Прэзідэнта наведаў незапланавана. Дарэчы, летась навучальная ўстанова адзначыла 100-гадовы юбілей. «Школа адкрывае дзверы да новага навучальнага года ў поўнай баявой гатоўнасці, — адзначыў ён. — Аўдыторыі, класы, музей, спартзала — усё адпавядае гэтым патрабаванням, у тым ліку ў пытаннях харчавання. На прыкладзе такіх раёнаў і пасёлкаў мы бачым, з якой любоўю і цікавасцю падыходзяць спецыялісты, нашы настаўнікі, да арганізацыі сваіх працоўных месцаў і школ да новага навучальнага года. І робяць гэта без лішніх напамінкаў».

У школы Глускага раёна з 1 верасня пойдуць 1,42 тыс. навучэнцаў, у тым ліку 125 першакласнікаў. Усё прадугледжана для іх камфорту і бяспекі. Асобныя пажаданні і заўвагі былі выказаны па маршрутах перамяшчэння, добраўпарадкаванні тэрыторыі вакол школ, прысядзібным участках. Што тычыцца ацэнкі гатоўнасці навучальных устаноў да заняткаў у цэлым, на працягу гэтага тыдня ўсё будзе дапрацавана і дашліфавана. «Задачы кіраўніком дзяржавы пастаўленыя, але пакуль аб выніках казаць рана, — сказаў Ігар Сергеенка. — Упэўнены, што ўсё будзе выканана і пракантралявана. На будучыню ж неабходна зрабіць высновы, як загадзя планамерна рыхтаваць навучальныя ўстановы да новага навучальнага года, і рабіць гэта яшчэ вясной».

Паводле слоў Ігара Сергеенкі, дзяржава стварае максімальна камфортныя ўмовы для навучання і развіцця дзяцей, іх знаходжання ў навучальных установах — адпаведна, аддача павінна быць раўнацэннай. «Сёння ў Глускім раёне задзейнічаецца 10 аўтобусаў для падвозу дзяцей у школу, — паведаміў ён. — Неабходныя ўмовы ствараюцца: ёсць кваліфікаваныя педагогі, выдатныя аўдыторыі, навучальны матэрыял. Застаецца толькі вучыцца і вучыцца. І нагрузка, я вам скажу, не павялічваецца, як многія кажуць. Сёлета ў выпускнікоў было ўсяго 2 цэнтралізаваныя іспыты, а ў мой час, 40 гадоў таму, здавалі 8 іспытаў і 4 уступныя. Атрымліваецца, што нагрузка была нават вышэй. Магчыма, узровень інфармаванасці не адказваў сённяшняму дню, але ведаў было дастаткова, каб паступіць у вышэйшую навучальную ўстанову».

Фота: БелТА