Сёлета, у Год міру і стваральнай працы, рэспубліканскі суботнік сабярэ каля трох мільёнаў добраахвотнікаў для навядзення парадку на значных для кожнага рэгіёна і ўсёй краіны аб'ектах. Гэта тэрыторыі саміх населеных пунктаў: бальніцы, паркі, сацыяльныя ўстановы, а таксама мемарыяльныя комплексы, помнікі, месцы баявой і воінскай славы, пахаванні часоў Вялікай Айчыннай вайны. Асобная катэгорыя аб'ектаў — гісторыка-культурныя каштоўнасці.
Заробленыя на суботніку сродкі будуць акумуляваныя на спецыяльных рахунках раённых і гарадскіх выканкамаў, потым іх пералічаць на асобныя рахункі аблвыканкамаў і Мінгарвыканкама. Тыя, у сваю чаргу, перавядуць грошы на асобны банкаўскі рахунак Міністэрства фінансаў па ўліку сродкаў рэспубліканскага суботніка ў Нацыянальным банку.
Летась такім чынам было сабрана амаль 12 мільёнаў рублёў. Усе сродкі пайшлі на рамонт і мадэрнізацыю мемарыяльнага комплексу «Хатынь». Сёлета плануецца сабраць такую ж суму. Яна будзе падзелена пароўну: палову накіруюць на рэканструкцыю мемарыяльнага комплексу вязням Азарыцкага лагера смерці ў Калінкавіцкім раёне Гомельшчыны, палову — на стварэнне рэспубліканскага цэнтра патрыятычнага выхавання моладзі на базе Кобрынскага ўмацавання Брэсцкай крэпасці.
Але, акрамя збору сродкаў, суботнік нясе ў сабе больш глыбокі сэнс: яднанне людзей вакол добрай і патрэбнай справы, якую мы робім разам. Робім дзеля сябе і дзеля сваёй краіны. Дзеля сваіх дзяцей.
Ва ўсіх раёнах і абласным цэнтры вызначаны месцы работы па навядзенні парадку. Акцэнт будзе зроблены на добраўпарадкаванне населеных пунктаў, гісторыка-культурных аб'ектаў, мемарыяльных комплексаў, месцаў баявой і воінскай славы, сацыяльных аб'ектаў, у тым ліку аздараўленчых летнікаў, стадыёнаў, паркаў. У сельскай мясцовасці аграрыі правядуць працоўны дзень на палявых работах.
У маштабнай кампаніі возьме щдзел каля 280 тысяч чалавек. У абласным цэнтры галоўнымі пунктамі прымянення сіл стане работа на будаўніцтве школы і паліклінікі ў двух новых мікрараёнах горада. Падчас суботніка навядуць парадак на тэрыторыі воінскага пахавання ў мікрараёне Фолюш, дзе з 1941 да 1943 года існаваў лагер для ваеннапалонных — Шталаг-324. У пачатку вайны ён знаходзіўся на ўскрайку ваеннага гарадка.
У 2008 годзе падчас будаўнічых работ па пашырэнні горада тут былі знойдзены шматлікія чалавечыя астанкі, частка якіх перапахавана на гарадскіх могілках у брацкай магіле. А на месцы самога лагера створаны мемарыяльны комплекс. У 2016 годзе побач з абеліскам адбылося перапахаванне 1600 знойдзеных пазней астанкаў, асобы многіх удалося ўстанавіць дзякуючы медальёнам.
Дарэчы, падчас леташняга суботніка на добраўпарадкаванні тэрыторыі мемарыяла «Шталаг-324» вяліся работы з удзелам кіраўніцтва вобласці.
Трэба сказаць, што да рэспубліканскага суботніка 22 красавіка далучыцца звыш тысячы актывістаў абласнога і раённых камітэтаў БРСМ, якія будуць працаваць на 50 аб'ектах рэгіёна. Сярод іх — добраўпарадкаванне Швейцарскай даліны ў Гродне, Шведскай гары ў Ваўкавыску, мемарыяла памяці ахвяр Першай сусветнай вайны ў Смаргоні, гарадскога парку ў Дзятлаве. Не застанецца без увагі ніводнае месца, звязанае з баявой і воінскай славай рэгіёна.
Гродзенцамі мяркуецца пералічыць у фонд суботніка 872 тысячы рублёў.
Маргарыта УШКЕВІЧ
На рэканструкцыю мемарыяльнага комплексу вязням Азарыцкага лагера смерці ў Калінкавіцкім раёне Гомельскай вобласці накіруюць 50 працэнтаў сродкаў, заробленых падчас правядзення рэспубліканскага суботніка.
Жыхары Гомельшчыны ўжо зрабілі свой уклад у аднаўленне знакавага не толькі для рэгіёна, але і для краіны ў цэлым месца памяці ў Азарычах. Так, 18 сакавіка абласны суботнік сабраў больш за 500 тысяч неабыякавых жыхароў вобласці. Паводле інфармацыі абласнога штаба па правядзенні і арганізацыі суботніка, было сабрана больш за тры мільёны рублёў, што амаль удвая больш, чым летась. Гэтыя сродкі таксама пойдуць на ажыццяўленне маштабнага патрыятычнага праекта ў Калінкавіцкім раёне.
Паводле апошніх звестак, у Гомельскай вобласці ўстаноўлена 101 месца прымусовага ўтрымання мірнага насельніцтва ў гады Вялікай Айчыннай вайны. Лагер смерці «Азарычы» — адно з самых жорсткіх месцаў знішчэння людзей на Беларусі.
Падчас суботнікаў у рэгіёне штогод асаблівая ўвага прадстаўнікоў улады, дэпутатаў, працоўных калектываў — менавіта навядзенню парадку на мемарыяльных комплексах, воінскіх пахаваннях, парках Перамогі ў райцэнтрах і знакавых месцах памяці ў сельскіх населеных пунктах.
Наталля КАПРЫЛЕНКА
Заўтра ў краіне пройдзе рэспубліканскі суботнік, у якім плануюць узяць удзел тры мільёны беларусаў. Жыхары паўночнага рэгіёна актыўна падключыліся да навядзення парадку на зямлі загадзя ў межах шматлікіх акцый раённага і гарадскога маштабаў.
Сімвалічна, што на Віцебшчыне рэспубліканскі суботнік сёлета супаў з фінальным днём правядзення рэспубліканскай акцыі «Тыдзень лесу — 2023». Старшыня Віцебскага аблвыканкама Аляксандр Субоцін разам з прадстаўнікамі грамадскіх арганізацый і работнікамі лясной гаспадаркі ўнясуць свой уклад у добраўпарадкаванне і азеляненне Бешанковіцкага лясніцтва.
На мінулым тыдні 13 красавіка ў горадзе на Дзвіне стартавала ўсегарадская акцыя «Чысты чацвер», якая працягвае набіраць абароты ў прадпрыемствах і арганізацыях, установах адукацыі і аховы здароўя. Зыходным пунктам працоўнага дэсанта пад кіраўніцтвам губернатара стала Успенская горка і Свята-Успенскі кафедральны сабор. Да добрай справы падключыліся работнікі ААТ «Віцязь», Віцебскі абласны клінічны радзільны дом, РУП «Беларуснафта» — Віцебскаблнафтапрадукт і іншых арганізацый, школьнікі і члены патрыятычных клубаў. Прадстаўнікі грамадскіх арганізацый Віцебскай вобласці талакой наводзілі парадак на воінскім мемарыяле ў аграгарадку Заронава, дзе пахавана звыш 10,5 тысячы байцоў Чырвонай Арміі.
Па выніках рэспубліканскага суботніка Віцебшчына плануе зарабіць каля 1,28 мільёна рублёў.
Аляксандра ГВОЗДЗЕВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.