Прэзідэнт наша краіны абмеркаваў з кіраўніком дыпламатычнай місіі дарожную карту і кірункі далейшых узаемаадносін паміж дзяржавамі. Таксама Аляксандр Лукашэнка запрасіў свайго бразільскага калегу Лулу да Сілву ў Беларусь.
Прэзідэнт акцэнтаваў увагу на важнасці сустрэчы з паслом — як для Беларусі, так і для Бразіліі. Ацэньваючы беларуска-бразільскія адносіны, кіраўнік дзяржавы падкрэсліў, што яны могуць быць значна лепшымі. «І ў палітычных адносінах, але перш за ўсё ў эканамічных, гандлёва-эканамічных, — удакладніў ён. — Гандлёва-эканамічныя адносіны — гэта аснова, базіс любых адносін. Калі ў нас будзе ў матэрыяльных адносінах моцная зацікаўленасць, звязка пэўная, тады выбудуюцца і палітычныя, і дыпламатычныя адносіны. Як пасол вы гэта не горш за мяне разумееце».
Падчас сустрэчы Аляксандр Лукашэнка і Бернард Жорг Леапольд дэ Гарсія Клінгл дамовіліся аб канкрэтных кірунках беларуска-бразільскага супрацоўніцтва, якія выведуць адносіны паміж Беларуссю і Бразіліяй на больш высокі ўзровень. У сувязі з гэтым беларускі лідар агучыў шэраг прапаноў.
«Думаю, што вы і да ўрада, свайго парламента і перш за ўсё Прэзідэнта Бразіліі Лулы да Сілвы давядзеце мае прапановы, — пведаміў ён. — Я вас вельмі прашу, як адна з асноўных прапаноў — накіраваць сігнал свайму Прэзідэнту, што мы яго чакаем у Беларусі. У любы зручны час для яго. Лепш зімой, для таго, каб ён убачыў нашу зімнюю прыроду. І мы маглі б падчас яго візіту канчаткова вызначыць тую дарожную карту або план нашых узаемаадносін. Яшчэ раз падкрэсліваю: беларускае кіраўніцтва ў гэтым вельмі зацікаўлена».
У сваю чаргу, кіраўнік дыпламатычнай місіі заўважыў, што для яго вялікі гонар знаходзіцца на гэтай сустрэчы і мець магчымасць перадаць прэзідэнту сваёй краіны запрашэнне ад беларускага калегі наведаць Беларусь для таго, каб абмеркаваць дарожную карту далейшага супрацоўніцтва.
«Мы ў Бразіліі вельмі цэнім адносіны з вашай краінай, а таксама цэнім тую работу, якая сёння праводзіцца ў вашай краіне, — падкрэсліў пасол. — Мы разумеем далікатнасць сітуацыі, якая сёння склалася ў вашым рэгіёне. Мы таксама бачым супрацьстаянне, якое сёння адбываецца паміж Расіяй і заходнімі дзяржавамі. Бразілія гатова прымаць удзел у дыялогу, і мы таксама бачым вас як чалавека, які не толькі вельмі добра разбіраецца ў сітуацыі, якая склалася, але і які можа прымаць удзел у гэтым дыялогу і садзейнічаць вырашэнню сітуацыі. Прэзідэнт Бразіліі, я ўпэўнены, з вялікай удзячнасцю ўспрыме ваша запрашэнне, прыме яго, бо ён ведае, як сёння важна абмеркаваць з вамі вырашэнне той сітуацыі, якая склалася. Мы разумеем, што стаіць на коне. Намі прызначаны спецыяльны пасланнік — міністр, які ад Бразіліі прымае ўдзел у дыялогу».
Пасол Бразіліі ў Беларусі перакананы, што дыялог адбудзецца. «Упэўнены, што дыялог патрабуе агульнай волі, агульнага імкнення да знаходжання гэтага дыялогу», — удакладніў ён і выказаў спадзяванне, што і Аляксандр Лукашэнка, і Прэзідэнт Бразіліі змогуць прыняць актыўны ўдзел у гэтым працэсе.
Бразілія традыцыйна ўваходзіць у топ-10 гандлёвых партнёраў Беларусі. Летась тавараабарот паміж краінамі склаў 358,1 млн. долараў ЗША, экспарт — 253,9 млн. долараў, імпарт — 104,2 млн. долараў. За першае паўгоддзе 2023 года гандаль таварамі склаў 393,4 млн. долараў, экспарт — 331,5 млн. долараў, імпарт — 61,9 млн. долараў. Асноўнымі пазіцыямі беларускага экспарту з’яўляюцца калійныя ўгнаенні, інсектыцыды, фунгіцыды, гербіцыды і сродкі дэзінфекцыі. Паміж краінамі наладжана супрацоўніцтва і ў гуманітарнай сферы. У Беларусі праходзяць навучанне студэнты з Бразіліі. Плённым з’яўляецца і ўзаемадзеянне ў спартыўнай сферы.
Вераніка КАНЮТА
Фота: БелТА
У размове з журналістамі Надзвычайны і Паўнамоцны Пасол Федэратыўнай Рэспублікі Бразілія ў Рэспубліцы Беларусь Бернард Жорг Леапольд дэ Гарсія Клінгл адзначыў, што ў ходзе сустрэчы з Прэзідэнтам Беларусі абмяркоўваліся важныя аспекты двухбаковага ўзаемадзеяння. «Мы жывём у дастаткова складаны час, калі накладзены вялікія санкцыі, тым не менш, многае было зроблена і сказана для таго, каб іх пераадолець і супрацоўніцтва паміж нашымі краінамі паглыбіць», — звярнуў увагу ён.
Кіраўнік дыпламатычнай місіі расказаў, што падчас сустрэчы з Аляксандрам Лукашэнкам, у прыватнасці, закраналася ўзаемадзеянне дзвюх краін у сферы сельскай гаспадаркі, магчымасці паставак беларускіх трактараў у Бразілію. Акрамя таго, па словах пасла, абмяркоўваліся пытанні аднаўлення аб’ёмаў паставак калійных угнаенняў у Бразілію. «Як вядома, Бразілія з’яўляецца вельмі буйным вытворцам прадуктаў для свету і ў свой час Беларусь пастаўляла да 20% усіх калійных угнаенняў, якія спажывала наша краіна, — заўважыў ён. — У сваю чаргу, Бразілія магла б пастаўляць прадукты з какоса для вытворчасці шакалада, у прыватнасці, для вашага прадпрыемства «Камунарка».
Пасол расказаў, што падчас сустрэчы таксама было абмеркавана ўзаемадзеянне дзвюх краін у галіне адукацыі. Дэлегацыя з Бразіліі, якую ўзначальваюць прадстаўнікі навуковых колаў гэтай краіны, плануюць наведаць Беларусь для падпісання мемарандуму аб узаемадзеянні з трыма беларускімі ВНУ. Акрамя таго, у размове з кіраўніком нашай дзяржавы закраналіся пытанні куплі Беларуссю бразільскіх самалётаў Embraer для патрэб авіякампаніі «Белавія».
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
