Лукашэнка акрэсліў задачы і адзначыў унікальнасць кадравых рашэнняў па міністрах ЖКГ і Мінтранса

Прэзідэнт Беларусі Аляксандр Лукашэнка пазначыў задачы перад новымі кіраўнікамі міністэрстваў жыллёва-камунальнай гаспадаркі і транспарту і камунікацый, якімі прызначаныя Генадзь Трубіла і Аляксей Ляхновіч, перадае БелТА.

Абодва новыя міністры прызначаныя на гэтыя пасады пасля работы на пасадах першых намеснікаў міністраў у адпаведных ведамствах, і гэты факт Прэзідэнт адзначыў асабліва: «Акрамя задач, якія я хацеў бы перад вамі паставіць, думаю, што важней тое, што вы лепш за мяне ведаеце, што трэба рабіць на даручаных вам участках работы. Шчыра скажу: я не памятаю выпадку, каб мы кіраўнікамі міністэрстваў — міністрамі — прызначалі намеснікаў. Мы заўсёды шукалі, падбіралі новых людзей. Каб новы чалавек прыйшоў, які ведае справу, прафесіянал, паглядзеў новымі вачыма на тое ці іншае ведамства. Але ў дадзеным выпадку я лічу, што і Генадзь Аляксеевіч, і Аляксей Аляксеевіч — людзі падрыхтаваныя. Не магу сказаць, што міністэрствы былі праваленыя і былыя міністры дрэнна працавалі. Таму мы і спыніліся на кандыдатурах намеснікаў».

Разам з тым Аляксандр Лукашэнка перад кожным з міністраў паставіў і задачы.

Міністэрства ЖКГ павінна быць бачна

«Я чакаю ад міністэрства, па-першае, каб яго было бачна. Разумееце, пра што гаворка. І, па-другое, каб гэта міністэрства нарэшце даказала, што яму быць. Што Міністэрства жыллёва-камунальнай гаспадаркі ў краіне трэба. Для вас не сакрэт, мне пастаянна ўносіліся прапановы аб ліквідацыі гэтага міністэрства або ўключэнні ў нейкае іншае міністэрства, таму што нібыта функцыі перасякаюцца. Многія функцыі рэалізуюцца мясцовымі органамі ўлады. Некаторыя ўваходзяць у Міністэрства будаўніцтва — сумежныя і гэтак далей», — адзначыў Прэзідэнт.

Аляксандр Лукашэнка не згодны з такім падыходам і не лічыць, што гэта так: «Нават калі дзесьці і вы займаецеся будаўніцтвам або капітальным рамонтам ці ж паралельна Міністэрства будаўніцтва — усім працы хопіць. Але, натуральна, вам не варта займацца тым, чым будуць займацца і мясцовыя органы ўлады, і Міністэрства будаўніцтва. Думаю, што міністэрства асабліва і не залазіла ў гэтыя паўнамоцтвы і функцыі».

Прэзідэнт растлумачыў, чаму захоўвае Міністэрства ЖКГ. Гэта звязана з тым, што ў зваротах ад грамадзян, якія паступаюць на імя кіраўніка дзяржавы, у Адміністрацыю Прэзідэнта, пытанні жыллёва-камунальнай гаспадаркі знаходзяцца на першым месцы.

«Вы павінны прыўносіць навінкі ў гэтую сістэму, жорстка кантраляваць выкананне ўсяго функцыяналу, які ўскладзены на мясцовыя органы ўлады і іншыя арганізацыі. І хацелася б, каб гэтых скаргаў было менш. Я разумею, што заўсёды так было. Заўсёды чагосьці не хапала — то плот не адрамантавалі, то дах, то балкон», — сказаў Аляксандр Лукашэнка.

/Будзе дапоўнена/.